Collarada - Ipar-mendebaldeko korridorea (PD-)

Capra Alpina(e)k idatzia.
2862
bisita

Collarada (2.883 m) Aragon ibai aranean dagoen mendirik garaiena dugu eta mendebaldeko pirineoko bigarrena, metro bakar bategatik bada ere, Midi d´Ossau-ren atzetik. Aragon ibaiko arana Jacetaniako ardatza da eta bertatik, pirineotik zehar igarotzen den Donejakue ibilbideak, Somport mendatea eta Jaca-ko lautada elkartzen ditu. Oiko bidea Villanua (941 m) herritik abiatzen da eta La Trapa (1.730 m) mendi pistatik igo. Gu berriz, ipar-mendebaldeko korridoretik edo militarrena deritzonetik igotzeko asmoa dugu. Bertatik 1.977 urtean, Carlos Sainz eta J.A. de Miguel igotzen lehenak izan ziren. 700 metro,  45º bataz besteko desnibela eta PD- bezala katalogatua dago, zailtasun handiena azken zatian aurkitzen delarik.

Etxetik Aspeko Ipar korridorea igotzeko asmoz atera gara (artxibo irudia), eguraldiaren aurreikusmena ona ez bada ere. Zoritxarrez, Canfranc geltokira iritsi bezain laster baieztatzen duguna. Candanchun lainoa nagusi da, haize izoztuak indarrez astintzen digu eta elurra errukirik gabe erortzen ari da.

Ezin bestean, egitasmo berri bat aurkitu beharrean gara eta Collarada ipar-mendebaldeko korridorea aukeratzen dugu. Horretarako, erromesen zubiaren ondoan aparkatzen dugu (1.055 m), Canfranc herriaren inguruan.

Basera-tik barrena Ip lakura doan xendatik abiatzen gara (eskuin), pintura zuri eta horiz markatua. Lehen zatia oso bihurgunetsua da eta baso itxi batetik igarotzen da. Ordu bat geroago eta behin basotik kanpo, harriz eginiko txabola harrigarri batera iristen gara.

Altuera honetan pinu beltza bakarrik ikus dezakegu. Ip sakan handia gure ezkerrera eramanez aurrera jarraitzen dugu, eremu zabal batera ateraz eta bertatik, ederki ikus ditzakegu Punta Escarra piramidea (2.713 m) eta El Hombro (2.691 m) mendia. Eguraldiak ez du hobera egin, baina haizea eta hotza egonda ere, lainorik ez dago eta ikusmena badugu.

Campanales (2.696 m) hormen azpitik zeharka goaz, Ip laku izoztuaren norabidean (2.115 m). Elurrak malda okerrak estaliak ditu eta kranpoiak behar beharrezkoak egiten dira. Poliki bada ere, altuera irabazten goaz eta urtegiko hormara iritsi aurretik, Collarada ipar-mendebaldeko korridore azpian gelditzen gara, 2:20h. Itxuraz eguraldiak su-eten bat ematen digu eta lotsati bada ere, eguzkia ageri da.

Jarraitu beharreko bidea adosten dugun bitartean, mendi ikusgarri hauek sortu duten zirku ikusgarria miresteko denbora artzen dugu. Ekialdera begiratuz eta ezkerretik eskuinera El Hombro, Campanales de Ip, Punta del Aguila eta Pala de Alcañiz ikus ditzakegu,

Ala nola, Pala de Ip horma ego aldera.

Ipar-mendebaldeko korridorearen erasoa hasten dugu, baina hasieran, elurra baino gehiago harria du.

Altuera irabazten goazen neurrian, elurrak dena estaltzen du, gure igoera asko erraztuz. Hotza egonda ere, uneak badaude elurra izoztu gabe dagoena eta gustukoa duguna baino gehiago hondoratzen gara. 

Korridorearen lehen zatia oso zabala da eta malda tentea salbu, inongo zailtasunik ez digu eskaintzen. Erdi inguruan aurkitzen den lautada txiki bati esker, merezitako atsedena hartu dezakegu.  

Une honetatik aurrera desnibela handitzen doa, ala nola gure ahalegina ere. Gutxika bada ere, korridorea estutzen doa pasabide klabea gordetzen duen hormara gerturatzen goazen bitartean.  

Azken zatira hurbiltzen goazen bitartean, inongo momentuan utzi ez gaituen haizeak bere indarra handitzen du, hormaren babesean gordetzea behartzen gaituelarik. 

Igoeraren zati zail eta delikatuenean aurkitzen gara. Tximinia estu eta hauskor batek korridorearen bukaeratik banatzen gaitu. Elurra ez ba du ere bai izotza eta nahi eta ez, kranpoiak jantzita igo beharrean gara, igoerari zailtasuna gaindituz. 

Korridoreko azken zatira iritsi gara eta bertatik, lehen aldiz, Collarada gailurra ikusteko aukera dugu. Haizearen indarra ikusgarria da eta zutik egotea ere ezinezkoa suertatzen zaigu. Eguraldia berriz ere okertzen ari da eta ondorioz, gailurra zapaltzeari uko egiten diogu. 

Denborarik galdu gabe, beranzko bideari ekiten diogu.

Beste behin, mendiak liluratu gaitu, bihotz itxurako arku hau Campanales hormetan aurkitu dugularik.

Datu teknikoak

  • Ibilbidea: Collarada Iparmendebaldeko korridorea
  • Luzera: m.
  • Kokapena:Pirinioak
  • Kategoria : Korridorea
  • Zailtasuna:PD-
  • Hasiera puntuan amaitzen da:Bai
  • Iristeko denbora:4:30 h
  • Nola iritsi:Erromesen zubiko aparkalekutik (1.055 m), Canfranc herri.
  • Igotzeko denbora:7:20 h
  • Jeisteko denbora:2:50 h
  • Ezaugarriak:45º bataz besteko desnibela duen 700 m-ko korridore bat dugu. Zailtasun handiegirik ez du (PD-). Zailtasun handiena azken zatian aurkitzen dugu.
  • Materiala:Kaskoa,kranpoiak, 2 piolet
  • Garaia: Udaberria
  • IBILBIDEAREN DATU GUZTIAK IKUSI
Gureak eta beste batzuen Cookie-ak erabiltzen ditugu, webgune honen erabiltzaileen nabigazioaren analisia egin ahal izateko.
Nabigatzen jarraitzen baduzu, onartzen duzula suposatzen dugu. Nahi izanez gero, konfigurazioa aldatu edo informazio gehiago jaso ahalko duzu hemen.