Goulotte Quintanatik Taillonera (D+)

Capra Alpina(e)k idatzia.
2820
bisita

Oraingo honetan ez gara bidearen kondizio txarren aurka borrokan ibili eta Taillonen aurpegirik leunena ezagutu dugu, nahiz eta hau hegoa izan. Goulotte Quintana oso dibertigarri, gozagarri eta, kanala zegoen baldintzen arabera, erraza iruditu zaigu. Urjauzia egoera onean zegoen eta amaierako zati mixtoa guztiz izotzez estalia, oso fidagarria izan ez arren. Orokorrean, izotza gurina zen eta pioletak barruraino sartzen ziren; baina beste irakurketa posible bat badu honek, izotz torlojuak gehienbat psikologikoak baitziren, gure azpitik ura igaro zen eta ez baitzuten gure segurtasuna guztiz bermatzen.

Col de Tentes baina 300 metro beherago hasi genuen jarduera. Portua ez zegoen aparkalekurarte zabalik eta elurra kentzeko makinak bidea ixten zigun lekuan utzi genuen kotxea. Goizeko 3.20etan esnatu eta 4etan oinez hasi ginen.

6etan iritsi ginen Gabietoen glaziarrera, zertxobait nekatuak bidea irekitzen joan ondoren malda tente batetik. Hemendik parez pare ikusten genuen Taillonen hego aurpegia. Ikusgarria, bere hiru Goulotteak nabarmentzen zirelarik, nahiz eta erdikoak ez zirudien baldintzarik zuenik hasierako izotz urjauzia segurtasunez igotzeko.

Materiala arnesean jarri, kranpoiak jantzi eta Goulotte Quintanara zuzen-zuren igotzen zen kanal batetik gora hasi ginen. 150 metro igo genituen izotza eta elurra zen malda batetik gora eta bilera antolatu genuen urjauziaren eskuinetan dauden bi iltze (horietako bat kolokan zegoenez, beste friend batekin errefortzatu genuen) eta kordino batekin.

L1 (55 m.): Izotz luzea, ia Goulotte guztia eskalatzen. Zati batzuk besteak baino tenteagoak (75º max.), baina izotza oso erraz eskalatzen zen. Azpitik ura entzuten genuen, aurreko egunean eta hontan egindako beroaren erruz. Bilera azken izotz erresaltea baino lehen egin genuen, torloju bat eta bi friend erabiliz.

L2 (35 m.): Luze motzagoa egin genuen elur maldaren erdi-erdian ez geratzearren. Lehen izotz erresaltea 75º, gainontzeakoa egoera onean zegoen elurra. Bilera aldapa erdian eskuinean zegoen bloke batean egin genuen, bi friend eta fisurero bat erabiliz.

L3 (40 m.): Transiziozko elur malda bat, 45º-tan. Hemen hiru aukera ditugu aurrera jarraitzeko. Gure aurretik zihoazen bi lagunak erdiko bidea aukeratu zuten. Gu ezkerreko erresaltetik sartzea erabaki genuen. Intuizioa edo auskalo zer izan zen, baina asmatu genuen. Azti! Goulotte Quintanako bide originala ezkerretik doa. Erresalte hau baina 10 metro beherago jarri genuen bilera bi friend erabiliz.

L4 (40 m.): Metro bat zuen erresalde mixto erraz bat gainditu eta parez-pare jo genuen azken oztopoarekin, batzuen ustez kanaleko pausu klabea. Bilera hau baino 10 metro beherago egin genuen bi iltze eta kordino bat zeuden lekuan. Guk beste baga batekin indartu genuen.

L5 (60 m.): Pausu mixtoa (M4), gure kasuan izotz dexenterekin. Hori bai, kalitate txarrekoa. Pare bat torloju sartu nituen, nire buruko segurtasuna handitzeko batez ere. Erraz gainditu genuen, zailtasun gabe trakzionatu zitekeen. Honen ondoren, 45ºko elur malda bat. Bilera ezkerreko horman baga eta friend batekin.

L6 (30 m.): Irteerako azken metroak 55º-ra. Ezkerreruntz hartu genuen erlaitza saihesteko. Amaiera!

Tailloneko tontorra zapaldu genuen, berez Pirinioetako hirumilako errezenetakoa (nondik igotzen dugun arabera, ezta?) eta Roland ebakidura eta Serradets aterpetxetik itzultzea erabaki genuen, eskalada hiru bat ordutan egin eta oraindik goiz zelako. Aurreko egunean eta egun bertan bero asko egin zuenez, elurra egoera penagarrian zegoen eta aldaketaraino sartzen ginen pausuak ematerakoan. Asko damutu ginen jeisteko bide hau aukeratzeaz... Pare bat ordu gutxiago kostako zitzaigun seguruenik Gabietotako lepotik jetsi izan bagina.

Orokorrean, Goulotte Quintanak denetik du (izotza, mixtoa, elurra) eta horregatik ematen dio dinamismo hori eskalatzaileari. Oso egoera onean aurkitu genuen eta horregatik nahiko erraza iruditu zitzaigun. Korridore bakoitza mundu bat da denboraldi bakoitzean eta beraz ezin da bat fidatu jartzen diogun zailtaun akotazioaz.

Dudarik gabe, gainditu behar izan genuen arrisku handiena gure aurretik zihoan kordadak bota zizkiguten harri blokeak seihestean egon zen. Exageratu gabe, metro erdiko diametroa izango zuen horietako batek! Zortez, ez zetorren beste inor behetik... Alproja alenak, ia guri igoera boikoteatzea lortu duzue... baina hau ez da horrela geratuko!

Datu teknikoak

  • Ibilbidea: Taillon Goulotte Quintana
  • Igoera data:2016-05-21
  • Luzera:250 m.
  • Desnibela:1.176 m.
  • Kokapena:Pirinioak
  • Kategoriak : Korridorea, Kranpoiak
  • Zailtasuna:D+
  • Korridorearen graduazioa:75º
  • Eskalada mixtoaren zailtasuna:M4
  • Izotz eskaladaren zailtasuna:WI3
  • Luze kopurua:6
  • Ibilbide zirkularra:Bai
  • Hasiera puntuan amaitzen da:Bai
  • Iristeko denbora:2h 30m. korridore azpira Col de Tentes-etik
  • Nola iritsi:Gavarnie-tik Col de Tentes igoz kotxez. Neguan portua itxita badago, herritik edo Bujarueloko aterpetxetik.
  • Igotzeko denbora:3h 30m. eskalada
  • Jeisteko denbora:3h. 30m.
  • Ezaugarriak:Izotzetako bi luze eta paso mixto bat amaieran, izotza izanez gero, erraz gainditzen dena.
  • Materiala:5-6 izotzetako torloju, Alien semaforoa, bagak, fisurero jokoa, 60ko bi soka, kaskoa, pioletak eta kranpoiak.
  • Egoera:Urjauziak formatua egon behar du.
  • Garaia: Negua, Udaberria
  • IBILBIDEAREN DATU GUZTIAK IKUSI
Gureak eta beste batzuen Cookie-ak erabiltzen ditugu, webgune honen erabiltzaileen nabigazioaren analisia egin ahal izateko.
Nabigatzen jarraitzen baduzu, onartzen duzula suposatzen dugu. Nahi izanez gero, konfigurazioa aldatu edo informazio gehiago jaso ahalko duzu hemen.