Piméné - 2.801 m.

Capra Alpina(e)k idatzia.
3291
bisita

Gavarniera itzultzea, betidanik, ziragarria izaten da. Askotan joan garen harren, lehenbiziko aldiz sentitu genuen inurridura berdina sentitzen dugu. Inolako dudarik gabe, Perineoan dagoen leku berezi eta paregabeena. Familia guzia gerturatu gara oraingoan, Piméné mendia igo asmoz. Dudarik gabe, Gavarnieko zirko harrigarriaren behatoki hoberenetakoa. Zailtasun tekniko handiegirik ez du, baina gainditu behar den desnibela kontutan izanik, 1.428 m. Gavarnietik, luzea eta bereziki gogorra egiten da.

Gavarnieko Oxigene ostatuan lo egin dugu; betidanik Tintin eta Moniquek zoragarria hartu gaituzte. Gosaldu dugu eta kale nagusian zehar abiatu gara, Gavarnieko zirkora norabidean. Oraindik goiz da eta turisten desfilea ur jauzi bidean ez da hasi. Turistek alokatzen dituzten asto eta zaldiek prest daude eta zain. Onartu behar dut alokatzea burutik pasa zaigula, aurrerantz dugun ibilbidea erosoago egin asmoz, jajaja ….

Erreka zeharkatu asmoz, egurrezko zubi bat erabiltzen dugu, kanpin inguruan. Aurreraxeago zirkura doan bidea utzi eta ezkerrera jarraitzen dugu, gurutze bidean dauden kartelak jarraituz. Bidea, atsedenik gabe eta sigi-saga ugari eginez, altura irabazten doa basoan zehar. Basotik atera aurretik iturri batekin topo egiten dugu. Ur hotza ateratzen denez, kantinplorak bete ahal izateko baliatzen dugu.
Basotik irten gara; eskuinera Pailla txabola ikusten dugu Swan korridorearen azpian, Astazou txiki eta handiaren artean dagoena.

Muino baten gainean Espuguettes aterpetxea (2.027 m.) ikusten dugu, 200 m. gure gainetik. Igotzen jarraitzen dugu lehenbailehen iritsi asmoz. Batzuek arnasestuka hasi dira, desnibelak ez du barkatzen. Iritsi gara eta merezitako atsedenez gozatzen dugu. Begien aurrean azaltzen zaigun ikuskizuna paregabea dirudi, Gavarnieko zirkuaren edertasuna aurrez aurre dugu.

Atsedenaren ondoren bideari jarraitzen diogu malda berde eta desnibel gutxi dutenetik. Zailtasun handirik gabe Plateau de Cardons (2.266 m.) ingurura iritsi gara, bertan bide gurutzea dago. Eskuinera jarraituz Horquete d´Alans (2.430 m.) norabidean joango ginateke; ezkerrera berriz, Piméné gailurrera. Suge bat bailitzan, bideak sigi-saga handiak eginez altura azkar batetan irabazten du. Gutako batzuek goizean ikusi ditugun astoekin amets egiten dugu, errazago igoko ginateke. Piméné lepora iritsi gara (2.522 m.) eta bertatik Estaubeko zirkura irten. Bideak ertzetik jarraitzen du.    

Petit Piméné gailurrera iritsi gara (2.667 m.). Azken ahalegin bat geratzen zaigu, baina behin hemen, atseden txiki bat merezi dugu. Pena handiz, Anttonek gailurrera ez joatea erabaki du. Ertzetik jarraitu beharrean gara; bi gailurren tartera jaitsi behar dugu horretarako. Ez du zailtasun handiegirik, tarteka eskuak erabili behar izanda ere. Konturatzerako Piméné gailurrean gaude (2.801 m.).

Gavarnieko zirkuko behatoki ezin hobea dela esaten dutenek ez dute arrazoi faltarik. Ikuskizuna harrigarria da. 360º bira eginez ikus ditzakegu: Nouvielle mendigunea eta Pic Long, Troumpouse zirkua eta Munia, Estaube zirkua, Gavarnie zirkua dituen gailur ederrekin, Vignemal mendigunea glaziarra barne eta beste hainbat gehiago. Eguna eguzkitsua da eta ikusmena ezin hobea.

Ikuskizunaz gozatu, atseden hartu eta zerbait jan ostean, bidea desegiten dugu. Behin basoaren mugan, norabidea aldatu eta ezkerrera jarraitzen dugu pinudi eder batetik zehar, Gavarnie zirku eta ur-jauzira bila. Azkenik,ur jauzia ikustetik datorren jendetzarekin nahasten gara, hauek bai, guk ez bezala, asto eta zaldiek alokatu dituzte. Dagoeneko Gavarnie herrira itzuli gara.                                                                          

Datu teknikoak

  • Ibilbidea: Piméné Espuguettes aterpetxetik
  • Igoera data:27/09/2009
  • Luzera:20.200 m
  • Desnibela:1.426 m.
  • Kokapena:Pirinioak
  • Kategoria : Oinezko igoera
  • Zailtasuna:F
  • Iristeko denbora:4:30 h
  • Nola iritsi:Gavarnietik (1.375 m.)
  • Igotzeko denbora:9:30 h
  • Jeisteko denbora:5:00 h
  • Ezaugarriak:Zailtasun teknikorik eskaintzen ez badu ere, ez da txango erraza duen desnibela kontunak izanik.
  • Materiala:Makilak
  • Garaia: Uda, Udazkena, Udaberria
  • IBILBIDEAREN DATU GUZTIAK IKUSI
Gureak eta beste batzuen Cookie-ak erabiltzen ditugu, webgune honen erabiltzaileen nabigazioaren analisia egin ahal izateko.
Nabigatzen jarraitzen baduzu, onartzen duzula suposatzen dugu. Nahi izanez gero, konfigurazioa aldatu edo informazio gehiago jaso ahalko duzu hemen.