Swan Korridorea

Capra Alpina(e)k idatzia.
16848
bisita

Pirineotako korridoreetaz hitz egiteko garaian, inori ez zaio Swan ahaztuko, bera baita izotza eta elurra gustazen zaion orori, eginikoen zerrendan falta ezin zaiona. Astazouetako igoera honek xarma berezia du, bertan bizi izan diren pasarteengatik eta igotzen duen edonor liluratzeko duen ahalmenagatik. Hala ere korridore zaila da, blog askotan jartzen duenaren kontra, haserako ranpa, kanalaren luzeera eta batez ere itzulerako bide luzeagatik. Guk majo gozatu genuen, baina baita nekeagatik sufritu ere, izan ere forma fisiko egokia ezinbestekoa da horrelako erronka baten aurrean.

 

Larunbat eguerdian heldu gara Gavarnira, eta korridorea ikusi dugun unetik zalantzaz eta aldi berean itxaropenez betetzen dira gure hitzak. Urduritasun puntu horrekin Swan igotzeko gai izango ote garen. Bokadillo batzuk jan eta Pailla kaxetara igo gara, ordu eta gutxi behar izan dugularik. Koltxoi bakarra dago bertan, eta hiru garenez okerka jarri dugu, hankak kanpoan direla lo egiteko asmoarekin. Bien bitartean beste bi lagun datoz, Aretxabaletakoak eta hauekin 5 garenez aterpetxean “itxita” kartela jarri dugu! Nahiz eta beste inor ez zen inguratu.

Igandean goizeko 3:30etan esnatu gara, eta gosaldu eta prestatzerako 4:30ak jo dizkigu aterpetxetik irteterako. Beste 2 ordu eta erdi behar izan ditugu korridorearen oinera heltzeko. Bertan fenomeno bitxia hari da gertatzen, elur hautsa baitator korridoretik geratu gabe, erreka bat bailitzan. Ordu erdi bat zain egon beharrean izan gara, elur-erreka geratu eta goruntz hasi aurretik. Behean jende gehiago dator, hala ere gaurkoan gu izango gara lehenak bidea irekitzen.

Lehenengo luzea izotzezko urjauzi bat da, haseran 80º eta amaieran 60º, kobazulo bitxi batera helduz. Bertan bilera montatzeko leku aproposa dago, zinta eta iltze batzuk baitaude.

Bigarren luzean lasai noa ni goruntz, behetik ohiu egiten didaten arte soka amaitzear dagoela. Azken iltzea dagoen lekura jetxi eta bertan egin dut bilera. Hala ere ikusi ez dudan zinta bat dago eskuineko harrian, eta Unai igotzean bertaraino joan eta han elkartu gara hirurok.

Hirugarren luzean dagoeneko urjauzi ingurutik atera eta kanalean sartuta gaude. 45-50º edukiko ditu, eta bertako maldek denbora gutxi uzten dute deskantsatzeko. Oraindik ere 300 metro desnibel bainogehiago geratzen dira. Luze honetan kanal erdian gaude, eta ez du pena merezi egina dagoen arrastotik irtetea bilera egiteko. Pioletak erabiliz bertan egiten dut bilera elurretan. Blog batzuek eskuineko malloa zintaz eta iltzez beteta dagoela esaten duten arren, nik ez dut ezer asko ikusi.

Une honetan frantses batzuek aurreratzen gaituzte, eta baita eskiatzaile katalan batzuek ere. Hemendik aurrerakoa oso gogorra egin zaigu, pillaturiko nekea eta bolak kargatuta ahal dugun bezala goaz korridorean gora. Azkenik 12:30etan irteten gara korridoretik, 5 ordu baino gehiago bertan igaroz.

Gosaldu dugunetik behin baino ez dugu ura edan, eta oraindik ezer jan gabe goaz. Korridoreko tentsioak eta bertatik ateratzeko geroz eta gogo haundiagoak jatea burutik kendu digute. Oso ahul heldu gara bi Astazouen arteko lepora.

Tucarroya aterpetxerako bidea luze egiten da, batez ere azkeneko errepetxoa! Pausuak kontatuz eta deskantsatuz goaz, Everesteko azkeneko aldapan bageunde bezala. Tucarroya izan da gure salbazioa. Bertan katalan eta aretxabaletako beste bikoarekin bapo jan eta ia bi ordu egon gara deskantsatzen. Hala ere ezin izan dugu eramandako janari guztia jan. Zopa beroa, Arroz-esnea, bi ogi, hiru txerriki poltsa, fruta, Mikelen barrita poltsa, termoko esnea, etab. gehiegi dira hiruontzat!

Kotxerako bidea beste animo batzuekin egin dugu, bapo jan et deskantsatu ondoren. Hala ere bide luzea da Horquette d'Alans eta Espugueteko aterpetxetik barrena egin behar dena, eskerrak erraketak ditugun.

8etan heldu gara Gavarnira, egun ederra eta sufritua pasata. Gaurkoan ere lekzio onak ikasi ditugu jan edanari buruzkoak, lehendik bagenekizkienak baina gogoratzea ondo etortzen direnak. Swan ederra da, baina gauzak argi eduki behar dira bertara sartu aurretik, ez baita txantxetan hartzeko korridorea.

Datu teknikoak

  • Ibilbidea: Astazou handia Swan korridorea
  • Igoera data:05-05-2013
  • Desnibela:1200 m.
  • Kokapena:Pirinioak
  • Kategoriak : Korridorea, Kranpoiak
  • Zailtasuna:AD+ (Balditzen arabera, hasierako urjaizi izoztuak bertikaltasun handia hartu dezake.)
  • Korridorearen graduazioa:80º
  • Izotz eskaladaren zailtasuna:WI3
  • Nola iritsi:Gavarnira kotxez. bertatik Pailla aterpetxera 1h.15`
  • Igotzeko denbora:14 ordu (5 korridorean)
  • Ezaugarriak:Urjauzia hasieran, 80º max. Jarraian 45-50ºko kanala
  • Materiala:Kaskoa, bi piolet, soka, zintak, 4-5 torloju, linterna
  • Garaia: Negua, Udaberria
  • IBILBIDEAREN DATU GUZTIAK IKUSI

Krokisa

Swan

Igotzen diren mendiak

Lo egiteko aterpetxeak

Natur guneak

Erlazionatutako ibilbideak

Iruzkin bat egin

Gureak eta beste batzuen Cookie-ak erabiltzen ditugu, webgune honen erabiltzaileen nabigazioaren analisia egin ahal izateko.
Nabigatzen jarraitzen baduzu, onartzen duzula suposatzen dugu. Nahi izanez gero, konfigurazioa aldatu edo informazio gehiago jaso ahalko duzu hemen.