Mª Jose Aller Korridorea - 550 m. D+

Capra Alpina(e)k idatzia.
670
bisita

2018ko azken eguna da. Beste urte bat bukatzear dago eta azken egun hau, gehien atsegin duguna egiten bukatu nahiko genuke. Tena Aranera gerturatu gara, oroitzapen onak ekartzen dizkigun lurra, Peña Telera-ko ipar horma ikusgarrian zutitzen diren hainbat korridoretako bat eskalatu asmoz. Maria Jose Aller korridore ikusgarria dugu helburu. Duen igoera lerro mehe eta harroa, irtengune bertikal eta izoztuak, betidanik gure arreta izan duten arren, errespetu handia sorrarazi digute.

Goizeko 6:00-rak dira eta termometroak -3º adierazten du. Goiza oso hotza da eta kotxeko kristaleko izotza kentzea asko kosta zaigu. Kilometro batzuen ondoren Piedrafita de Jaca, herri txiki bezain politera iritsi eta atzean utziz, Parque Faunistico Lacuniacha aparkalekura iritsi gara. Kotxetik nagi xamar atera eta berehala tenperatura epelagoa dela konturatu gara. Baliteke gaur zortea izatea. Pistan gora Telera aterpetxe zaharrera bidean eguna argitzen hasi da eta bat batean, Peña Telera ikusgarria bere osotasunean agertu zaigu, lehen eguzki izpiek gorriztatua.   

Behin pista atzean utzi eta korridore oinpera iritsiz, kranpoiak jazteko baliatu eta sarrerara bideratzen gara. Nahiz eta abenduaren 31 den, elurra 1.800 m-tik gora aurkitzen da. Maldak hasiera honetan 50º ditu eta geroago 60º iristen da. Poliki igotzea behartzen digu eta hori dela eta, bukaezina dela irudipena dugu.  

Elurra egoera ezin hobean aurkitzen dugu, tenperatura ez da oso hotza eta gainera haizerik ez dabil, garai honetan harritzekoa bada ere. Gutxika desnibela jaten goaz sokaz lotu beharrik izan gabe, lehen zailtasunera iritsi bitarte, 4/5 metroko izotz irtengune txiki bat. Goitik erortzen diren harri eta izotz puskak harrapatu ez gaituzten eskuin horman lehen bilkura egiten dugu.

Lehen luzea hasi dugu, ezkerretik eskuinera doan estugunea, harri eta izotz puska ugari erortzen diren inbutu bat dirudi, eskerrak bilkuragunea babesean dagoen, bestela batek daki. Igoera segurtasuna mermatzearren osotasunean sartzen den torloju bat jarri dugu, ondoren malda zabal eta zailtasunik ez duenetik jarraitu ahal izateko, bigarren bilkura kokalekura iristeko. Bilkura bi friend erabiliz ezker horman antolatzen dugu. 

Bigarren luzeak ez du inongo zailtasunik eta lasai ensanblen egiteko aukera dugu. Hirugarren bilkuragunea oso bitxia da, kobazulo batean aurkitzen baita. Bilkura kobazuloko barnean egina dago, baina ezin bestean zinta luze bat beharrezkoa dugu sarrerara iritsi eta sokalaguna ikusi ahal izateko.

Hirugarren luzea izotz kaskada tente batekin hasten da, kristal hutsa dirudiena. Kranpoi eta piolet puntak apenas sartzen dira. Eskerrak torlojuak oso erraz sartzen diren eta horrek segurtasun puntu bat ematen digun. Izotz horma oso bertikala da, 80º gutxienez izango ditu eta segurtasunez, lehen torloju bat erdi aldean eta bigarren bat goi aldean sartzen ditugu. 

Behin kaskada gaindutu eta gune lasaiago batera iristen gara, non korridorea berriz ere zabaltzen den eta aurrera egin ahal izateko zailtasunik ez dugun, batez ere elurra egoera onean baitago. Tenperatura atsegina izaten jarraitzen du, zeruak kolore urdina mantentzen du eta eguzki izpiek Midi d´Ossau, Palas, Infiernos, Garmo Negro, Argualas,... argitzen dituzte. Beste 30 metro jarraitzen ditugu, sokak ematen duten guztia, ezker hormara iristea lortuz, non bi friend erabiliz laugarren bilkura egiten dugun.

Bilkura gunetik atera eta handik gutxitara 10 metroko izotz irtengune berri baten oinpera iristen gara. Ezker hormaren zulo batetan zinta bat aurkitzen dugu eta segurtasun handiagoz irtenguneari ekiteko express bat aingiratzen dugu. Konbenzimentu handiz igotzen gara. Horma eskalatzen uzten da, 70ºtan hasten da, baina altuera irabazi ahala, etzaten joaten da. Badaezpada goiko aldean torloju bat sartzen dugu. 

Irtengune hau gainditu ostean, ezkerrera jarraitzen du eta irtengune misto txiki zein zail bat, harri bloque bat erdian duena gainditu ostean, berriz ere korridorea zabaltzen da. Nahiz eta oso tentea den, elurraren kondizio onari esker tarteko altura erraz irabazten dugu. Sokaren 60 metroak agortu bitarte jarraitzen dugu, eskuinean ikusten dugun bilkunea pasa, eta ezker horman bi iltze dituen beste bat erabiliz bostgarren bilkura egiten dugu.

Urrengo luzea, bertikala bada ere, zailtasun teknikorik ez du eskaintzen eta hori dela eta, eskalada denbora murriztu ahal izateko, ensanblean igotzea erabaki dugu. Ezker hormaren inguruan gune eroso bat aurkitu dugu, azken zailtasun garrantzitsuaren oinpean. 30 metro ditu azken irtengune mixtoak, eta bertan seigarren bilkura egiten dugu.  

Irakurri dugunarekin luzeari errespetu handiz ekiten diogu. Ezker hormari itsasirik elur mingain batetik igotzen hasten gara, lehen arroka gunera bitarte, non lehen iltze bat aurkitzen dugun. Arroka erabat hautsia dago eta hori nahikoa ez balitz oso hotza dago ere. Kranpoiak seguruenik elur eta izotz gehiagorekin askoz ere baliatsugoak lirateke. Express bat bertatik pasa eta dozenerdi bat pauso elurtua dagoen koska estu batetik, eskuinera zeharka egiten dugu. 

Ondoren ezkerrera biratu eta utziko ez dugun gorako bide zuzenari ekiten diogu. Bigarren pitoi bat aurkitzen dugu non denborarik galdu gabe zinta bat pasatzen dugun. Metro batzuek gorago beste pitoi bat aurkitu dugu eta bertan segurtatzen gara. Igoera ederki babestua dago, uste genuena bainan hobe, dena den elur geruza txiki bat izango baluke seguruenik pitoiak ezin ikusi geratuko lirateke. Irtengunearen goi aldera iritsi gara eta berriro ere elurra eta izotza ageri dira. Pioletak sendo sartu eta besoetatik tira eginez gune eroso batera iritsi eta metro batzuek gorago, ezker horman zazpigarren eta azken bilkura egiten dugu.

Hain tenteak ez diren azken 30 m falta zaizkigu bukaerako erlaitzera iritsi ahal izateko eta korridore ikusgarri honen eskalada bukatutzat emateko. Azken lau ordutan ikusi ez dugun eguzkia, beldurti ageri da maldaren goi aldean eta bertara goaz denborarik galdu gabe, bere izpien berotasuna beharrezkoa bai dugu. Hasi aurretik errespetu handia bagenion, eskalatu ondoren poza izugarria da. Gogoz ospatzen dugu, urtea bukatzeko modu egokiagorik ez dago. Arratsaldeko 15:30h da. 

Momentuaz gozatu eta argazki batzuk atera ondoren, sokak bildu eta Maribel korridorearen irtera ondotik pasa gara, non orain urte batzuek bertatik igotzeko aukera izan genuena. Capullo gailurra zeharkatu eta rapelatu asmoz Y korridorera iristen gara. Haize zakarrak hartu gaitu eta rapel muntaia egiten pasa dugun denboran izoztuak gelditu gara. Lehen 60 m-ko rapela egin eta soka jasotzeko garaia iritsi zaigu, bigarrena egin asmoz, baina sokari tira arren hau ez dator behera. Saiatu gara bainan alferrik eta ezin bestean, igo eta askatzea behartuak gaude. 

Erraza ez gertatu arren eta denbora asko galdu eta gero, soka berreskuratu dugu. Lehenbailehen bigarren rapel muntaia egin eta ahalik eta azkarren jaisten saiatzen gara, gaueko ilunak harrapatu aurretik. Bigarren rapela eta gero oraindik jaitsiera asko geratzen zaigu eta denborarik galdu gabe, kranpoiak sendo sartu eta maldan behera abiatzen gara. 19:10 h-tan Parque Faunistico Lacuniacha aparkalekura iristen gara, azken ordua ilunpean ibili ondoren. Kotxea hartu eta etxera bidean jartzea besterik ez zaigu geratzen, urte zahar afarira iritsi ahal izateko. 

Datu teknikoak

  • Ibilbidea: Peña Telera Mª Jose Aller korridorea
  • Igoera data:2018-12-31
  • Luzera:13.500 m.
  • Desnibela:1.339 m.
  • Kokapena:Pirinioak
  • Kategoriak : Korridorea, Mixtoa
  • Zailtasuna:D+
  • Harri eskaladaren zailtasuna:IV
  • Korridorearen graduazioa:80º
  • Izotz eskaladaren zailtasuna:WI3
  • Luze kopurua:7
  • Ibilbide zirkularra:Bai
  • Hasiera puntuan amaitzen da:Bai
  • Iristeko denbora:3:00 h lehen bilkunera
  • Nola iritsi:Parque Faunistico Lacuniacha aparkalekutik
  • Igotzeko denbora:3:30 h korridorea
  • Jeisteko denbora:3:00 h
  • Ezaugarriak:1.800 m bitarte elurrik ez dugu aurkitu eta hori dela eta, gerturatzea harrikarian zehar egin behar izan dugu eta hori askoz ere nekezagoa egin zaigu
  • Materiala:Pioletak, kranpoiak, friend jokua, 2 edo 3 izotz torloju eta 60 metroko soka bi
  • Egoera:Korridorea egoera onean, naiz elur faltak azken irtengunea agerian utzi duen
  • Garaia: Negua
  • IBILBIDEAREN DATU GUZTIAK IKUSI
Gureak eta beste batzuen Cookie-ak erabiltzen ditugu, webgune honen erabiltzaileen nabigazioaren analisia egin ahal izateko.
Nabigatzen jarraitzen baduzu, onartzen duzula suposatzen dugu. Nahi izanez gero, konfigurazioa aldatu edo informazio gehiago jaso ahalko duzu hemen.