Chopicalqui (Cordillera Blanca) - 6.354 m

Capra Alpina(e)k idatzia.
2329
bisita

Chopicalqui mendia Huascarán mendigunean kokatzen da, Yungay eskualdean (Mendikate Zuria-Perú). Denboraldi bakoitzean seimilako mendi artean gehien bisitatuenetakoa da eta mendikate zuriko gune ezaguneneko talaia ikusgarria. Llanganuco araneko azken muturrean aurkitzen da , Huandoy, Pisco eta Chacraraju iparralde eta Huascarán hego eta Ipar hegoalde artean hain zuzen ere. Hirugarren Huascaran edo Huascarán Ekialde bezala ezagutua ere bada. Quechua hizkuntzan Chawpi=erdi eta Callqui=altxagarri esan nahi du, hau da “erdia altxagarri dena”.

Autoz Huaraz hiritik Yungay herrira bideratzen gara eta bertatik, Llanganuco aranera desbideratu. Huascarán Parke Naturaleko sarrerako kontrolean erregistratu ostean, Portachuelo de Llanganuco  norabidean jarraitzen dugu eta behin Cebollapampa bihurgunea atzean utzi z, Chopicalqui bihurgunean gelditzen gara (Yungay herritik 36 km). Bertatik oinarrizko kanpalekura apenas 20 minutu daude eta ori dela eta, normalena morrena kanpalekuraino jarraitzea izaten da.

Behin oinarrizko kanpalekura eltzean (4.400 m), eskuinaldean aurkitzen den malda tente bat igo eta oso nabaria den xenda jarraitzen dugu. Huascarán norabidean dagoen morrena zeharkatu, bere ertz zorrotzera igo eta nabarmena den aldapa tente batetik oso nabaria den kontrahorma bateraino, bere oinpean morrena kanpalekua aurkitzen delarik (4.900 m).

3:45h eta gero, bizkarrean daramatzagun motxila astunak kentzeko momentua iritsi da. Ishinca aranean ez bezala hemen mandazain eta asto zerbitzurik ez dago, beraz, beharrezkoak ditugun gauza guziak bizkarrean eramatea behartuak gaude. Plataforma txiki batetan denda jarri eta glaziar bazterretik ura artzen dugu, derrigorrez erosi beharko duguna. Afaltzeko zerbait beroa prestatu eta denborarik galdu gabe zaku barnean murgiltzen gara, ez bai zaigu lotarako ordu askorik geratzen eta aprobetxatu nahi ditugu.

Hurrengo egunean 1 Kanpalekura igotzea izango litzateke oikoa, plato glaziarrean 5.600 m-ra eta bertan gaua pasaz hurrengo egunean tontorrera igotzeko saiakera egin. Guk berriz, morrena kanpaleku bertatik saiakera egiteko asmotan gaude, naiz jakin tontorretik 1.446 m-ok banantzen gaituzten, zeren indartsu eta aklimatatuak ikusten garen. Gau erdi inguruan iratzargailuak jo du eta luma zakuaren berotasunetik gorputzak ez du atera nahi. Gutxika bada ere betiko errutinarekin hasi eta bata bestearen atzetik altxatzen hasi gara.

Dendaren epeletik gau hotz eta ilunera atera gara, galleta gutxi batzuek jan eta kontrahormaren ezkerretik 1 kanpalekura bidean abiatzen gara. Hasierako zati honetan glaziarraren paralelo harrikari batetik goaz, eskuinetik irabazi asmoz ahalik eta altuera gehien bertara sartu aurretik. Ez da batere atsegina harrikari nahaspila honetatik ibiltzea, ez egotearren ez dago bide arrastorik ere naiz itoak dauden, baina beti gertatu oi den bezala, hainbeste daude eta  edozein lekutan, ez dela batere erraza zabuka ez ibiltzea. Gutxi gora behera ordu bat geroago glaziarrean sartzeko erabakia hartu dugu, ibiltzea beti ere errazagoa bai zaigu naiz arriskua eta urduritasuna neurrigabe handitzen diren eta ori dela eta, bai gure mugimenduei  bai glaziarren mugimenduei ere tentu handia jarri beharrean gara.

Granpoiak jartzeko momentua iritsi da baina eskularruak jantzita ez da batere erraza egiten, baina kendu ahal izateko hotz gehiegi egiten du. Sokaz lotzea besterik ez zaigu geratzen, erokeria hutsa izango litzateke pitzadura labirinto honetatik lotu gabe ibiltzea eta atera aurretik, eskalada guzian elkartuta mantenduko gaituen sokaz lotzen gara. Glaziar hautsi eta pitzaduraz beteak ematen dugun pauso bakoitzean karraskatzen du, ori dela eta tentu handiz ibiltzea derrigortzen digu. Frontalen argi txikiek pitzadura guziak, bata bestearen atzetik, saihesten laguntzen digute, batzuek sakontasun handikoak, ala nola horma txiki bezain tenteak ere 65/70º. Tarteka izotz zubi batzuek ere zeharkatu beharrean gara eta egiterakoan gure pisuz hautsi ez daitezen errezo egiten dugu.

Gutxika bada ere pitzadura gune kaotiko hau atzean uzten ari gara, glaziarra eskuinetik igoz eta beti ere horma harritsuaren norabidean, non erortzen diren harriekin kontu handiz ibili beharko garen. Zati honetan aurkitzen ditugun pitzadurak handiak eta sakonagoak dira, baina saihesten ere errazagoak eta oni esker, errazago aurrerantz egiten dugu. 40/60º-ko segidako horma txiki batzuek platoraino gerturatzen gaituzte, bertan 1 kanpalekua egon beharko litzateke, baina iluntasunean ikusteko gai ez gara. Konturatzerako denda artean oinez gabiltza, eta bakar batzuek badaude bai baina mugimendurik batere ez, beraz pentsatzen dugu bertan lo egin dutenek dagoeneko mendian gora doazela..

1 kanpalekua gune bare eta babestu batetan 5.600 m-ra kokatzen da. Goizeko 5:00h inguru dira eta eguna argitzeko apenas ordu bat geratzen da. Tarteka bada ere, gure goitik sigi-saga doazen argi txiki segida ikus dezakegu, suge argitsu bat bai litzan. Gozoki batzuek irensten ditugu bitartean, ez zaigu batere geratzen oiek dauden lekura iristeko, pentsatzen dugu gure barnean. Hotz handia egiten duenez denbora asko geldirik egoterik ez dugu eta aurrez joan direnek utzitako arrasto nabaria jarraituz, berriz ere abian jarri gara.

Hemendik aurrera hego-mendebaldeko ertza igo behar dugu, 45/60º-ko zenbait maila gaindituz. Naiz aurreko egunetan elurra egin duen, itsura ezin hobea du eta orri esker, malda tenteak erritmo onean igotzeko aukera dugu. Bat batean 35/40 m-ko horma baten aurrean gaude eta pitzadura handi batez babestua dagoenez, ezin bestean salto egin beharra dugu. Goiko aldean hesola bat dauka igoera segurtatu edo jaisterakoan rapelatu ahal izateko.

Eguna argitzen hasi da eta  bai nabari dela, tenperatura izugarri hotza da eta gainera haizea altxa du. 1 kanpalekuan dauden dendak oso beran ikus ditzakegu, seinale garbia dagoeneko desnibel handia irabazi dugula. Eguraldia ez dirudi oso iraunkor dagoenik eta lainoak altxatzeko inongo asmorik ez duela ematen duenez, hoztu baina lehen aurrera jarraitzea pentsa dugu. 

Dagoeneko 6.000 m-tik gora gaude eta gorantz goazen heinean, malda bat gainditu eta aurrez aurre 1 kanpalekutik atera diren bikote guziak maila tente batetan trabatuak ikusten ditugu. Gerturatzen goazen heinean zergatia ulertzen dugu, pitzadura batek du errua. Saihestu asmoz mailaren ezkerretik eskalatzen hasi dira, baina ez dirudi egoera onean ikusten dutenik eta igo ahal izateko, eskuinera zeharkaldia egitea erabaki dute. Gure txanda iritsi da baina geldirik egon garen denboran izoztuak geratu gara eta kontutan izanik tarte honetan elurraren egoera eskasa, eskalada asko zailtzen zaigu. Kosta zaigu baina gainditzea lortu dugu, goian bi hesola aurkitzen ditugu eta dudarik gabe, jaitsieran rapelatu ahal izateko ondo etorriko zaizkigu.

Momentu batean lainoa desagertu da eta zeru urdina ikusteko aukera dugun arren, egiten ari garen esfortzua ez digu arintzen eta pauso bat ematen dugun bakoitzean gehitzen doa. Bagenekien ertza luzea zela baina bukaezina egiten ari zaigu eta ez dirudi bukatzeko itxura duenik. Eskuinera zeharkaldia egiten dugu 60º-ko malda batetik igoz, tontorreko ertzera zuzenean atera ahal izateko, baina jendetza handia dago eta geldialdiak etengabeak dira. Naiz gidarien esfortzua handia den, bezero askok izugarrizko arazoak dituzte aldapa gainditu,azken zatia eskalatu eta ertzera igotzeko. Eskerrak tartea bi hesolaz babestua dagoen eta bertatik aseguratzen dituzten.

Azkenik ertzera igotzea lortu dugu, baina pena berriz ere lainoa agertu izana eta duen ikusgarritasuna bere osotasun guzian ikusteko aukerarik ez dugun. Igoeraren erdi aldetik bide lagun izan dugun haizeak hemen indar handiagoz astintzen du eta hotz sentsazioa asko handitzen du. Ertza oso tente dirudi eta ori dela eta, igoera berriz ere asko moteltzen da.

Dagoeneko 6.200 m-tik gora gaude eta indarrak bakoitzean eskasagoak ditugu, seguru azken zortzi egunetan igotzen dugun laugarren mendia izateak horretan zer ikusia izango du. Tontorrera iritsi aurretik eta susmoa genuen bezala, pitzadura sakon bat aurkitzen dugu eta saihestu asmoz, 6 m-ko irtengune arriskutsu bat eskalatzea behartuak gaude. Azkenik, Chopicalqui tontorrera iritsi gara, 6.354 m.

Naiz hotza, lainoa, nekea dugun poza izugarria da. Beste behin ere genuen guzia eman dugu eta orri esker mendi ikusgarri honen tontorrera iristeko aukera izan dugu. Pena da inguruan dugun guzia ikusteko aukera ez izatea, seguru bertatik dauden bistak harrigarriak direla, gertu ditugun Huascarán ipar eta hego, Ameriketako bigarren mendirik garaiena, Huandoy, Piso, Chacraraju Mendikate Zuriko seimilako zailenetarikoa, Yanapacha eta beste hainbat.

Argazki bakar batzuek atera eta jaitsierari ekiten diogu, lainoak eta hotzak ez dute amore ematen eta  hemen denbora luzez egotea zentzurik ez du. Berantz goazen heinean bikote guziak aurreratzen ditugu, naiz hauen kexak entzun beharra izan, baina beraien erritmoa oso geldoa da eta 1 kanpalekura bitarte beraien atzetik joateko asmorik ez dugu, bertan geratuko direla pentsatzen bai dugu. Morrena kanpalekura eguerdirako iritsi gara, aurrez eginiko aurreikuspena betez, bertan ditugun gauzak jaso, denda, zakuak, esterilak, sua, zakarrak (oso garrantzitsua) eta morrenatik berantz abiatzen gara oinarrizko kanpalekura norabidean, non gaua pasatzeko asmoa dugun. Arratsaldeko 17:00h-tan heldu gara.

 

Datu teknikoak

  • Ibilbidea: Chopicalqui Hego-mendebaldeko ertza
  • Desnibela:2.100 m.
  • Kokapena:Andeak
  • Kategoriak : Ertza, Kranpoiak, Oinezko igoera
  • Zailtasuna:PD+ (Ibilbidea eta zailtasuna aldakorrak)
  • Korridorearen graduazioa:60º
  • Hasiera puntuan amaitzen da:Bai
  • Nola iritsi:Kotxez, Chopicalqui kurbara 36 km.
  • Ezaugarriak:Desnibel handiko glaziar arteko ibilbidea, zulo erraldoiak eskibatuz eta tente jartzen diren zailtasun gutxiko bi pausu.
  • Materiala:60 m.-ko soka 2, 4 estaka, kaskoa eta pioletak.
  • Egoera:Bidea zapalduta egotea, bestela glaziarreko zuloak saihestea kaotikoa izan daiteke.
  • Garaia: Uda
  • IBILBIDEAREN DATU GUZTIAK IKUSI
Gureak eta beste batzuen Cookie-ak erabiltzen ditugu, webgune honen erabiltzaileen nabigazioaren analisia egin ahal izateko.
Nabigatzen jarraitzen baduzu, onartzen duzula suposatzen dugu. Nahi izanez gero, konfigurazioa aldatu edo informazio gehiago jaso ahalko duzu hemen.