Gorbea Pagomakurretik

Capra Alpina(e)k idatzia.
4708
bisita

Iragarkiek aste bukaera ona aurri-kusita dute eta etxean egoten ez dakigunez, zerbait egin genezakeela pentsatzen hasi gara. Pirineora joateko baldintza txarrak daudenez, elurra batez ere, inoiz joan gabe gauden Gorbea mendira joatea pentsatu dugu. Autoa hartu eta Arratia aranera zuzendu gara, bai leku polita, eta Areatza herritik gora Pagomakurre aparkalekura igotzeko asmotan. Autoz betea dago baina ahal izan dugun bazter batetan utzi dugu eta oinez hasi maldan gora.

 

Pista zabal batek gorantz eramaten gaituen bitartean haize bolara indartsuak astintzen digu. Udarako arropekin abiatu gara, galtza motzak eta kamiseta manga motza, eta egia esan hotza pasatzen ari gara. Hasieran galbiderik ez duen pista jarraitzea besterik ez dugu, Lekandako hormen azpitik. 30´erabili ditugu Arrabakoate zelaietara iristeko, leku polita benetan. Bertan Elorriaga aterpetxea aurkitzen da.

Dagoeneko pista utzi dugu eta alfonbra bat dirudien belardi batetik goaz, Aldapeko pasabidea bilatuz, bertan oraindik ere elurra zapaltzeko aukera dugu. Zastegiko gainera iritsi gara eta bertatik Egiriñao zelaiak ikusten ditugu. Pagadi txiki bat ere badauka aterpetxe eta guzi. Bertatik igarotzean ikusi dugu Aldamin arroketan kapila txiki bat dagoela, Elurretako Ama, itxuraz orain gutxi arte bertan igandero meza ospatzen zen bertako artzain eta txakurren begiradapean. Guk ikusi ez arren, bertan iturri bat dago Lekuotz izenez ezaguna.


Aldapa tente bat igo beharrean gaude, hasieran harrikari batetik eta ondoren belarretatik, Aldamiñospe lepora eramaten gaituena, Aldamin eta Gorbea erdian aurkitzen dena. Jende asko dabil inguru hauetan haizeak gogor astintzen segitzen duen arren. Autotik atera garenetik Gorbeako gurutza begi bistan izan dugu baina hemendik, gertu gaudenez, handiagoa ikusten dugu. Azken aldapa tente bat gelditzen zaigu inongo zailtasunik ez duena baina esfortzu dezente eskatzen diguna. Haizeak ekartzen dizkigun jende ahotsak pentsa arazten digu goran daudenak asko direla. Gerturatzen goazen heinean jende multzo handi bat ikusten dugu gailurra baina beherago haizetik babestu nahian. Tartetik pasatuz gurutze handiaren azpiraino joan gara, Gorbea gailurrean gaude (1481 m.). Nola astintzen digun haizeak, ez da harritzekoa jende guztia babesean egotea, hotza izugarria da eta denbora askorik ezin dugu bertan egon, kontutan izanda gure arropa eskasak. Hirukote batek argazki bat ateratzeko eskatu digu eta ordainetan guk ere gauza bera eskatu diogu. Bista izugarriak ditu edozein lekutara begiratuta ere, baina gaur ez daukagu paisaiaz asko gozatzeko aukerarik eta lehenbailehen berantzako bidea hartu beharrean gara.

Aldamiñospe lepoan gauza kurioso bat ikusten dugu. Hirukote bat bertan da eta bat batean gainean duen motxila kendu du batek eta bertatik txirrindu txiki bat atera du plegatuta noski eta zabaldu. Itxuraz bere asmoa aparkalekura bertan jaistea da, baina ez dakit zer pentsa. Hasi da berantz eta aurreneko metroak ondo jaitsi baditu ere, lehenbiziko harrietara iristen den bezain laster, lurrera erori da eta harri baten kontra gerri inguruan izugarrizko kolpea hartu ere. Ez zuen itxura onik gazteak.

Gure bidea jarraituz Egiriñao aterpetxera iritsi gara, baina itxita dagoenez arroka batetan eseri gara eguzkitan zerbait jan asmoz. Hotz geratzen ari gara eta jarraitzea erabaki dugu. Aldapeko pasabidea zeharkatu eta Arrabako zelaietara jaitsi gara, bertatik pistaz autoa utzi dugun aparkalekura iristeko (3h.).

Gosea dugu, ez alferrik eguerdiko ordu-biak dira eta etxera bidean Getaria herrian gelditzeko asmoa dugu, bertan bazkaldu asmoz. Bai egin ere eta kaian dagoen jatetxe bateko terrazan eseri gara eta dotore jan ere. Ideia ezin hobea izan dugu.

Datu teknikoak

  • Ibilbidea: Gorbea Pagomakurretik
  • Igoera data:13/04/2013
  • Desnibela:611 m.
  • Kokapena:Euskal Herria
  • Kategoria : Oinezko igoera
  • Zailtasuna:F
  • Iristeko denbora:1h.45´
  • Nola iritsi:Pagomakurreko aparkalekutik. Areatzatik 9 km. pistaz.
  • Igotzeko denbora:3h.
  • Jeisteko denbora:1h.15´
  • Garaia: Uda, Udazkena
  • IBILBIDEAREN DATU GUZTIAK IKUSI
Gureak eta beste batzuen Cookie-ak erabiltzen ditugu, webgune honen erabiltzaileen nabigazioaren analisia egin ahal izateko.
Nabigatzen jarraitzen baduzu, onartzen duzula suposatzen dugu. Nahi izanez gero, konfigurazioa aldatu edo informazio gehiago jaso ahalko duzu hemen.