Bernatuara mendia edo Pic Gabiet - 2.716 m

Capra Alpina(e)k idatzia.

2782
bisita

Bernatuara totorra San Nicolas de Bujaruelo kanpinetik iparrera harro ageri den mendia dugu eta harritzekoa bada ere, gailurra bitarte belarreztatua ikusten da. Altuera handiegirik ez badu ere, inguruan dituen mendi erraldoiak kontutan hartzen baditugu, talaia paregabea dugu egun eguzkitsu batetan 360º-ko ikuskizun apartaz gozatu ahal izateko.

Ara ibaia zeharkatzen duen San Nicolas de Bujaruelo zubitik abiatu (1.338 m) eta Bujaruelo Portura doan bideari ekiten diogu, baso trinko batetik begite ugariz altuera erraz irabaziz. Behin goi-tentsio zutoin baten parera iristean (1.600 m), eskuinean Bujaruelo Portura gorantz doan bidea utzi eta zuzen jarraitzen dugu. Laster zubi batetik Lapazosa sakanetik erortzen diren urak zeharkatu eta berriz ere, pagadian murgiltzen gara.

Behin pagaditik atera eta parez pare (NNE) Plana de Sandaruelo aterpetxearekin aurkitzen gara (1.670 m). Oso higatua aurkitzen den bideak gorantz garamatza eta eskuinetik zeharkaldi etzan batek Bernatuara mendiaren oinpera eramaten gaitu. Behin uharra zeharkatu eta malda gogorretik oso higatua dagoen Crapera mendiaren hegaletik goratz goaz.

Ezproi bat ezkerretik zeharkatu eta eskuinetik horizontalean mendi-lepora iristen gara, bertatik Bernatuara laku dotorea ikusteko aukera izanik (2.270 m). Lakura jaitsi eta bere eskuinetik zeharkatzen dugu Bernatuara Lepora iritsi (2.338 m) eta aldi berean, frantziar isurialdera gerturatu ahal izateko.

Ezkerrean Ossau presara (1.834 m) jaisten den bidea utzi eta eskuinetik (E) eremu belartsu batetik gorantz jarraitzen dugu, gailurretik iparrera erortzen den hartxingadira bitarte, non ozta-ozta hito bakartiren bat aurkitzen dugun eta bidexka apenas nabari den. Bernatuara eta lehenengo Secres tontor artean aurkitzen den lepora iristen gara (2.477 m), segidan eskuinera bira egin eta bete betean hartxingadi arbeltsuari aurre egin ahal izateko.

Gutxika bada ere altuera irabazten goaz, naiz zapaltzen dugun eremua ez den oso egonkorra. Azken ertzaren oinpera iristea lortu dugu, non dagoeneko xenda arrastoa askoz ere nabariagoa den. Gailurraren ingurura ailegatzen gara eta hego isurialdetik erraza ageri den igoerak (I), tontor inguruan uzten gaitu. Azken bretxa txiki bat gainditu ostean Bernatuara edo Pic Gabiet bezala ere ezaguna den gailurrera iristen gara (2.716 m).

Bai tamalgarria eguraldiak ez laguntzea zeren lainoak, 2.900 m-tik gora erabat estalia du, ezer ikusteko aukerarik eman gabe. Eguraldi eguzkitsuarekin ikuskizuna aparta da, Vignemale, Gabieto, Taillón, Munia, Pic Long,... Penagarria benetan, naiz Poset eta bere ingurua ikus daitezkeen mendi bakarrak diren.

Gabietos-Taillón, Múnia, Pic Long alderdia

Vignemale alderdia

Jaitsiera ertz zorrotza jarraituz Bujaruelo-tik igotzen den ohiko bidetik egingo dugu. Lehen zatia ertz zorrotzetik hasi eta ondoren ezkerrera desbideratu eta Bujaruelo aranera erortzen den malda belartsu bezain tente batetik jaitsiz. Jarraian berriz ere ertzera itzuliko gara eta Punta Sandaruelo (2.477 m) bitarte ez gara desbideratuko. Bertatik Bernatuara lakua ikusgarri ageri zaigu.

Atzera metro batzuek egiten ditugu kanal tente batetik jaitsi ahal izateko, non eskuak erabili beharrean gauden (II+) Bernatuara lepora (2.338 m) eta alboan duen lakura itzultzeko. Lakua eskuin aldetik zeharkatu eta beste aldean aurkitzen den lepora igotzen gara, jarraian Crapera tontorreko hegaletik jaitsi ahal izateko. Behin Plana de Sandaruelo aterpetxea ezkerrean utziz, Lapazosa sakanetik erortzen diren urak zeharkatu eta basoan murgiltzen gara. Bujaruelo Portutik datorren bidea jarraituz, denbora gutxi barru zubia zeharkatu eta San Nicolas de Bujaruelo aterpetxera iritsiko gara (1.338 m).