Taillón Ezker Korridorea - 350 m/D+ (IV mixto 85º)

Capra Alpina(e)k idatzia.
694
bisita

Taillon mendiaren mendebalde aurpegian aurkitzen den Ezker Korridoreak, Goulotte Quintana (350 mts, D+ 75º) eta Korridore Zentralarekin batera (350 mts, MD inf IV/3+), trilogia eder bat osatzen dute. Hiruretan errazena dela esaten badute ere, aitortu beharren nago kezka handiak ditudala. Dituen hiru izotz kaskadak eta bukaerako IVº zailtasuneko irtengune mistoak, eskaladari izugarrizko ikusgarritasuna ematen diote.

Kotxea Gavarnie Gèdre eski estazioko aparkalekuan utzi dugu, izotz geruza sendo batekin aurkitzen dena. Ez alferrik termometroak -4º adierazten ditu. Eski pistatik gora azken remontea bila ateratzen gara, jarraian Col de Tentes-a bideratu ahal izateko. Laino zerratuak metro gutxi bakar batzuetara ikusteko aukera ematen digu eta Taillon mendia gure aurrean dagoela jakin arren, ikusteko aukerarik ez dugu. Hemendik Col de Bouxaro edo Bujaruelo lepora bideratzen gara. Zutik mantentzea zaila egiten zaingu haize izoztu batek ongi etorria ematen baitigu.

Lainoak ezustekoa eman digu eta konturatzerako, Gabieto glaziarrerako sarbidetik ezkerrerago eramaten gaitu. Konturatu orduko eginiko hutsa konpondu eta irtengunea zailtasunik gabe gainditzen dugu. Erdian izotz goulotte bat du, baina eskuin partetik hasi eta harritan ezker trabesia bat eginez, izotz zati hau gainditzen dugu zaitasunik gabe. 

Tarte hau gainditu ostean mendebalde aurpegi ikusgarriarekin aurrez aurre aurkitzen gara, non Korridore Zentral eta Ezkerrekoa nabarmentzen diren. Goulotte Quintana berriz, lotsati, apenas uzten da ikusten. Sokakide bat baino gehiago ikusten ditugu korridoreetan zehar eskalatzen. 

Korridorearen oinpera iritsi ahal izateko 45º dituen malda gainditzen dugu, non eskaladako tramankuluak prestatu eta sokak gerrian lotu ostean, eskalatzen hasten garen. Lehen luzea, 35 m eta 75º- 80º dituen kaskada izoztua da. Bertara iritsi ahal izateko arrokan zehar eskubira zeharkaldi txiki bat egiten dugu.

Lehen torloju bat sartzen dugu. Erreztasunez sartzen dira eta horrek gure konfidantza handitzen du. Piolet eta kranpoiek altura irabazten laguntzen digute eta gure segurtasuna bermatzeko beste torlojuren bat ere sartzen dugu. Eskuin horma azpian bigarren izotz kaskada oinpean bi iltze aurkitzen ditugu bigarren bilkura egin ahal izateko.

Bigarren luzea, 30 m eta 70º, izotz kaskada berri batetik goruntz doa irtengunearen goi aldera iristeko. Egoera onean aurkitzen dugu eta pioletak izotzetan zeharo ongi sartzen dira. Goi zatira iritsi aurretik eta segurtasuna bermatzeko, bi torloju sartzen ditugu. Bertatik zuzen igotzen gara parez pare dugun hormara bitarte, izotz kaskada berri baten ezkerretara, non hirugarren bilkura aurkitzen dugun bi iltze eta kordino batzuekin egina, bertan denbora galdu gabe lotuz.

Hirugarren luzea eta gure ustez ibilbidearen zailtasunik handiena duena, 15 m eta 75º-85ºko izotz kaskada, bilkura gunetik errespetu handiz begiratzen dugu. Izotz bloke soil bertikalak zirrara sortzen badigu ere, edertasun harrigarria du. Behin bere oinpean, sorbalda altueran torloju bat jarri eta izotzetan pioletak trinko sartuz, beldurrik gabe eskaladari ekiten diogu. Ondo sartzen direla ikusi eta aurrera jarraitu ahal izateko segurtasuna ematen digu.

Beste bi torloju gehiago sartu ditugu goiko zatia harrapatu aurretik. Elurgune batera iritxi gara, askoz ere etzanagoa dena eta zeharkatu ostean, eskuin horman bi iltze aurkitzen ditugu non laugarren bilkura egiten dugun. Adrenalina gogakada erabatekoa da, naiz eta kaskada gainditzea uste bainan errazagoa egin zaigun. Elur eta izotz baldintzak onak direnean dena errazagoa gertatu ohi da.

Bilkuratik atera bezain laster 55º-ko izotz kaskada berri bati aurre egiten diogu, eta aurrekoak bainan etzanagoa denez, ensanblen jarraitzea erabaki dugu, beti ere ezker alderako joera mantenduz. 45º eta 50º-ko bataz besteko maldetatik igoz jarraitzen dugu. Tartean pare bat irtengune mixto aurkitzen ditugu. Seguru baldintza normaletan elurreztatuak egongo zirela. Malda azken mixtoko hormara iristen da eta bostgarren bilkura iltze bat baliatuz egiten dugu.

Bi aukera ditugu, eskuinetik igotzen saiatu edo ezker aldetik joan. Guk bigarrena hau aukeratu dugu. Elur mingain batetik jarraitzen dugu bidea mozten digun bloke handi batera iritsi bitarte (IVº). Blokearen pitzadura batetan aurkitzen dugun iltzean seguru bat pasa dugu gahinditzen saiatu aurretik. Pioletak ahal dugun gorenean sartzen ditugu, eskuin kranpoiaren punta bat harriak duen tolestura txiki batetan finkatu eta eskuetatik tinko tiratuz, ezker kranpoia elurretan kokatzea lortzen dugu. Irtengunea behin gainditu ostean, elurretatik jarraituz laster seigarren eta azken bilkura gunera iristen gara.

Taillon tontorraren gertutasuna nabaria da eta sokak jaso eta motxilan gordetzeko erabakia hartu dugu, azken maldari ekin aurretik, ez bai du inongo zailtasunik azaltzen. Taillon tontorra 3.144 m. Oso mendi bereizia guretzako, non hainbat oroitzapen eta esperientzi ahaztezin bizi izan ditugun. Eguna ikusgarria dugu, zeruak urdin bizi kolorea du eta bistak ezin hobeak dira, Perdido, Cilindro, Marboré, Pimene, Vignemale,... bainan hotz handia egiten du eta hori gutxi balitz, haizeak gogor astintzen digu sensazio termikoa zeropetik gradu asko jaitsiz.

Jaitsiera hego-mendebaldeko ertzetik hasi dugu. Centralaren irteera eskuinean utzi eta beherantz goaz, Gabietos lepora bidean 2.940 m. Bertara jaitsi ahal izateko eskuinetik behera zeharkaldi arriskutsu bat egin beharrean gaude, ondoren berriz ere eskuin aldera hartu eta Taillon mendebalde aurpegia parez pare paralelo eramanez beste zeharkaldi arriskutsua egin ahal izateko. Quintana Korridorearen aurretik pasa eta kanal estu batetik jaitsiera delikatua egin beharrean gaude, non batzuek rapelatzen ikusten ditugun, Gabietos Glaziarrera iritsi ahal izateko. 

Eguneko azken zailtasuna jaisten dugu, estu eta tente den pasartea eta Taillon ipar aurpegiko elurtean utziko gaituena. Bujaruelo edo Bouxaro lepora bidean ezkerretik jarraitzen dugu, ondoren eskuinetik Col de Tentes-a bideratzeko. Hemendik eski estazioko telesillen bila goaz, ondoren inongo zailtasunik gabe aparkalekura iritsi ahal izateko, non orain 11:00 ordu kotxea utzi dugun, gaurko jardunaldia bukatutzat emanez..

Datu teknikoak

  • Ibilbidea: Taillon Mendebaldeko ezker korridorea
  • Igoera data:2019-01-12
  • Luzera:16.090 m.
  • Desnibela:1.651 m.
  • Kokapena:Pirinioak
  • Kategoriak : Korridorea, Mixtoa
  • Zailtasuna:D+
  • Harri eskaladaren zailtasuna:IV
  • Korridorearen graduazioa:85º
  • Izotz eskaladaren zailtasuna:WI3
  • Ibilbide zirkularra:Bai
  • Hasiera puntuan amaitzen da:Bai
  • Iristeko denbora:4:00 h korridorera
  • Nola iritsi:Gavarnie Gedre eski estazioko aparkalekutik
  • Igotzeko denbora:3:45 h
  • Jeisteko denbora:3:15 h
  • Ezaugarriak:Eski estaziotik atera behar izan genuen eta horrek ibilbidea luzeago egin zuen. Laino zerratua aurkitu genuen ibilbidea nahastea lortuz eta denbora galduaraziz
  • Materiala:Kranpoiak, pioletak, 6 torloju, friend jokua, 60 mt-ko 2 soka
  • Egoera:Korridorea oso egoera onean aurkitu genuen, batez ere izotz kaskadas
  • Garaia: Negua
  • IBILBIDEAREN DATU GUZTIAK IKUSI
Gureak eta beste batzuen Cookie-ak erabiltzen ditugu, webgune honen erabiltzaileen nabigazioaren analisia egin ahal izateko.
Nabigatzen jarraitzen baduzu, onartzen duzula suposatzen dugu. Nahi izanez gero, konfigurazioa aldatu edo informazio gehiago jaso ahalko duzu hemen.