Posets edo Llardana - 3.375 m.

Capra Alpina(e)k idatzia.
5531
bisita

Posets edo Punta Llardana mendiak, Pirineo mendikateko bigarren mendi garaienak, oraingoan erakarri digu. Gailurrera iristeko aukeratu dugun ibilbidea Biados aterpetxean hasten da, Forqueta edo Eriste lepotik igaroz, Llardaneta lakura jaitsi eta Canal Fonda igoz Posets gailurrera iritsi. Itzulera ertza jarraituz egiten dugu eta Llardaneta kanala jaitsiz, Biados aterpetxera iritsi. Egia esan ez da gehien erabiltzen den bidea, ez eta motxena, baina bai oso ikusgarria. Ibilbidearen zati bat hiru aterpetxeen bidetik doa (Estos-Angel Orus eta Biados), Llardaneta lakuaren ingurura bitarte.  

Gosari oparo bat egin ostean, Biados aterpetxetik atera gara GR11 ibilbidea segituz Añes Cruces eta Estos aterpetxera bidean. 10´ondoren GR11 alde batera utzi eta eskuinera doan saihesbidea hartzen dugu (kartela) eta laster batetan, egurrezko zubi batek erreka zeharkatzen laguntzen digu. 

Oso ongi markatua dagoen GR11.2 bidea segituz, kartel berri bat aurkitzen dugu pista batetara iristean. Gure ezkerretara la basa txabola eta Llardaneta kanaleko bidea uzten dugu, itzultzeko erabiliko duguna,  eta eskuinera jarraitu zelai berde eta pinu beltzeko baso batetik, gutxika bada ere, altura irabazten doan bide eder batetik.    

Estrategikoki ezarrita dauden egurrezko eserleku batzuek aurkitzen ditugu, ibilbideak sigi-sagak eginez altuera azkar batetan irabazten duenean. Iturri antzeko batek, ur-zurrut gorrixka botatzen duenak,  arreta berezia sortu digu, Incante iturria.  

40´ostean hartxingadi batera iritsi gara eta ezin bestean, zeharkatu eta bestaldeko malda igo beharrean gara. Igoera tente batek bizkar baten gainera garamatza, aran eder baten atari. Bidea goi-ibarreraino jarraitzen dugu, seinale berri bat aurkitzen dugularik. Eskuinera Millars lakuetarako bidea (2.353 m.) eta ezkerretara belar artean oso bertikala den aldapa igotzen doa.  

Harrikariak malda erdi inguruan belarra ordezkatzen du eta igoera asko zailtzen digu. Geldialdi batzuen ondoren, azkenik igotzea lortu dugu, Sahun lepoan gaude 2:10h. Lehen eguzki izpiek harrera egiten digute, eskertzen duguna. Hemendik Forqueta edo Eriste lepoa ikusgai da, baina oraindik ere nahiko urrun dago.  

Igotzen hasi garenetik GR11.2 arrastoak segika goaz. Harrikari berri bat zeharkatu beharrean gara, izoztua dagoen elurtegi iraunkor batera eramaten gaituena.  

Dagoeneko azken aldapa tente bat gelditzen zaigu Forqueta edo Eriste lepora eramaten gaituena (2.868 m.) 3:10h. Ikuskizuna paregabea da, Llardaneta lakura bereziki. Jan, edan eta atseden hartzeko geldialdi bat egiten dugu. 

Lepotik Llardaneta lakurako jaitsiera desegindako kanal tente batetik egiten dugu, arreta berezia behar duena. Zailtasunik gabe edozein labainkadak lurrera eramaterik nahi ez badugu.    

Leku ezin hobean kokatua dago Llardaneta lakua (2.675 m.). 3.000 metro goitik dituzten mendi askok inguratzen dute eta isurbidea Angel Orus aterpetxeko norabidean dauka. Oso bide erabilia, ez alperrik hiru aterpetxeko bira (Biados-Angel Orus-Estos) egiten dutenen pasabide derrigorrezkoa. Bibak ugari daude bere inguruan, zein ala zein hobe eginikoa. Lakuan amuarrainak ugari daude eta gu bertan egonagatik, arduragabe igeri eta salto egiten dute.   

Ezkerraldetik zeharkatzen dugu lakua eta isurbidera iritsi aurretik, bibak batzuen inguruan, gorantz igotzen diren hito batzuk bidetik urruntzen doaz. Canal Fondara iristeko, Posets igotzeko bide arrunta, bi aukerak onak izan daitezke. 

Gure aukera hitoak jarraitzea da, maldan gora ezkerretara Llardaneta lakuko sakanean datorren uharra parez pare jarraituz. Igoera gogor bezain tente batek, Dien Royo mendiaren oinpera eramaten gaitu, Espadas eta Posets mendiek osatzen duten zirkuaren sarreran gaude.

Behin hemen, ibilbidearen norabidea aldatu beharrean gara eta eskuinera jarraituz, deseginiko aldapa bat jaitsiz, Canal Fonda sarreran utziko gaitu. Dagoeneko Angel Orus aterpetxetik datorren bidearekin bat egin dugu, 4:30h. 

Kanalaren lehen zatia oso estua eta apurtua da, elurra ere ba du. Iristen garen ordua kontutan izanik (13:05h.) elurra ez dugu izoztua aurkitzen, baina ziurrenik lehen orduan kranpoiak erabili behar izango zituzten. Bat batean elurretik zein malda tente eta desegindutik ibiltzen goaz, igoera oso zail eginez. Kanalaren azken zatia gainditzeko, eskuinera dugun ertzera igo beharrean gara, oso zail ez dena, naiz eskuak erabiltzea behartuta izan.    

Diente de Llardaneta eta Posets artean dagoen lepoan, jende pila aurkitzen dugu, Posets igo ondoren itzulerako bidean datozenak. Elkar agurtu eta gure bidea jarraitzen dugu, gailurrera eramango gaituen azken ertzera  igoz.  .

Badirudi egun eguzkitsua erabakigarria izan dela hainbeste jendek gailur honetara etortzeko, pirineoko mendi zerrako bigarren garaiena, naiz betidanik oso bisitatua izan. Irtengune txiki bat garaitu eta malda tente eta harri soltez beteriko batetan uzten digu. Bidea oso nabarmena da, jende asko pasa den seinale, eta sigi-saga bukaezinak jarraituz azken ertzaren oinpean uzten digu.    

Zailtasun handiegirik gabe zeharkatzen dugu, gailurra gertu dagoen jakitun. Azkenik, Posets gailurrera iritsi gara (3.375 m.), 6:30h. Ikuskizuna paregabea da, ez genuen besterik espero.   

Ertz airezko bezain erraz jarraitzea da gure asmoa Posets N (3.321 m.) iritsi bitarte, ondoren  malda delikatu eta hauskor bat jaitsi ahal izateko bretxa Carrive (3.146 m.) inguru arte, Germelo Sur (3.176 m.) menditik hurbil.       

Llardaneta kanal bukaezina jarraitzen dugu eta ordu bat baina gehiago erabili  Clot pinudira iritsi bitarte. La Basa txabolara jaitsi gara eta goizean pasa garen bide gurutzera iritsi, Ribereta sakanean.   

Erreka zeharkatzen dugu egurrezko zubia erabiliz, berriz ere GR11 bidera itzuliz eta minutu gutxiren bueltan, Biados aterpetxera iritsiz (1.714 m.), 10:15h.     

Datu teknikoak

  • Ibilbidea: Posets Biados eta Forqueta lepotik
  • Igoera data:22/09/2013
  • Desnibela:1.661 m
  • Kokapena:Pirinioak
  • Kategoria : Oinezko igoera
  • Zailtasuna:F
  • Hasiera puntuan amaitzen da:Bai
  • Iristeko denbora:6:30 h
  • Nola iritsi:Biados aterpetxetik (1.714 m.)
  • Igotzeko denbora:10:15 h
  • Jeisteko denbora:3:45 h
  • Ezaugarriak:Ibilbide luze bezain polita eta zailtasunik apenas duena. Fisikoki prestatua egon behar dena.
  • Materiala:Makilak
  • Garaia: Uda, Udazkena
  • IBILBIDEAREN DATU GUZTIAK IKUSI

Erlazionatutako kronikak

Igotzen diren mendiak

Lo egiteko aterpetxeak

Natur guneak

Erlazionatutako ibilbideak

Iruzkin bat egin

Gureak eta beste batzuen Cookie-ak erabiltzen ditugu, webgune honen erabiltzaileen nabigazioaren analisia egin ahal izateko.
Nabigatzen jarraitzen baduzu, onartzen duzula suposatzen dugu. Nahi izanez gero, konfigurazioa aldatu edo informazio gehiago jaso ahalko duzu hemen.