Zinalrothorn 4.221m

Capra Alpina(e)k idatzia.
5431
bisita

Zinalrothorn izan da 2013ko Alpeetako kanpainaren hasiera. Oraindik ere gogoan ditugu 2012 urteko Mont Blanc, Gran Paradiso, Castor eta Pollux gailurrak, zein baino zein ederragoak. Hala ere aurten pausu bat gehiago eman nahi dugu, teknikoki zailtasun haundiagoko mendietan sartuz gure mugen bila, beti ere segurtasun haundienaz, noski. Pirineotan ertzak, korridoreak eta zailtasun maila bateko hainbat eta hainbat ibilbide egin ondoren, Alpeetakoa nolabait esateko "selektibitate" antzeko zerbait da, urtean zehar ikasitakoa frogan jartzeko garaia. Gainera Alpeetara iritsi berritan eguraldi bikainak parada itzela eskeini digu mendi haundi batekin hasteko, Zinalrothorn.

Badakigu ez dela gomendatutakoa, baina egun gutxi barru gainean izango dugun eguraldi txarrak mendi haundi batekin hastea "behartu" gaitu. Alpeetara ez gara denbora pasa etorri, eta beraz ezin lasai egon horren eguraldi ona aprobetxatu gabe. Beraz motxilak soinean eta aldapari ekin diogu. Goizeko 8etan irten gara Zermattetik mendebalderuntz, Rotornhuttera bidean. Laster heldu gara Edelweiss aterpetxera, non Mattertal bailararen bista bikainak dauden. Loreontzi mordo bat dago elurretako lorez (edelweiss) beteta, baina bitxia da mendian ez dugula horrelako lore bat bakarrik ere ikusi!

Bidean euri apur bat ere izan dugu, baina laster pasa da eta ez ditu gure animoak kokildu. Geroz eta gorago geroz eta mendi gehiago ikusten hasi gara, Obergabelhorn, Wellenkuppe... eta denak egiteko gogo biziz goaz, planak eginez Zinalen ondoren hura eta bestea egiteko. Eta egia esan oraindik ez dugu ezer ere egin, denborak jarriko dizkigu hankak lurrean.

Untergabelhorneko iparrak ere erakartzen gaitu, elurretako pala dotore batekin. Hala ere benetan txiki ikusiko dugu mendi hau Zinal gailurretik.

 

Rotornhuttera bidean Trifteko txaleta dago. Benetan tentagarria bertan geratu eta bazkari eder bat egitea, baina barrita lehorren bat jan eta aurrera jarraitu dugu.

 

4 ordu baino gutxiagoan lortu dugu Rothornhuttera (3220m) heltzea. bertan bokadilloak jan eta arratsalderako plana egin dugu: Unter Aeschhorn. Mendi bikaina benetan, eta bista zoragarriekin, batez ere Weisshorn aldera. Aterpetxera heltzean jota gaude, ez baita gauza makala 2000d+ eta 400d- egitea altura hauetan.

Aklimataturik egon ez arren, beti ere hobea da 3000m ra oinez igo eta bertan lo egitea erremonte mekanikoetan 3500m ra igotzea baino. Hauxe da gure gailurreko aukerak indartzen dituen teoria, eta erea berean gure buruak autokonbenzitzeko modua.

 

Gailurreko egunean goizeko 3etan gosaldu dugu eta 4rak aldera irten gara aterpetxetik. Ez da batere timing ona, azkenak baigoaz eta aldearekin gainera. hau hobetu beharra dago Alpeetan zer edo zer egin nahi bada. Glaziarraren irteeran ez dugu biderik onena topatu, hala ere aurrera goaz eta urrutian ikusten ditugun argiek norantz joan behar dugun adierazten digute.

Egunsentian zur eta lur geratu gara aurrean dugun ikuspegiarekin. Benetan ez dago hitzik hau deskribatu ahal izateko.

Cervino, egia bihurtutako amets bat.

Dent Blanche, beste haundi bat. Honek itxaron egin beharko du.

Goizeko 7ak aldera harrizko ertz haserara heldu gara.

Haserako harri eta elurrezko zeharkaldi honetan ensanblean goaz hiruok. Duela gutxi egin duen elurrak azti joatea behartzen gaitu, pausu bakoitza kontu haundienarekin emanez. Gainera aurreneko aldia da terreno mixto honetan horren zeharkaldi luzea egiten dugula.

Pare bat kanal igaro ditugu, non denbora asko galdu dugun aurrekoen zain. hauxe da aterpetxetik azkena ateratzearen bidesaria. gainera batzuk buelta eman dute, non gauden eta ordua kontuan izanda. Guri burutik pasa ere ez zaigu egin buelta hartzea goizeko 8etan! Baina gero oahrtu ginen bai, ez zela hain erabaki txarra horiek hartu zutena.

Azkeneko kanala igaro eta ezkerreko aldetik hasten da eskalada. Elurrezko kanalean harriak erotzeko arriskua dago, eta beraz ezkerreko harrikaritik igo behar da. Beno, hemen ere harriak eror daitezke, baina beintzat kanalean baino aukera gutxiagoz. Eta gogoratu, kaskoa beti buruan! Zati honetan IIIko pasorenbat dagoela iruditu zaigu, baina erraz igotzen da, eta 3 luzeren ostean Gabel lepora heldu gara.

Gabel lepotik gora, aurrena ertzean jarraitu behar da 50m, eta jarraian mendebal aurpegira igaro, igoerako zailena den Binerplatteren (III+) bila. Plaka polita da, paraboltekin ondo ekipatua hasieran, gero burnizko estakekin. Bertatik berriz ere ertza hartu dugu. jende ugari ikusten da bertatik gailurraldera.

Puntu honetan 4200m ra gaude iada, baina hala ere ordu bete luze geratzen zaigu tontorrera. Elur ertz bat dago haseran eta gero inguratu behar diren pare bat jendarme. Balkoi bikainak daude hemen, une batzuetan azpian ezer ez daukazula pasatzen zara, baina zorionez oso helduleku onak daude. Hala ere ez da oso aproposa bertigoa duen inorentzat!

Azkenik 12ak aldera gailurrera heldu gara! Ni behintzat jota noa. Emozioak jota. Negar malkoren bat edo beste ere atera zait. Benetan alpinistak sentitzen gara.

Beheruntz ere luzeka aseguratzen joan gara, eta horrexegatik luzatu zaigu hainbeste. Arratsaldeko 17etan iritsi gara goizeko 7etan geuden puntu berera. Aterpetxera 19:15 aldera heldu gara. Ez da batere timing ona Alpeetarako, beraz erabakiak hartu beharrean gara, luze gutxiago egin eta ensanblean joatearena, adibidez.

Zinalrothorn izan da gure Alpeetako aurreneko mendi haundia, mendi zoragarria, non ikaragarri ikasi dugun. Beste hainbat gauzen artean, garrantzitsuenak aterpetxetik hegan irten behar dela goizean, askotan hobea dela ensanblean joatea luzeka baino, eta gauzak ondo eta azkar egin behar direla. Alpeetan ezinbestekoa da fundamentua edukitzea, ideiak garbi edukitzea, eta batez ere uneoro zer egin jakitea, igoeretan arrakasta eduki nahi bada behintzat.

Datu teknikoak

  • Ibilbidea: Zinalrothorn Rothorn Hütte-tik
  • Igoera data:05-08-13
  • Desnibela:1.600 m.
  • Kokapena:Alpeak
  • Kategoriak : Ertza, Kranpoiak, Oinezko igoera
  • Zailtasuna:AD+
  • Hasiera puntuan amaitzen da:Bai
  • Iristeko denbora:4o aterpetxera
  • Nola iritsi:Zermatt herritik mendebaldera, Rothornhutte aldera.
  • Igotzeko denbora:8o igo, 7o jetxi
  • Jeisteko denbora:3o aterpetxetik behera
  • Ezaugarriak:Puntu konkretu batzuk kenduta, ensanblean egitea onena. Konfiantza edukiz gero, dena ensanblean egin liteke.
  • Materiala:Kaskoa, 60mko soka, friend eta zinta batzuk
  • Garaia: Uda
  • IBILBIDEAREN DATU GUZTIAK IKUSI
Gureak eta beste batzuen Cookie-ak erabiltzen ditugu, webgune honen erabiltzaileen nabigazioaren analisia egin ahal izateko.
Nabigatzen jarraitzen baduzu, onartzen duzula suposatzen dugu. Nahi izanez gero, konfigurazioa aldatu edo informazio gehiago jaso ahalko duzu hemen.