Gran Facha

Capra Alpina(e)k idatzia.
4887
bisita

Sarra urtegia (1440 m.) 0h. Aguas Limpias erreka zubi txiki batetik zeharkatu eta pista zabal batetara aterako gara. Pixkanaka bada ere oso lasai gorantz goaz. Zelai batetara iristean, aldare eta gurutze handi bat duelarik, pista mendi bide polit batean bihurtzen da, inongo zailtasunik ez duelarik 20´.

Poliki-poliki gorantz goaz eta bi errekatxo zeharkatu beharrean aurkitzen gara, ur-jauzi eta guzti,

pagadi eder batetan sartu aurretik.

Bidexka aldapa tente bihurtzen da eta sigi-saga eginez igotzen hasi, Pico Arriel (2824 m.) bidearen hasiera ezkerretara utziz (kartel bat dago bertan), Soba aranera eramaten gaitu (1650 m.) 50´. Llano Cheto-ra iristean (1770 m.) 1h.20´, Aguas Limpias errekaren bila doan Arrieleko erreka zeharkatu behar dugu.

Estu artzen gaituen aldapa bat igotzen hasten gara eta erdigunean beste kartel bat ikusten dugu, “Arriel Lagos no Pico”, ezkerretara utziz, gure bidea jarraitzen dugu, beti ere gorantz, Aguas Limpias ur-jauzia gainditu arte.

Gainditzen dugunean, bidexka lasaitu egiten da, nahiz eta beti goranzko joera eraman, baina oso eroso goaz. Ura edozein lekuetatik irteten da. Poliki-poliki altuera irabazten goaz eta ezustean Respumoso-ko urtegiaren horma ikusten dugu. Elur-jauzi ugari erortzen dira Frodiella-ko pasabide honetan, bai negu eta bai udaberrian.

Azken aldapak urtegiaren horma gainera eramaten gaitu, bertan ermita txiki bat dagoelarik (2100 m.) 2h.15´. Bidexkak aurrera jarraitzen du urtegia zeharkatuz (ipar), baina laster ezkerretara okertuz berriz ere gorantz hasten da. Respumoso-ko aterpetxera berantz joanez iritsiko gara (2150 m.) (FAM, 105 ohe eta urte guztian irekita, tel. 943337556) 2h.30´.

Aterpetxetik atera eta GR11 bidea jarraituz, Campoplano lakura iristen gara (2140 m.) 2h.30´eta hegoaldetik zeharkatzen dugu.

Lakutik irteten den erreka txuloa zeharkatu beharrean gaude (batzuetan asko kostatzen da) eta ondo markatutako bidetxur bat jarraituz pixkanaka bada ere gorantz goaz (ESE). La Facha-ko lakutik datorren erreka beti gure ezkerretara eraman behar dugu. Uztailean ere elurtuta egoten den aldapa gogor batek,

La Facha-ko beheko lakura garamatza (2515 m.) 4h.

Ezkerretik zeharkatuko dugu (S) eta bidetxur arrastoak dituen aldapa ezegonkor eta tente bat igoz, inongo zailtasunik gabe, La Facha-ko lepora eramango gaitu.

Bide arrastoak zuzenean igotzen dira hegorantz ezegonkorra den aldapa batetik. Gutxika bada ere, altuera irabazten goaz eta eskuak erabiltzea beharrezkoagoa egiten da (I). Edozein lekutatik daude bide arrastoak eta zalantzak sortzen dizkigu, dena den,denak ere gailurreko ertzera garamatza.

Arroka oso ezegonkorra da eta harri jausiekin kontu handiz ibili behar da. Mercadau isurialdean igotzen dugu azkeneko irtengunea (I) eta gailurreko ertzera helduko gara.

Bretxa batera jaitsi beharrean aurkitzen gara ondoren, gailurreko ertza jarraituz bigarre bateraino helduz (I) eta hemendik aurrera laua eta zorrotza bihurtu den ertza iraganez La Facha-ko gailurrera iritsiko gara (3006 m.) 5h.40´. Bertan Ama Birjinaren irudi bat dago ermita txiki baten barruan eta sinadura liburu bat.

Bertan dagoen plaka batek ala dio “In memoriam-Louis Prágnere, capellán de la montaña 1877-1965“.

Ertzetik jarraituz gero medailoi bat aurkituko dugu: “Francis Lagardère 1922-1943“.
Gailurretik dugun bista ikusgarria da hainbat alderdiren erdian aurkitzen baita, Bachimala, Respumoso eta Mercadau. Bertatik hiru mendi garaienak ikusten dira, Balaitous (NO), Infiernos (SSO) eta Vignemale (ESE); Hauez gain, Frondiella, Llana Chantal, Campo Plano, Cambales eta Cristales, gailur zerrenda luze baten adibide dira.

Jaitsiera igo dugun bide berdinetik egingo dugu.

Datu teknikoak

  • Ibilbidea: Facha Handia Sarrako urtegitik
  • Desnibela:1630 m.
  • Kokapena:Pirinioak
  • Kategoria : Oinezko igoera
  • Zailtasuna:F
  • Iristeko denbora:5h40´
  • Nola iritsi:Sallent de Gallego-tik km. 1 bidez eta beste 4 km. pistaz. Sarra-ko urtegia (1438 m.).
  • Igotzeko denbora:9h.40´
  • Jeisteko denbora:4h.
  • Ezaugarriak:Piramide forma duen mendi dotorea, uda partean oso bisitatua eta elurra egonez gero tentagarria.
  • Materiala:Ez dugu ezer brezirik behar, nolaz kaskoa eramaten ez dugun harri erorketen arriskuengatik. Negu eta udaberrian beharrezkoak izango ditugu pioleta eta granpoiak.
  • Garaia: Uda, Negua, Udazkena, Udaberria
  • IBILBIDEAREN DATU GUZTIAK IKUSI

Erlazionatutako kronikak

Igotzen diren mendiak

Lo egiteko aterpetxeak

Natur guneak

Erlazionatutako ibilbideak

Iruzkin bat egin

Gureak eta beste batzuen Cookie-ak erabiltzen ditugu, webgune honen erabiltzaileen nabigazioaren analisia egin ahal izateko.
Nabigatzen jarraitzen baduzu, onartzen duzula suposatzen dugu. Nahi izanez gero, konfigurazioa aldatu edo informazio gehiago jaso ahalko duzu hemen.