Aspe Ipar Aurpegi Klasikoa

Capra Alpina(e)k idatzia.
1938
bisita

Aspe mendia horma bertikalak dituen gailur bat da eta Aisa aran goi aldeko nagusi izatetik aparte, pirineo mendebaldeko gailurrik adierazgarrienetako bat dugu. Igoera klasiko batekin urteari bukaera eman nahi izan diogu, ipar aurpegitik igoz, elur gutxi erori bada ere egoera onean aurkitzen bai da. Amaitzear dagoen urteari, guretzako oso oparoa izan dena, mendikate ezberdinetan hainbat igoera egiteko aukera eman digunak, Pirineo, Picos de Europa, Gredos, Alpeak eta bereiziki Ande Mendikate Zurian, besteak beste Alpamayo, Tocllaraju edo Chopicalqui, bezalako gailur esanguratsuek, bukaera ezin hobea eskainiko genioke.  

Goizeko 7:15h-tan Candanchu elur estazioko pista handiko aparkaleku inguruan aurkitzen gara, zerua izarrez erabat estalia dago eta termometroak -5º markatzen du. Egiten duen hotzak  autoko berotasunetik ateratzea zailtzen digu , ori dela eta prestaketa orduan denbora dezente erabiltzen dugu. 8:00h inguru eta egunsentiarekin bat, elur artifizialak ezin estali duen Pista Handitik zehar ibiltzen hasi gara, Zapatilla eta Tortiella malden oinpean aurkitzen den ordekara iritsiz.

Ezkerretik Tortiella pistatik gorantz egiten dugu, hau ere elur faltaz itxia, eta Rinconada ingurura iritsi aurretik eskuinera biratu eta pista tentea jarraituz Tortiellas lepora iristen gara 1.970 m. Elur kanoiak, naiz gau guzian martxan egon diren, hemen ere bere egin beharra ez dute bete. Juan Carlos Erregearen pistatik gorantz jarraitzen dugu eta Zapatilla teleaulkira iritsi aurretik, ezkerretik aldentzen gara Aspe behatokira igo bitarte, bertatik Aspe ipar aurpegi zirraragarria lehen aldiz ikustera lortuz.

Behin eguzkitan eta goizeko hotza desagertzean, tenperatura askoz ere atseginagoa bihurtzen da. Harrizko irtengune bat jaisten dugu, gezurra badirudi ere hiru parabolt daude bertan, Tortiellas sakaneko behe aran kanalera eramaten gaituena. Aurrera egin ahala eskuinera (O) Garganta de Aisa lepora doan bide arrunta uzten dugu eta parez pare dugun malda tentetik gora goaz (35º), horma bertikalean aurkitzen den zati ahulenetik gaina harrapatu asmoz.  

Hormaren gainean aurkitzen gara (2.250 m) eta ezkerrera 45º-ko bira eginez, zeharkaldi arriskutsua hasten den lekuan kokatzen gara (2:30h). Segurtasunez beharrez baina gehiago, sokaz lotu eta ezkerrera Aspe Ipar isurialdera iritsi asmoz zeharkaldia egiten dugu (SSO). Lehen tarte honetan aseguratzeko aukerarik ez dago, baina oin arrasto nabariak daudenez, zailtasunik gabe aurrera egiteko aukera dugu naiz gune oso arriskutsua izan eta Tortiellas sakanera balkoi itzela egon. Elurra ere egoera ezin hobean aurkitzen dugu eta naiz izotz plaka batzuek dauden, granpoiak ikusgarri heltzen dute.

Behin zeharkaldia bukatu eta dagoeneko korridorearen bertikalean, maldak bere bataz bestekoa handitzen duen momentuan (45º), plaka izoztu batzuetatik igoz harri bloke batzuetara iristen gara. Bertan friend bakar batzuek jartzeko aprobetxatzen dugu, segurtasuna oharkabetzerik ez dugu. Blokeak gainditzea lortzean, lehen irtengune gainean kokatzen gara.

Beste malda tente batetik gorantz jarraitzen dugu harri bloke handiko harresi batera iritsiz. Gune honetan izotz gehiago aurkitzen badugu ere, elurraren baldintzak oso onak direnez zailtasunik gabe ensanblen igotzeko aukera ematen digu.

Maldak bere bata bestekoa handitzen duen bitartean (50/55º), altuera irabazten goaz harri bloke handiek saihestuz. Eguzkia aspaldian Murcielagos ertzaren atzean ezkutatu zaigu eta tenperaturak, berriz ere, nabarmen behera egin du hotz sentsazioa handituz. Beharrik ez badugu ere, segurtasuna bermatzeko trasteak ekarri ditugunez, tarteka jartzen goaz.

Bigarren irtengunea gainditzea lortu dugu eta tarte etzanago batera iritsi gara, non gure biki behartuei atseden emateko aukera dugun (2.550 m). Dagoeneko igoerako azken zatira iritsi gara, baina naiz gailurra esku eskura izan, azken tartea geratzen zaigu.

Elur faltak agerian utzi ditu egoera normalean eta gauden urte aroa kontutan izanik, erabat estaliak egon beharko liratekeen eremu ugari. Ori dela eta eskaladako azken zati hau mistoan egitea behartuak gaude. Elurrezko maldatik gorantz igotzen jarraitzen dugu harri bloke ugari dauden ingurura gerturatzen garen bitartean.

Hanka arrastoak ertzera norabidean garamatzate bere ahotik igo ahal izateko sakanaren barrenetik igo ordez. Gutxika bada ere bidera ateratzen zaizkigun harri bloke guziak saihesten goaz eta zailtasunik gabe Aspe tontorrean dagoen erpin geodesikora iristen gara (2.645 m). Igoera ederra 2016 urte oparo eta emankor honi agur esateko.

Gailurrera lehenak iristeko zortea dugu eta horrek, talaia ikusgarri honetatik dauzkagun bista ikusgarriak bakardadean gozatzeko aukera ematen digu. Nafar eta Aragoi pirineora dugun ikuskizun zabalak argi eta garbi uzten du dagoen elur falta, oso ezohikoa gauden urte garai honetan. Anie, Mesa de los tres Reyes, Petrechema, Acherito, Mallo Gorreta, Bisaurín, Collarada, Anayet, Infiernos, Gran Facha, Frondiellas, Ballaitous, Palas, Midi d´Ossau, eta beste hainbat ikus ditzakegu. 

Denbora daramagu eginiko igoera ederrez isiltasunean gozatzen, baina halako batetan ibilbide arruntetik talde handi bat gerturatzen ikusten dugu. Jende ugari eta zarata gehiegi gure gusturako. Soka jaso, arnesa kendu, piolet bat motxilan gorde eta mendian bera abiatzen gara, tontor masifikatu eta zaratatsutik lehenbailehen aldendu asmoz.

rtengune bat destrepatu (O) eta lehenik bretxa batera eta ondoren Garganta de Aisa lepora eramaten gaitu. Hemendik kanala jaitsiz hormaren goiko aldera iritsiko gara, ordu batzuek lehenago ipar aurpegirantz ezkerrera biratu dugun tokira eta jarraian, Tortiellas sakanera eta eski pistetara, bertatik Candanchu-ko aparkalekura iristeko, non ordu batzuek lehenago autoa utzi dugun. Ibilbide guzia egiteko 6:30h erabili behar izan ditugu. 

 

Datu teknikoak

  • Ibilbidea: Aspe Ipar korridore klasikoa
  • Igoera data:2016-12-31
  • Luzera:9.140 m.
  • Desnibela:1.204 m.
  • Kokapena:Pirinioak
  • Kategoriak : Ipar aurpegia, Korridorea, Kranpoiak
  • Zailtasuna:AD
  • Korridorearen graduazioa:55º
  • Ibilbide zirkularra:Bai
  • Hasiera puntuan amaitzen da:Bai
  • Iristeko denbora:4:00 h
  • Nola iritsi:Candanchú-ko aparkalekutik.
  • Igotzeko denbora:6:30 h
  • Jeisteko denbora:2:30 h
  • Ezaugarriak:Enbutuan sartzeko trabesia delikatua eta ondoren kanal nabarmen bat. Hala ere, elurraren arabera, ipar hormako edozein lekutik igo daiteke.
  • Materiala:30 metroko soka, alien semaforoa, pare bat torloju, kranpoiak eta kaskoa.
  • Egoera:Elurrarekin.
  • Garaia: Negua, Udaberria
  • IBILBIDEAREN DATU GUZTIAK IKUSI
Gureak eta beste batzuen Cookie-ak erabiltzen ditugu, webgune honen erabiltzaileen nabigazioaren analisia egin ahal izateko.
Nabigatzen jarraitzen baduzu, onartzen duzula suposatzen dugu. Nahi izanez gero, konfigurazioa aldatu edo informazio gehiago jaso ahalko duzu hemen.