Taillon Erdi Korridorea - 350 m/MD inf IV/3M

Capra Alpina(e)k idatzia.
556
bisita

Taillon mediaren mendebalde hormak altxor bitxiak izkutatzen ditu, itxura dotore eta ikusgarrikoak pirineo zezura bideratzen direnak, ehundaka alpinistentzako erakargarri suertatzen direnak. Korridore estuak, goulotte bertikalak, izotz gardenak eta inguratzen duen ingurune ikusgarria. Pirineo bazter hau oso berezia egiten dute eta erabat liluratzen gaitu. Gaur Erdiko Korridorera gerturatu gara esperientzi ahaztezin batez gozatu ahal izateko.

Grange de Holle (Gavarnie) aterpetxe ondoan denda txiki batetan ordu gutxi batzuek atseden hartu ondoren, goizeko 4:00 ordutan jaiki eta Gavarnie-Gedre eski estazioko aparkalekura igo eta bertan autoa utziz, eski pistetik gorantz Col de Tentes norabidean abiatzen gara. Hotz egiten du eta elurra izoztua dagoenez kranpoiak jartzea erabaki dugu Col de Bouxaro edo Bujaruelo Lepora jarraitu ahal izateko. Bertara iritsi eta ezkerrera eginez platora igotzen gara, ondoren Gabietos Glaziarrera eramango gaituen pasarte estura bideratzeko.

Behin Gabietos Glaziarrean begirada, nahitaezin, Taillon mendebalde hormara doakigu, non Erdi korridoreaz gain, Ezker Korridorea eta Goulotte Quintana ikus ditzazkegu. Ez dirudi beste kordararik aurreratu zaigunik, hala hobe, goiz ibiltzea betiere lagungarri gertatzen baita. 50º-ko malda batek Ezker Korridore eta Erdi Korridore hartean dagoen hormara eramaten gaitu, non gune zabal bat aukitzen dugun, erortzen diren izotz zati eta haizetik babesten gaituena.

Atzetik datorren beste kordada bat gauden lekura iritsi da baina ezker korridorean sartu dira. Eskalada hasteko beharrezkoak diren tramankulu guziak jantzi eta sokak gerrian lotu ondoren, lehen izotz kaskada bila ateratzen gara. Eskuinerako zeharkaldi batek korridorearen sarrerara eramaten gaitu, non lehen zatian elur gogorra aurkitzen dugun, ondoren gune izoztuan sartzeko. Hasiera honetik lehen bilkurara gutxi gota behera 80 metro daudenez, lehen 20 metroak ensanblen egitea behartuak gaude.

Segurtasuna bermatu asmoz lehen torloju bat sartzen dugu eta bigarren bat goraxeago, korridorea eskuinera bihurritzen doan bitartean. Beste torlojuren bat sartu dugu eta sokan 60 metroak agortu ondoren, kaskada handiaren eskuinean dagoen hormara iristen gara, non bi iltze eta kordino batzuek aurkitzen ditugun, bigarren bilkura egiteko erabiliz. Kokaleku ikusgarria alajaina, talaia ezin hobea nondik izotz kaskada oso bertikala ikusten den. Edertasun aparta erakusten digu.

Bigarren luzeak eskaladari zailtasun handiena ematen dio, 25 metro altuera eta zati batzuetan 90º-ko bataz bestekoa duen kaskada izoztua. Metro bi jaisten ditugu kaskada ohinpera iritsi eta eskalada hasteko. Bi metro altueran lehen torloju bat jarri eta pioletak eta kranpoi puntak indartsu sartuz, gorantz hasi gara. Tentsioa nabaria da eta kontzentrazioa erabatekoa, bai gorantz doanarena, bai segurtatzen ari denarena.

Kaskada erdigunera iritsi aurretik bigarren eta hirugarren torlojuak jartzen ditugu (85º). Ezkerreko hormara bidean zeharkaldi txiki bat egiten dugu, ondoren bigarren zatiari aurre egin ahal izateko (90º), non izotza askoz ere gogorrakoa nabari dugun. Tentsioa mantentzen da, bai ixiltasuna ere, eta horrek izotz gogorrean piolet kolpe bakoitza entzuteko aukera ematen digun.  

Gure aurretik igaro diren kordaden arrastoak baliatzen ditugu bertan pioletak finkatzeko, bat, bi, hiru torloju gehiago sartzen ditugun bitartean, kaskada goi zatira iristea lortzeko. Behin izotzetik atera eta malda elurtsura iritsiz, askoz ere etzanagoa dena, eskuinean aurkitzen dugun hormara bideratzen gara, non bi parabolt aurkitzen ditugun eta bertan hirugarren bilkura egiteko baliatuz. Parabolt hauek ez dira erraz ikusten, bainan 50 metro soka agortu behar dugu dauden lekura iritsi ahal izateko. Hirugarren luzean, 40 m eta 50º-ko malda, transiziokoa da eta ensanblen egitea erabaki dugu. Hirugarren bilkura bi friend erabiliz kaskada berri baten ezkerrean aurkitzen dugun horman egiten dugu. Kaskada hau aurrekoa baina txikiagoa bada ere, ezin ukatu oso bertikala denik (85º).

Behin bilkuratik atera eta kaskada ohinpera iristeko eskuinera zeharkaldi txiki bat egiten dugu. Izotz horma menderaezina badirudi ere, buru parean torloju bat sartu eta pioletak finkatu ondoren gorantz hasten gara. Osotasunean sartzen den bigarren torloju bat jarri dugu eta eskuin alderuntz igotzen gara, gure aurretik igaro diren kordaden arrastoak jarraituz. Kaskada goi zatira iritsi aurretik bi torloju gehiago sartu ditugu eta behin goian, elur malda batera ateratzen gara. Dagoeneko inongo zailtasunik gabe, laugarren bilkura gunera bideratzen gara. 

Irtengune mixtoa gainditzeko bi aukera nabari ditugu, eskuinetik helduleku gutxiko malda segida igoz edo ezkerretik tximinia estu batetik lehenik eta metro gutxi batzuen ondoren eskuinera biratu eta gorago dagoen elurtera iritsiz. Bigarren aukera hau gauzatzen dugu eta pioletaz baliatuz eta kranpoietan sendo bermatuz, altuera erraz gainditzen dugu, naiz aurkitzen ditugun harri solteak gure arreta guzia eskatzen duten beherantz erori ez daitezen eta atzetik datorren edozeini jo ez diezaioten. Behin 50º/60º duen maldara iritsi eta gorantz jarraitzen dugu urrengo irtengune mixtoaren bila eta non, bostgarren bilkura egiten dugun. 

Zailtasun handirik gabe irtengune berri bat gainditzen dugu seigarren bilkura egin aurretik. Aurrean dugun irtengune mixtoa bi metroko horma bat dugu, erdian pitzadura bertikal bat duena. Pitzadura barruan hankak finkatu ditugu bainan nahitaez zeharka bakarrik sartzen garenez, piolet puntak hormaren pitzadura txiki batzuetan sartu eta eskuetatik tira eginez hankak gora igo eta altuera irabazten dugu. Bizkarra pitzadura hormaren kontra estutu, pioletak irtengunearen goi aldean dagoen izotzean tinko sartu, besoetatik tira egin eta irtengunea gainditzeko aukera dugu.

Behin elurtutako maldara iritsiz, bertatik igo besterik ez zaigu geratzen, korridoretik atera ahal izateko. Azken zati honetan malda askoz ere etzanagoa dugu, naiz oraindik ere 50º/60º-ko desnibela mantentzen duen eta hori dela eta, azken zati hau ensanblen igotzen dugu. Korridorea estutzen eta mehartzen doan bitartean irtengune txikiren bat aurkitzen dugu, bainan zer ikusik ez aurretik igo dugunekin. Azkenean korridoretik ateratzea lortu dugu, Taillon gailurraren eskuin aldean.

Sekulako pozak hartu gaitu, eskalada sinesgaitza izan da eta Taillonera itzultzea oso bereizia, bertan hainbat eta hainbat gauza bizi izan baititugu. Mendebalde ertzera atera bezain laster eguzkiak bete betean hartzen gaitu, bainan ala ere hotza izugarria da eta gainera, haize izotuak astintzen digunez sensazio termikoa handiagotzen du. Zerua estaltzen hasi da eta lainoa Ordesa bailaratik gora igotzen hasi, Perdido, Cilindro, Marboré, Casco,… gailurrak irensteko asmoz.

Behin sokak jaso eta motxilan gorde ondoren, mendebalde ertzetik behera jaisten hasten gara Gabietos lepora bidean 2.940 m. Bertara jaitsi ahal izateko eskuinetik behera zeharkaldi arriskutsu bat egin beharrean gaude, ondoren berriz ere eskuin aldera hartu eta Taillon mendebalde aurpegia paralelo eramanez, beste zeharkaldi arriskutsua egin ahal izateko. Quintana Korridorearen aurretik pasa eta kanal estu batetik kontu handiz jaisten gara Gabietos Glaziarrera iritsi ahal izateko. Erdiko Korridore azpitik pasa gara eta behin eta berriz harriduraz begiratzen diogu, ala nola Ezker Korridoreari ere, orain astebete eskalatzeko aukera izan bai genuen eta oso oroitzapen ona gordetzen dugu. Gutxika bada ere Gabieto Glaziarretik jaisten lagunduko digun irtengune ingurura eldu gara, bertatik Vignemale laino artean ikusten dugularik.

Jaitsierak arrisku puntua badu ere zailtasun handiegirik ez du eskaintzen. Lehen elurte gune bat non sigi-sagatsu nabari den xenda aurkitzen dugun, Taillon mendebalde hormara igotzeko irrikiz hainbat eta hainbat alpinistek zanpatua. Ezker aldera egingo dugun zeharkaldi batek irtengune mixto batera eramaten gaitu eta hau zeharkatu ostean, 50º-ko malda batera atera bertatik Bujaruelo Lepora edo Col de Tentesa jaitsi ahal izateko. Ezkerrera Bujaruelora eramango gaituen bidea utzi eta eskuinetik Col de Tentes norabidean goaz, ilargi bete ikusgarri baten argipean.

Hemendik aurrera eski estazioko remonteetara jaistea besterik ez dugu, ondoren pistetik estazioko aparkalekura ailegatzeko, non ordu batzuek lehenago autoa utzi dugun. Gaua egin da eta berez baxua zen tenperatura, askoz gehiago erortzen da eta gainera elurra hasi du. Botak kendu eta denbora askoz gehiago galdu gabe autoan sartzen gara berotu asmoz, premia bai dugu. Izoztuta eta nekatuak gaude, ala ere poza izugarria da betidanik errespetu handia eduki diogun Taillon Erdiko Korridorea eskalatu ahal izan dugulako.

Datu teknikoak

  • Ibilbidea: Taillon Mendebaldeko erdi korridorea
  • Igoera data:2019-01-19
  • Kokapena:Pirinioak
  • Kategoriak : Izotz eskalada, Korridorea, Kranpoiak, Mixtoa
  • Zailtasuna:MD-
  • Harri eskaladaren zailtasuna:III
  • Korridorearen graduazioa:90º
  • Izotz eskaladaren zailtasuna:WI4+
  • Ibilbide zirkularra:Bai
  • Hasiera puntuan amaitzen da:Bai
  • Iristeko denbora:3h 30min
  • Nola iritsi:Gavarnie-Gedre eski estaziotik
  • Igotzeko denbora:4h
  • Jeisteko denbora:3h
  • Ezaugarriak:Ibilbide ikusgarria eta edertasun aparta duena, oro klasikoa.
  • Materiala:Pioletak, kranpoiak, kaskoa, 6 torloju, friend jojua, zintak, 60 m-ko bi soka
  • Egoera:Korridorea baldintza onetan zegoen eta izotz kaskadak ongi osatuak. Tenperatura oso baxua zen eta haizeak gogor astintzen zuen.
  • Garaia: Negua, Udaberria
  • IBILBIDEAREN DATU GUZTIAK IKUSI
Gureak eta beste batzuen Cookie-ak erabiltzen ditugu, webgune honen erabiltzaileen nabigazioaren analisia egin ahal izateko.
Nabigatzen jarraitzen baduzu, onartzen duzula suposatzen dugu. Nahi izanez gero, konfigurazioa aldatu edo informazio gehiago jaso ahalko duzu hemen.