De en Medio Ertza PD+

Capra Alpina(e)k idatzia.
3890
bisita

Coronas Zubitik atera eta Coronas Laku Ertain inguruan gaua pasa ondoren, goizeko bostetan jaiki eta gure pausoak Cregüeña lepora norabidean zuzentzen ditugu. Behin zeharkatu eta dagoeneko Cregüeña isurialdean, Maldito gailurrera (3.350 m) eramango gaituen Arlaud korridorera zuzentzen gara, bertatik hasten bai da Cresta de en Medio ertza.

Tontorretik De En Medio Ertzak granito bloke handi segida dirudi, itxuraz zailtasun handiegirik ez duena, baina gainditzen joango garen heinean, konturatzen joango gara horrela ez dela. Punta Astorg monolitoa oso gertu ageri zaigu, zertxobait urrunago Del Medio Tontorra ikus dezakegu eta atzean Aneto handia Estasen Korridore eta guzi.

Aneto Glaziarrera dugun eroriak zirrara sortzen digu, non jendearen joan etorria etengabea den. Ekainean ba gaude ere eta denboraldian zehar elur jausiak ugariak izan badira ere, glaziarren atzerakada oso nabaria da. 2.880 m altueran aurkitzen den Portillon Superior ingurunean elur falta oso nabari dela ikus dezakegu.

Harri bloke handien artetik SSE norabidean ibiltzen hasten gara eta apenas 5 minutuan, amildegian desafioka zutitzen den monolito ikusgarrira, Punta Astorg 3.355 m puntu gorenera iristea lortzen dugu.

Kanal txiki batetik tximinia estu batera iristen gara eta zuzenean, ebaki sakon batera eramaten gaitu. Bertara iritsi ahal izateko kanal arriskutsu bat jaitsi dezakegu (III+) edo beste aukera rapelatzea izango litzake (30 m). Eskuin aldean rapel aingura lekua aurkitzen dugu (kordinoak) eta ebakiaren sakonera iritsi bitarte bertatik zintzilikatzen gara. Sokaren mugimenduek rapel aingura inguruan aurkitzen diren harriak bota litzake eta horrek, kontu handiz ibiltzea behartzen digu.

Dagoeneko ebakiaren sakonean, kanal ezegonkor batek Coronas isurialdera jaitsiera hasten du (II+), baina ahaztu eta ertzaren gailurra berriz harrapatu asmoz tximinia estu batetik igotzen hasten gara. Tximinia tente eta erabat desegindakoa (15 m), helduleku oso ezegonkorrak eta fidagarritasun gutxikoak ditu eta tentu handiz eskalatu beharrean gara (III+).  

Hemendik aurrera ertza askoz ere zorrotzago bihurtzen da eta jendarme txikiz bete, ego aldeko isurialdetik zeharkatzen direnak (itoak). Karrusel bat bai litzan igo eta jaitsi etengabe egiten dugu dorre bereizgarri baten ingurura bitarte eta kanal batetik zuzenean igoz gainditzen dugu, Torre Fenix du izena.

Ebaki berri batek altuera galdu arazten digu eta naiz zailtasun handiegirik ez duen (II+), arroken ezegonkortasunek adi mantentzea behartzen gaitu. 

Pico del Medio ingurura gerturatzean, Coronas isurialdetik momentu batez aldendu eta Aneto glaziar isurialdetik zeharkaldi txiki bat egiten dugu eta zailtasun handiegirik ez ba du ere, amildegia hankapean eramateak zirrara sortzen du.

Coronas isurialdera berriz itzuliz, bloke handi segidak zuzenean Pico del Medio gailurrera eramaten gaitu 3.349 m (1:15h).Talaia ikusgarria nola nahi ere eta bertatik ertz guzia ikus dezakegu, bai zeharkatu dugun zatia, bai zeharkatzeko geratzen zaiguna ere. Inguratzen gaituen bakardadea erabatekoa den bitartean, jendetza glaziarrean zehar etengabe ibiliz doa.

Bloke handi artean Coronas lepora bidean jaisten jarraitzen dugu. Ertz zati hau askoz ere zabalagoa denez zailtasunik ez du eta erraztasun handiz altuera erraz galtzeko aukera ematen digu.

Del Medio Lepo ingurura iristen gara (3.261 m), haize izoztuen pasarte eta Aneto glaziarretik zuzenean Del Medio Ertzera igo bide. Coronas isurialdetik Pico Coronas norabidean jarraitzen dugu, Aneto handi eta Estasen Korridore nabarmenaren begiradapean. 

Apenas 10 minutu eta inongo zailtasunik gabe Pico Coronas gailurrera iristen gara 3.298 m. (1:45 h). Ondoren sakonune txiki batera jaitsi, Pico Coronas eta Pico Tuca de Coronas artean aurkitzen dena, eta bertatik elurretara iristeko aukera dugu, bloke handien artetik ibiltzea saihestuz. 

10 minutu geroago Tuca del Collado de Coronas 3.286 m gailurrera iristen gara. Coronas lepora iritxi aurretik, azken begirada botatzen dugu Pico Coronas eta Pico del Medio aldera, non azken hau tente eta arro ageri den zerumugan.  

Bat batean ertza kanal bertikal eta desegin batetik jaisten hasten da, non kontu handiz ibili behar dugun ainbat harri bezala biraka erori nahi ez ba dugun. Metro batzuek geroago, kanalak ezkerrera biratzen du Aneto Glaziar isurialdera eta ertzetik aldentzen da Glaziar elurretan sartuz. 

Coronas lepo oinpean dagoen sakonune txiki bat saihestu asmoz jaisten jarraitzen dugu, non Coronado laku bitxia kokatzen den. Igoera txiki bat medio, Coronas lepotik Aneto gailurrera doan bide arrastora iristea lortzen dugu.

Bide arrastoa jarraituz eta metro bakan batzuek jaitsiz, Coronas lepora iristea lortzen dugu 3.198 m, non elur arrastorik ez dugun ikusten. Jaitsieraren lehen zatia oso bertikala eta arriskutsua da, zeren oso labainkorra dago bidea eta boten zorua bustia dugunez, irristadaren batetik ez gara libratzen.

Coronas Glaziarrera iritsi bezain laster, elurra oso biguina dagoela konturatzen gara eta naiz arrasto nabaria dagoen, malda behera ibili baina gehiago labain egiten dugu. Estasen Korridoretik datorren oihu zirraragarri batek ustekabean harrapatzen gaitu eta okerrena pentsatzen hasi bagara ere, eskiatzaile bat korridore azken zati estutik ateratzen ikusten dugu. Adrenalina deskarga ez da gutxiagorako, zeren bertatik jaitsi ahal izateko teknika itzela eta adore aparta beharrezkoak dira, bejondeiola.

0:55 h eta gero Coronas Laku Ertain ingurura iristen gara eta erabat izoztua dagoela ikusten dugu. Ezkerraldetik zeharkatuz lakuaren isurbidera iristen gara eta etengabeko 5:00 h eta gero, kanpin denda txikia dagoen lekura iristea lortzen dugu. 

Kanpin denda, esterilak eta zakua jaso ondoren, motxilak bizkarreratu eta aurreko egunean igo genuen malda jaisten hasten gara Vallibierna eta Culebras mendien begiradapean. Ordu bat geroago Coronas Zubira ahituta iristen gara.

Datu teknikoak

  • Ibilbidea: Pico Maldito Arlaud korridorea Pico Maldito
  • Kokapena:Pirinioak
  • Kategoriak : Eskalada klasikoa, Korridorea, Kranpoiak, Mixtoa
  • Zailtasuna:AD+
  • Harri eskaladaren zailtasuna:IV
  • Korridorearen graduazioa:55º
  • Ibilbide zirkularra:Bai
  • Hasiera puntuan amaitzen da:Bai
  • Iristeko denbora:4:05 h Ertza
  • Nola iritsi:Coronas zubitik
  • Igotzeko denbora:6:00 h
  • Jeisteko denbora:1:55 h
  • Ezaugarriak:Hasieran 3 eskalada luze IV-ko zailtasunekoak eta 55º-ko korridorea
  • Materiala:60 m-ko soka, Friend batzuek, zinta bakar batzuek, kranpoiak eta pioleta
  • Egoera:Elur baldintzak oso onak
  • Garaia: Udaberria
  • IBILBIDEAREN DATU GUZTIAK IKUSI
Gureak eta beste batzuen Cookie-ak erabiltzen ditugu, webgune honen erabiltzaileen nabigazioaren analisia egin ahal izateko.
Nabigatzen jarraitzen baduzu, onartzen duzula suposatzen dugu. Nahi izanez gero, konfigurazioa aldatu edo informazio gehiago jaso ahalko duzu hemen.