Gayolo Korridorea. Ezustekoen eguna

Capra Alpina(e)k idatzia.
4086
bisita

Kordada osatzen genuen 3etatik inork ez dugu Gayolo eguna ahaztuko. Korridore honek izen xelebrea edukitzeaz gain, bertan bizitako ezustekoek eta itzuleran eduki genuen elur-jausi txiki hark berezi egin zuten egun hura. Ezer larririk pasa ez zen arren, mendian arretaz joan eta errespetu osoa edukitzearen garrantzia haundia gogorarazi zigun.

 

Goizeko 7etan abiatu gara Canal Royako aparkalekutik, eta Rioseta kuartela ezkerrera utziz sartu gara bi korridore ezagun dauzkan bailarara. Pico del Aguila da lehenengoa eta ezagunena, bailaran sartu eta berehala ezker aldera jo behar delarik bertatik igotzeko. Korridore honen zailtasuna ikusirik (D-), Gayolo korridorea egitea erabaki dugu (AD) zertxobait errezagoa eta egokiagoa hastapenetan dabiltzan mendizaleentzat.

Aurreko egunean elurra egin du, eta horregatik aukeratu dugu altuera gutxian dagoen korridore hau. Hala ere, uste baino elur gehiago dago.  Hiruon artean txandaka joanda ere, zail egiten zaigu bidea irekitzea.

 

Ordu terdian korridorera heldu gara, eta zerbait jan ostean berehalakoan prestatu gara goruntz ekiteko. 2 luze egingo ditugu guk, lehenengo zatiko harri guztiak elurtuta baitaude, eta lehenengo luzean helduko gara bilera egiteko pinura.

Unai hasi da aurretik, eta kanaleko oztopo bakarrean nekez doa aurrera. Azpiko izotzak biguntzen hasita daude eta pioletak harrian katiatzea ere zail egiten da, elur berria baitago gainetik.  Bilera egiteko pinura heltzen da, 60 metroko soka guztiz luzatuz. Ondoren ni noa eta jarraian Mikel hasi da gorunzko bidea ekiten.

Pinutik oztopoa ikusten ez den arren, bapatean soka teinkatzen da. Mikel irristatu eta pare bat metro egin ditu atzera. Elurraren egoera ez da onena korridoreak egiteko, baina bigarren saiakeran erraz lortzen du guregana heltzea.

Bigarren eta azken luzea ere Unaiek irekitzen du, gaurkoan bera baitabil abilen. Nire txanda heltzean, kranpoi azpian pilatutako elurrarekin irristatu eta korridore erdiraino penduleatzen dut. Pinua korridorearen ertzean dago, eta azkar egin ditut berriz kanal erdira sartzeko dauden metroak. Azkarregi esango nuke nik! Eskerrak bilera ondo montatua dagoen! Kranpoi eta pioletak erdi soberan dauzkagu, eta ez da harritzekoa komerietan ibiltzea elur baldintza hauekin.

11k aldera, azkenik lortu dugu korridoretik irtetea. Benetan motza da, baina berriz egiteko gogoz geratu gara, hori bai, elur gogorra dagoen beste batean!

Candanchuko Tucako kafetegia zain dugu. Ez da korridore asko egongo irteeran horrelako aukera duenik koka-kola bat hartzeko. Bertan jan eta edan dugun arren, pena pixka bat ere ematen du korridorean horrelako bakea eduki eta gero han goian horrelako jende pilaren artean ibiltzeak. 12:30ak aldera beheruntz hasi gara.

Unai eta Mikel aurretik doaz, eta ni atzetik polikixeago, belauneko minez bainoa. Ertz txiki batera heltzean, zabaldutako bidetik ateratzea erabaki dut, eta nolabait bidea moztea lagunengana heltzeko.  Ertza igaro ostean berehala leuntzen da malda, ibon txiki bat sortzen delarik uda partean.

Ertza igaro eta elurretan eseri naiz jeisten jarraitzeko. Bat-batean konturatu naiz ez dudala elurretan irristatzen, eta elurra bera dela behera doana elur zaharraren gainean labainduz. Plaka elur-jausi bat da, eta ni noa bertan buru. Unai aludearen bidetik kanpora dago, eta Mikel saltoka irten da ahal duen bezala. Elur-jausiaren hotsa haundia da elurra tolestean, batez ere gainean bazoaz. Malda txikitzen doan heinean gero eta polikiago doa, guztiz geratu arte. 10 segundu besterik ez ditu iraun, baina zer pentsatu haundia ematen du, beste behin ere elurraren bat batekotasuna agerian jarriz.

Plakak 30x10 metro dauzka gutxi gora behera, eta 20 metro egin ditu behera, 10 bat tona elur mugituz.

Zorte dexente eduki dugu, elur-jausia gertatu den lekuan ez baitzegoen arrisku haundiegirik. Hala ere arriskutsua izan zitekela dudarik ez dugu azpian harrapatuz gero.

Egun honetan gauza asko ikasi ditugu mendian. Beti joan behar da azti, nahiz eta askotan konfiantzaz gainezka joaten garen.

Guk behintzat hemendik aurrera beste errespetu batez begiratuko diogu elurrari, eta espero dugu irakurleak ere lekzioa ikasi izana.

 

Datu teknikoak

  • Ibilbidea: Gayolo korridorea
  • Igoera data:07-04-2013
  • Desnibela:600 m.
  • Kokapena:Pirinioak
  • Kategoriak : Korridorea, Kranpoiak, Mixtoa
  • Zailtasuna:AD (Elur gutxi badago, IV-ko pausuak. Elurrarekin, indarra eskatuko digun pausu mixto bat.)
  • Harri eskaladaren zailtasuna:IV
  • Korridorearen graduazioa:60º
  • Eskalada mixtoaren zailtasuna:M4
  • Luze kopurua:2 - 4
  • Nola iritsi:Canal Roya haraneko aparkalekutik Rioseta kuartelera abiatu. lehen 500 metroak errepidean eginez.
  • Igotzeko denbora:5 ordu (korridoreak 2)
  • Ezaugarriak:Elur kopuruaren arabera, 2-tik 4 luze bitartean.
  • Materiala:Kaskoa, kranpoiak, pioletak, soka.
  • Garaia: Negua, Udaberria
  • IBILBIDEAREN DATU GUZTIAK IKUSI
Gureak eta beste batzuen Cookie-ak erabiltzen ditugu, webgune honen erabiltzaileen nabigazioaren analisia egin ahal izateko.
Nabigatzen jarraitzen baduzu, onartzen duzula suposatzen dugu. Nahi izanez gero, konfigurazioa aldatu edo informazio gehiago jaso ahalko duzu hemen.