Alquezár-Asque Vero Ibaiaren pasareletik

Capra Alpina(e)k idatzia.

2605
bisita

Sierra y Cañones de Guara Parke Naturalean eta Somontano de Barbastro eskualdean, Vero ibaiaren eskuin aldean eta Balcez eta Olsón mendi zerraren oinpean, erdi arokoa den Alquezár herria aurkitzen da. Gune berezia benetan xenda ugariz zeharkatua eta fauna eta flora ezberdinez betea eta non, Vero ibaiaren pasarela ibilbidea nabarmentzen den.

Gure ibilbidea Alquézar herrian hasten dugu eta San Miguel eleizaren aurretik pasaz, Santa Maria Kolegiata Gaztelu oinpera igotzen gara. IX mendean Jalaf ibn Rasid-ek gaztelua eraikitzeko agindua eman zuen eta Basbastro-ko jendea Sobrarbe-ko kristauetatik babesteko gune garrantzitsuena bihurtu zen. Alquezár-ko plaza handira gerturatzen gara non Vero pasarelaren ibilbide hasiera aurkitzen dugun, harrizko malda tente bat eskuinetik beerantz etengabe doana, Peña Castibián ezkerrean eta Alquézar Colegiata-ko hormak eskuinean izanik.

Kareharri leuneko xenda nabarmena La Fuente Sakanean murgiltzen doa, non zulo ugariz beteriko hormak aurkitzen diren, hegazti eta harraparien babesgune paregabea eginez eta non sai arreek ugariek diren. Lehen egurrezko pasarelak laster aurkitzen ditugu, batzuek besteak baina askoz tenteagoak eta 2.002 urtean eraikiak. Zazpi pasarela eta eskailera zatiz osaturiko gune honek, Vero ibaira zuzenean eramango gaituzte.

Behin ibaira inguratzean oso nabaria den saihesbide bat aurkitzen dugu eta ezkerretik jarraituz arazorik gabe Picamartillo leizera eramango gaitu. Vero ibaiaren uren higadurak eginiko zulo ikusgarri bat dugu eta bertara oinez iritsi gaitezke. GR 1.1 berriz, uretatik lau bat metro goitik, eskuin aldeko horman aurkitzen den pasarela metaliko batetik jarraitzen du.

Naiz neguan gauden ibaiaren ur-emaria ez da oso handia eta horrek, ibilaldiari ikusgarritasuna kentzen dio. Hormaren orografiaren ondorio pasarelak ainbat lekuetan asko estutzen dira eta gune batzuetan motxilak ere traba egiten digute eta makurtuta pasatzea behartzen gaituzte. Minutu batzuen ondoren presa txiki batera ailegatzen gara, non beste garai batetan irin-errota batera ura desbideratzeko erabiltzen zuten. Bertan ura baretzen da eta putzu natural bat sortu, non uda garaian bainu bat hartzeko gonbidatzen digun.

Erreka zati honetan eta behin lehen pasarela tartea atzen utziz, errekaren eskuin aldetik aurkitzen dugun xenda zabal batetik ibiliz goaz harri bloke handi batek bidea ixten digun arte. Xendak jarraipenik ez duela pentsatzen dugunean, hau lur azpian sartzen da eta zulo natural bat medio, bloke handiaren beste aldean ateratzen da.

Berriz ere sakana estutzen da eta ibaiak horma bertikalen artean bere jaitsiera jarraitzen du, ikusgarri arrokaz arroka salto eginez. Berriz ere pasarelak ageri zaizkigu eta altura handiagoan daudenez aurrekoak baina askoz ere airezko eta zirraragarriagoak dira, zati hau ibilbideko erakargarriena eginez. Gutxika bada ere Alquézar-ko zentral hidroelektriko zaharrera iristen gara.

Gorantz doan pista batetik jarraitzen dugu, ezkerretik 2016 urtean eraiki zuten pasarela zati berriko saihesbidera iristea lortuz, baina gure etsipenerako itxia aurkitzen da. 2016 urteko azaroan eginiko euriteek sortu zituzten lur jauzien ondorioz, 225 metroko pasarela berri honen pasartea itxia aurkitzen da eta hori dela eta, ibilbide zaharra Somontano Bide Naturalarekin elkartzen den lekuraino jarraitzea beharturik gaude, non Vero ibaiko pasarela berri eta airezko-ei begira plataforma metaliko bat aurkitzen dugun.

Puntu honetatik Alquézar herrira itzuli genezake eta era honetan 2,5 km eta 1:00h iraupeneko ibilbide borobila amaitu, horretarako aldapan gora egin beharko genuke eta San Miguel eleizara inongo zailtasunik gabe iritsi. Dena den guk GR 1.1 Alquézar-Asque ibilbide berritik aurrera jarraitzeko asmoa dugu eta Fuentebaños zubira norabidean Somontano Bide Natural berritik jaisten gara.

Fuentebaños izenak zer ikusia du ibaiaren beheko zatian aurkitzen den iturriarekin. Bertan ura beti tenperatura berdinean ateratzen da eta neguan bero ateratzen den irudipena ematen du. Horregatik erdi aroko hainbat idatzietan iturria Fontes Caldas izenez agertzen da. Zubi honek inguruan dagoen errotarekin zer ikusi estua du, bera bai zen ibilbide segurua eta bertatik igaro beharra zuten zerealez beteriko zamariak ibaia hazita jaisten zenean.

Behin beste aldean Lumos sakanean barneratuz xenda balizatu bat gorantz jarraitzen dugu eta minutu batzuek geroago pista zabal batetik xenda alde batera utzi eta sigi-saga ugariez ibilbideko puntu gorenera iristen gara (698 m), non Alquézar herrira dagoen behatoki ikusgarri bat aurkitzen den. Egin berri dugun ibilbidea, errotaraino jaisten dena, mendeetan zehar ehoketa garaian jende eta abere ibilbide etengabea izan zen. XII mendean zehar Alquezár merkatari eta artisau bilgune bihurtu zen, astero azoka ospatzeko pribilegioa bai zuen.

3 km zehar pista zabal batetik ibiliz goaz, Somontano de Barbastro Bide Naturala eta GR 1.1 partekatzen dutena, arte, olibondo, almendrondo, erkametz ,… artetik, Asque herrira iritsi bitarte. Herri txiki hau Colungo udalerriko partaide da eta Vero ibaiaren Parke Kulturaleko bihotzean aurkitzen da, Guara Mendizerra barnean.

Asque eta Alquezár 5,6 km banantzen dituzte, 354 m desnibel positibo eta 275 m desnibel negatiboarekin eta 2:15h-koa da itzulerako denbora estimatua. Alquézar herrira itzuli ahal izateko beste aukera bat Somontano de Barbastro Bide Naturala jarraitzea izango litzateke, Vero ibaia Villacantal zubiaz zeharkatuz, baina ibilbide hau beste batetan adieraziko dizuegu.

Datu teknikoak

Ibilbidea: Alquezár-Asque GR 1.1-tik
Luzera:5600 m.
Desnibela:275 m.
Kokapena:Pirinioak
Kategoria : Oinezko igoera
Zailtasuna:F
Hasiera puntuan amaitzen da:Bai
Iristeko denbora:2:30 h
Nola iritsi:Alquezár herria Huesca hiriburutik 48 km-ra eta Sierra y Cañones de Guara Parke Natural barruan aurkitzen da.
Igotzeko denbora:4:45 h
Jeisteko denbora:2:15 h
Ezaugarriak:Altuerari beldurra diotenentzako ez oso gomendagarria, umeekin joan ezkero kontuz iobili behar eta kontutan izan ibaiaren ur kopurua.
Materiala:Makilak
Garaia: Uda, Negua, Udazkena, Udaberria
IBILBIDEAREN DATU GUZTIAK IKUSI