Vignemale txiki

Capra Alpina(e)k idatzia.
4916
bisita

Vignemale-ko mazizoa pirineotan dagoen ederrenetakoa da eta bere ipar aurpegiak ez du inork axolagabe uzten. Vignemal txikia Gaubeko lakutik egitea "klasiko" bat da. Ibilbidea ikusgarria da eta Alpeekin gogorazten digu zeharkatzen duten mendi bide ugarirengatik, bere glaziare eta uharrengatik eta bertan ibiltzen den jende guziagatik.

Plateau e Pountas-tik ateratzen gara (1460 m.) Oh. Espainiako zubirantz ikusgarriak diren bi uharren elkartze lekuan. Hemen erabaki beharra dugu nondik joan Gaube-ko lakura. Ezkerreko bidea jarraituz GR10 segituz baso bat zeharkatuko dugu aldapa tentea duen bidetik eta ordu bat barru lakura eramango gaitu edo bestela, bertan dagoen teleaulkia hartu eta minutu batzuek barru 1730 m. utziko gaituena. Bigarrengotik igotzea pentsatu dugu eta hamabost minutu pista zabal batetik zehar, arazorik gabe, lakuko ostatuan gaude (1730 m.). Teleaulkiak uda eta negu ibiltzen dira. ¡ Zein ederra den Gaube-ko lakua ! Goizean bere urak berdeak ikusten dira eta arratsaldean berriz urdinak.

Lakua bere ezkerraldetik zeharkatuz, bide zapaldu eta ondo markatutako batetik, bukaerara iristen gara eta uharra zeharkatuz zubi txiki batetik, goranzko bidean goaz orain eskuinaldetik. Ezkerretara eta goraxeago Cabane de Pinet uzten dugu (1800 m.).

Lasai doa bidea gorantz (S) eta gutxika bada ere, nahastezina den Vignemal ipar aldea ikusten hasiak gara. Gaube-ko aranetik gabiltza aldapa motz bezain tente eta lautada handietatik. Azken aldapa gogor batek sarrera ireki digu Vignemale-ko zirku ikusgarrira eta pirineotako ikuspegi politenetako bat miresteko. Gure ezkerretara Oulettes de Gaube aterpetxea dago (2151 m.) 2h.

Tontotuta gaude aurrean dugun ikuskizunarekin, eguraldia zoragarria da eta jendearen joan etorria geldi ezina. Beste modura ulertuko ez denez, denbora luzez gaude mendiari begirik kendu gabe, tarteka argazkiak ateratzen ditugu, oso klasikoak noski, jan, edan eta atseden hartzetik aparte. Konturatzerako denbora asko pasa da eta bidea jarraitzea pentsatzen hasi behar dugu. GR10-eko aldaera batetik gorantz goaz bide bikain batetik (S), Oulettes de Gaube eta Bayssellance-ko aterpetxeak elkartzen dituena. Aldapa bihurguneak eginez doa, sigi-saga motz batzuek ere eta arnas estuka garamatza. Vallée de Lutour-a doan gurutze bidera iritsi gara eta Col d´Arraillé-ra doan bidea ezkerretara utziz aurrera jarraitu behar dugu. Bero egiten du eta eguzkiak estu hartu gaitu, babesteko itzal bat bilatzea zaila egiten delarik. Dagoeneko Hourquette d´Ossoue begien aurrean dugu, hurrengo helburua. Azken zatia arroka soltez betea dago, normala izan daiteke elurra bertan bilatzea, azkenean igotzea lortu dugu (2734 m.) 4h.

Bertatik Bayssellance-ko aterpetxea ikus daiteke, gordeta dagoen pirineotako aterpetxerik altuena (2651 m.). eta oso gertu egon harren gaur ez goaz bertara. Geldialdi bat egitea pentsa dugu paisaiaz gozatzen jarraitzeko, nola zerbait jan eta edan egiteko ere.

Urduri eta kezkaturik gaude falta zaigun zatian zer aurkituko dugun ez dakigularik, inoiz ez bai gara bertan izan. Ikusten dugunez aurreneko zatia aldapa tente eta harri hautsi asko duen batetik doa, bide arrastoak nonahi daude baina denak ere gandorrera garamatza. Inongo zailtasunik gabe Vignemal txikira iristen gara (3022 m.) 5h. Ikuskizun aparta bertatik Ossue-ko glaziarra bere pitzadura nabarmenak agerian dituelarik (SE) eta Oulettes glaziarrera ere (SO). Parez pare dugu Vignemale-ko ertza Pique Longue denetan nabarmentzen delarik, baina beste baterako utziko duguna.

Behatoki paregabean gaude bertatik Ossue aran berdea gure oinpean dugularik. Gavarnie-ko zirkua, Troumouse-ko zirkua, Nouvielle-Pic Long mazizoa, Monte Perdido eta hainbat eta hainbat gailur gehiago ere.

Jaitsiera igotako bide berberetik egiten dugu. Oulettes de Gaube  aterpetxera zailtasunik gabe iritsi gara eta Gaube-ko lakura bidean leku honen edertasunez gozatzen segitzen dugu.

Datu teknikoak

  • Ibilbidea: Petit Vignemale Cauterets eta Gaube lakutik
  • Igoera data:20/08/2009
  • Desnibela:1.562 m.
  • Kokapena:Pirinioak
  • Kategoria : Oinezko igoera
  • Zailtasuna:F
  • Iristeko denbora:5h. Gaubeko lakutik
  • Nola iritsi:Cauterets-etik (Lourdes 30 km.) 8 km igotzen ditugu errepidez ordaindu beharreko Plateau de Pountas aparkalekura (1460 m.).
  • Igotzeko denbora:8h. 30´
  • Jeisteko denbora:3h.30´
  • Ezaugarriak:Mendi garaieko ibilbide erraza. Mendian ibililtzeko oitura duen edonork egiteko modukoa, nolaz eta entrenatuta dagoen.
  • Materiala:Bastoiak ondo etorriko zaizkigu.
  • Garaia: Uda, Udazkena
  • IBILBIDEAREN DATU GUZTIAK IKUSI

Igotzen diren mendiak

Lo egiteko aterpetxeak

Natur guneak

Erlazionatutako ibilbideak

Iruzkin bat egin

Gureak eta beste batzuen Cookie-ak erabiltzen ditugu, webgune honen erabiltzaileen nabigazioaren analisia egin ahal izateko.
Nabigatzen jarraitzen baduzu, onartzen duzula suposatzen dugu. Nahi izanez gero, konfigurazioa aldatu edo informazio gehiago jaso ahalko duzu hemen.