Besiberri ertz integrala

Capra Alpina(e)k idatzia.
241
bisita

Besiberri mendigunea Alta Ribagorza eskualdean aurkitzen da, Aigüestortes eta Lago San Mauricio Parke Naturaleko muga inguruan. 2 km baino luzeago den ertzak iparretik hegora hirumilako batzuek lerrokatzen ditu. "Ipar Besiberri piramide igoera pirineoko 10 ederrenetakoen artean sailkatu daiteke", beti ere, Club Alpin Français eta Asociación Randonnées Pyrénéennes aholkulari teknikoa izan zen  Georges Véron-ek zionez (1933-2005), Guía montañera 100 cumbres de los Pirineos liburuan.

Conangles aterpetxetik (1.560 m) atera eta hego aldetik GR-11 ibilbidea jarraituz pagaditik zehar ibiliz goaz. Gurutz bide batekin topo egitean, GR-11 eskuinean utzi eta ezkerrera eginez gorantz hasten gara. Laister ur jaizu dotore batekin topo egiten dugu eta goraxeago, hormigoizko zubi batetik uharra beste aldera zeharkatzen dugu. Pinuditik gora bide arlosatuak egiten dituen sigi-saga ugariek segiz, L´Estanyet lakura (1.980 m) iristen gara.

Lakua ezker aldetik zeharkatuz, gure norantzako eskuina, Besiberri aranean sartzen gara. Urrutian aterpetxea eskuineko muino baten gainean ikusten dugu eta bide nabaria jarraituz, bertara inguratzen gara. Refugio Estanyet de Besiberri (2.200 m) 2.001 urtean zabaldua.

Besiberri aterpetxea ezkerretik gainditu eta Collada d´Abellers (SE) lepora doan xenda nabaria eskuinean utziz, gorantz jarraitzen dugu (ENE). Ez dago xenda arrasto handirik bainan hitoak jarraitzen saiatzen gara. Tuc dera Canau de Rius (2.813 m) mendira norantzan goaz eta zirkura daraman kanalean bete betean sartu aurretik, eskuin horma azpitik hego-ekialdera bira egiten dugu.

Granito bloke eta plaka etzan artetik, Ipar Besiberrik ezkerrean duen ertzera norabidean nabari ikusten den lepora bidean goaz, beti ere, ikusten ditugun hitoak jarraituz. Behin lepoan, ertzera igo eta hasten dira zailtasun teknikoak. Naiz 30 metroko bi soka ekarri ditugun, arinago joan asmoz ez lotzea pentsatu dugu, naiz rapelak egitego erabiltzen ditugun.

Behin eta berriz zeharkaldiak egin beharrean gaude, gora eta behera egiten dugun bitartean. Bat batean zeharkaldiak tximinia tente batera bideratzen gaitu eta hau gainditu ostean, ertzera itzultzen saiatzen gara. Zuzenean tximinia honetatik igoz eta ez ezker lepora, beste aukera bat izango litzateke lanak erraztu eta denbora irabazi ahal izateko.

Granito kornisa batzuek gaindituz orratz tente batekin topo egiten dugu, Besiberri bailaratik gaindituz. Zeharkaldiekin jarraitzen dugu eta bat batean pitzadura batera iristen gara non 20 metroko eroria duen. Zinta bat aurkitzen dugu bainan mailoirik ez duen arren begite bat du, rapela egin daitekeen seinale. 

Behin pitzaduraren sakonean, berriz ere altuera irabazi beharrean gara aurrera jarraitu ahal izateko eta ertzera itzuli. Plaka tente batzuetatik igoz, ertzaren hego-mendebaldetik Ipar Besiberri tontorrera iristen gara (3014 m). 4:30h.

Jaitsierako lehen zatia Riumalo aranetik egiten dugu hormari ondo itsasirik eta pausoak seguru emanez. Aran honetara ere eroria itzela bai da, beraz ezin dugu utsik egin. Hitoak jarraituz lehen pitzadura batera iristen gara, non aurrera jarraitu ahal izateko orratz bat gainditu beharrean gaude. 

Orratza Besiberri aranetik igotzen dugu, hasieran plaka tente bat du eta erdi erdian hiltze bat, bainan eskuin aldean duen pitzadura txiki batetik gainditu daiteke, ondoren ezkerrera lau metroko zehalkadia plaka gainetik eginez, berriz ere, eskuinetik gora jarraitu ertzera itzultzeko (III+).

Jarraian zeharkaldiak bata bestearen atzetik datoz eta geienetan bezala, Besiberri aranetik hitoak jarraituz bidea egoki jarraitzeko aukera dugu. Pitzadura berri batera iritxi gara non rapela egiteko zinta bi dauden. Destrepatu daiteke bainan guk 20 metroko rapela egiten dugu. 

Ondoren ibilbideak bi bloke artetik jarraitzen du eta bereala beste pitzadura txikiago batekin aurkitzen gara. Honek 12 metro izango ditu eta hemen ere zinta bi daude rapela egin ahal izateko, naiz hau ere saihestu daitekeen. 

Rapelaren ondoren ertza irabazten saiatzen gara eta horretarako orratz berri bat igo beharrean gaude. Hau gainditu ostean behera jaitsi eta zeharlaki batek Pic Simó (2.993 m) gailurraren oinpera eramaten gaitu.

Hau gainditu ostean ertza jarraitzen dugu eta dagoeneko zailtasunik gabe, Pic Jolis gailurra hego aldetik irabazten dugu (2.995 m). Pic Simó eta Pic jolis, aldi berean Doble Ressalt edo Besiberri de Mig bezala ezagutzen dira. Hitoa. Garai batetan hirumila metroak gainditzen zituztela pentxatzen bazen ere, Catalunya Cartografic Institutoak 2.994,92 m-ko altuera zutela zehaztu zuen. 6:00h.

Hemendik aurrera ertzeko zailtasunak asko jaisten dira eta Hego Besiberri gailurra bitarte Riumalo aranetik joango gara. Hitoak jarraituz eta terraza txikiez baliatuz altuera galtzen goaz. Aran honetatik gailurra irabaztea errazagoa denez, bide arrasto ugari ikusten ditugu, denak ere ibilbide errazak izanik. 15 minutu nahikoak ditugu Pas de Tres Cases lepora (2.909 m) iristeko. 

Ezkerretik jarraitzen dugu Hego Besiberri malden bila. Behin bere oinpera iristean, tximinia nabari bat duela ikusten dugu, bitan banatuko balu bezala. Pixkanaka tximinia bila goaz eta azken metroetan harriari heldu beharrean bagaude ere (II), erraz gainditu eta gailurrera ailegatzen gara, Hego Besiberri (3.030 m). Hitoa. 6:35h.

Comaloformo gailurra bila goaz, ertzetik bloke handien artetik behera eginez. Behín lepoan hego-ekialde norabidean jarraitzen dugu malda ugariz altuera irabaziz. Hemen ere zehalkaldiak bata bestearen atzetik datoz eta arroka oso segurua ez denez, tentu handiz joan behar gara. 

Naiz tarteka eskuak erabili beharrean gauden (II/II+), hitoak jarraituz azken malda batek, inongo zailtasunik gabe Comaloformo gailurrean uzten gaitu (3.029 m). Plaka eta Hitoa. 7:00h.

Bertatik ikuskizuna aparta da eta egin berri dugun ertza nabari ageri zaigu. Ala nola, Aneto, cresta Salenques-Tempestades, Ballibierna, Rusel, Maladeta, Mullères eta beste hainbat gailur.

Jaitsiera Hego Besiberri lepora bitarte bide berdinetik egiten dugu eta ondoren, Hego Besiberri maldan behera jarraitu Collada d´Abellers lepora doan xenda nabaria erabiliz. Lepo hau Hego Besiberri eta Pic d´Abellers (2.985 m) artean aurkitzen da. Bertatik artxingandi luze bezain tente bat jaitsi beharrean gara, non harri ugari maldan behera botatzen ditugun. Nahi eta ez kontu handiz ibili beharreko pasartea dugu hau. 

Behin harrikarian granito bloke ugari artetik zeharkaldi luze bat egin beharrean gaude, ertzetik egin dugun ibilbidearen pareko bainan kontrako norabidean, beti ere hitoen laguntzari esker. Altuera galtzen goazen neurrian blokeak desagertzen doaz eta belarra agertzen. Kostata bainan Estanyet de Besiberri aterpetxera eta oinpean duen lakura inguratu gara. Dagoeneko helburua lortzeko gertuago gaude.

L´Estanyet lakura jaitsi eta ezker aldetik zeharkatuz, Vielha aranera erortzen den azken maldara iristen gara. Hemendik aurrera dena beruntz dugu eta 10:50 ordu eta gero, berriz ere, Vielha-ko aisialdi gunera iristen gara eta jarraian Conangles aterpetxera, txangoa bukatutzat emanez.

Datu teknikoak

  • Ibilbidea: Ipar Besiberri Besiberris ertz osoa
  • Luzera:15.470 m.
  • Desnibela:1.952 m.
  • Kokapena:Pirinioak
  • Kategoriak : Ertza, Eskalada klasikoa
  • Zailtasuna:AD- (Ibilbide luze eta airezko)
  • Harri eskaladaren zailtasuna:III+
  • Ibilbide zirkularra:Bai
  • Hasiera puntuan amaitzen da:Bai
  • Iristeko denbora:4:00h
  • Nola iritsi:Vielha tunelaren hego sarrera ondoan aurkitzen den Conangles aterpetxetik eta L´Estanyet de Besiberri lakutik (1.980 m)
  • Igotzeko denbora:3:30h
  • Jeisteko denbora:3:20h
  • Ezaugarriak:Ibilbide luze bezain airezko, prestaketa fisiko egokia eskatzen duena
  • Materiala:30 m-ko soka bi
  • Garaia: Uda
  • IBILBIDEAREN DATU GUZTIAK IKUSI
Gureak eta beste batzuen Cookie-ak erabiltzen ditugu, webgune honen erabiltzaileen nabigazioaren analisia egin ahal izateko.
Nabigatzen jarraitzen baduzu, onartzen duzula suposatzen dugu. Nahi izanez gero, konfigurazioa aldatu edo informazio gehiago jaso ahalko duzu hemen.