Allalinhorn 4.027 m.

Capra Alpina(e)k idatzia.
4139
bisita

Teleferikoak eta kremailera trenak familia giroan igotzeko mendi erraza eta erosoa egiten dute Allalinhorn. Dena den, zailtasun teknikorik azaltzen ez badu ere, dituen 4.027 m. ezin bestean behartzen digute arriskuak saihestea eta enkordamentu glaziarreko protokoloa martxan jartzea.

Azken egun berezien ondoren, Zinalrothorn, Monte Rosa eta Cervino igotzeko aukera izan dugularik; mendi eroso eta planifikazio asko beharrik ez duen bat familia giroan igotzeko asmoa dugu. Horretarako Suitzako Saas Fee 1.792 m. herrira gerturatzen gara, Saas haranean, herri sarreran kotxea uzten dugularik, galarazita baitago herrian kotxez ibiltzea.
Saas Fee, “Alpetako perla” ezizenarekin ezaguna dena, 4.000 m. goitik dituzten 13 mendiz inguratua dago.

Teleferikoan igo eta 15´barru Felskinn (2.991 m.) geltokira iritsi gara. Jarraian metro alpinoa artzen dugu Mittel Allalin (3.500 m.) geltokira iristeko, bertan munduko jatetxe biratzaile altuena aurkitzen delarik.

Hiru kordada osatu ditugu eta behar bezala lotu eta gero, eski pista batetatik zehar ateratzen gara hegoaldera norabidean. Kontu handiz ibili behar gara ez badugu eskiatzaileren batek harrapatzerik nahi, ziztu bizian pasatzen baitira gure ingurutik. Behin pistetatik kanpo, elurretan oso nabaria da bidea eta ipar-ekialdeko ertza eskuinetik zeharkatzen doa. Aurrera goazen heinean, aldapa tenteagoa jartzen da eta azkar batetan altura harrapatzen dugu. Beherantz datozen beste kordada batzuekin topo egiten dugu, gu baina lehenago atera direnak noski eta dagoeneko bueltan datoztenak.

Oinpean pitzadura ireki bat duen 4 metroko koska baten aurrean gaude geldirik Enara eta ni, urteetan aurrera doan emakume bat beherantz baitator. Arraroa da, baina bakarrik dabil. Ez dugu oso eroso jaisten ikusten eta zerbait gertatuko zaion beldurrez, adi gaude. Gu konturatzerako kranpoiekin estropuz egiten du eta buruz behera abiatzen da pitzadurara. Nola edo ala heltzea lortu dugu zuloan sartu aurretik eta asko kostatzen bazaigu ere, zutik jartzea lortu dugu. Emakumeak biziki eskertzen digu gure laguntza.

Sustoaren ondoren, gure bideari jarraitzen diogu Fee glaziarreko azken zatia igoz eta Feejoch (3.822 m.) lepora ailegatuz. Bertatik, Valaiseko tontorren ikuskizuna aparta dugu (Cervino, Lyskamm, Breithorn, Castor, eta abar). Behin denok elkarrekin, ibilbideari jarraitzen diogu sigi-saga batzuek eginez, desnibel handiko maldak igo asmoz. Haizeak gogor astintzen digu eta hotza nabaria da. Gutxika bada ere, borobildua ikusten den tontorrera gerturatzen goaz, eskuinera zeharkaldi bat egin eta azken ertza irabazi asmoz. Estua eta aereoa. Gailurrean burdinezko gurutze bat dago harrizko tontor baten gainean (4.027 m.).

Egun ederra eta ikuskizuna zoragarria. Paisai eder hauek ikusi ahal izateko honaino etortzeak merezi izan du. Urrunean Mont Blanc ikusterik dugu, aurreko urtean igotzeko aukera izan genuena.
Argazki batzuk atera ditugu eta hotz handia egiten jarraitzen duenez, jaistea erabakitzen dugu Felskinn kafetegiko terrazara, bertan jan eta egindako famili igoera ederraz gozatzeko asmoz.

 

Datu teknikoak

  • Ibilbidea: Allalinhorn Mittel Allalin-etik
  • Igoera data:11/08/2013
  • Desnibela:550 m.
  • Kokapena:Alpeak
  • Kategoriak : Kranpoiak, Oinezko igoera
  • Zailtasuna:F
  • Hasiera puntuan amaitzen da:Bai
  • Iristeko denbora:2:00 h / 2:30 h
  • Nola iritsi:Saas Fee herritik (1792 m.) Felskinn geltokira (2991 m.) iristen den teleferikoa artu eta segidan metro alpinoa Mittel Allalineraino (3500 m.).
  • Igotzeko denbora:4:00 h
  • Jeisteko denbora:1:30 h
  • Ezaugarriak:Zailtasun teknikorik ez duen mendi bat izan arren, ezin dugu ahaztu glaziar bat zeharkatu behar dugula, zein bere garaiera.
  • Materiala:kaskoa, kranpoiak, soka eta pioleta.
  • Garaia: Uda
  • IBILBIDEAREN DATU GUZTIAK IKUSI
Gureak eta beste batzuen Cookie-ak erabiltzen ditugu, webgune honen erabiltzaileen nabigazioaren analisia egin ahal izateko.
Nabigatzen jarraitzen baduzu, onartzen duzula suposatzen dugu. Nahi izanez gero, konfigurazioa aldatu edo informazio gehiago jaso ahalko duzu hemen.