Astazou - Cilindro de Marbore - logikarik gabe

Capra Alpina(e)k idatzia.
4752
bisita

Libre dugun aste bukaera bakoitzean Perineotara joatea gustatzen zaigu gogoko ditugun gauzez gozatzeko, mendia eta bere ingurua. Gaurko honetan Astazou tontorrak eta Cilindro de Marbore igotzeko asmoa dugu, egun berdinean igotzea logikarik ez dute, baina taldeko batzuei igotzea falta zaizkienak dira. Horretarako Pinetako zirkura eta bertan dagoen aterpetxera gerturatu gara, ingurune aparta baina  oso ere masifikatua dagoena, errepidez iritsi daiteke.

Gaua Pinetako aterpetxe erosoan pasa dugu (1250 m.) eta gosaldu ondoren, zirkuaren barrenean dagoen aparkalekura gerturatzen gara eta bertatik oinez hasi, 0h

Pista bikain batek basoaren barrenera eramaten gaitu, Cinca ibaiaren inguruan gabiltza. Basotik ateratzean poste adierazle bat aurkitzen dugu (1400 m.) 30´, bidetxur batek itxuraz ur-jauzi ingurura eramaten gaitu baina iritsi aurretik eskuinera saihestuz, igotzen hasten gara ezinezkoa dirudien horma, lehenbiziko harrizko bagaren azpian gaude eta eskuinera zeharkaldia eginez igotzen dugu.  Aldapa oso tentea da eta behartzen gaitu sigi-saga ugari egitera gainditzeko. Uhar baten parera iritsi gara eta ur freskoa eramaten duenez kantinplorak betetzeko erabiltzen dugu (2050 m.)1h.30´.

Gorantz jarraitzen dugu gure ezkerretik bira batzuek tarteko, igo ezinezko horma baten azpira iristen garen arte, eta behin bertan eskuinera biratuz, ezproi bat igoz kanal batetan sartzen gara (2320 m.). Neguan Pinetako balkoirako igoera honek elur jauzien arrisku handia du 30º-35º.  Azken muino bat gaindituz Balkoiaren lautadara iristen gara, bere inguruan burdinazko gurutze bat dago (2500 m.) 2h.30´. Aurrean duguna ikusteagatik bakarrik merezi du hona igotzea. Aldaparik gabe Marbore laku bila goaz, Tucarroyako ebaki ikusgarriaren azpian dagoena eta behin bertan, lehen atseden unea hartzen dugu.

Gure helburuak ikusgai dira hemendik. Lehenik eskuinean ditugun Astazou mendietara abiatzen gara, Tucarroya mendiaren jarraian daudelarik. Laku urdina atzean uzten dugu bide nabarmen bat segituz, goranzko norabidean desegindako harri-gune batetik. Gutxika bada ere ibiltzen goazen bidea oso ezegonkor gertatzen da, zeharkatzen goazen malda harri deseginez egina bai dago, orrek zailtzen duenarekin aurrera jarraitzea, batez ere aldapa gora bada. Ahalegin handia egin eta gero Swan lepo estura iristen gara (2964 m.) 4h.15´. Ikusminez korridorea ikustera azaltzen gara, orain elurrik ez dauka eta izaten duenerako utzi beharko dugu bertatik igo ahal izateko. Eskuinera hartzen dugu Astazou handira igotzeko asmoz, lehenbiziko ezproi bat igoz harri solte eta harkaitz irtengune batzuetatik, azken ertza harrapatu arte eta arazorik gabe jarraituz Astazou handira iristen gara (3071 m.) 4h.45´.

Perdido, Cilindro eta Marboreko ipar isurialdea dugun ikuskizuna harrigarria da. Bestaldeko isurialdera begiratzen badugu Troumouseko zirkua Munia bereizten delarik, Robiñera eta Nouvielleko arana Pic Long eta Campbiel ikusten ditugu. Asko dugu egiteke eta jaisteko erabakia hartzen dugu Swan lepora iristeko eta Astazou txikirako azken igoera hasteko. Bloke handi batzuek gainditu behar ditugu (I) bidea oztopatzen bai dizkigute, ondoren pikotxetan pasa beharreko zati bat dugu harri handi baten azpitik, amildegia iparrera duelarik, gailurreko ertzean uzten gaituena Astazou txikira iristeko (3012 m.) 5h.15´. 

Altura ez galtzearren zeharkaldi bat egiten dugu Marbore eta Cilindro oinarritik, legarrez eta elurrez beteriko morrenatik eta gure segurtasuna bermatzearren kranpoiak janzten ditugu. Oso nekea egiten zaigu tarte hau eta aurrez pentsatu baina denbora gehiago pasatzen dugu. Goazen lauetatik bi Pinetara jaistea erabakitzen dute, gu berriz aurrera jarraitzen dugu Cilindrora igotzeko saiakerarekin. Horretarako hormaren oinarrira gerturatu beharrean gara, Perdido glaziarraren azpiko irtengune bateraino (2700 m.). Eskalada erraz batek (II+) oso tentea izanagatik, soka finkatzeko hornitua dagoena, glaziarra dagoen goiko plataformara iristeko aukera ematen digu. Gure eskuinera zeharkaldia eginez elur eta izotz hegal batetik, aldapa harritsura iristen gara eta esfortzu handiz eta tarteka atsedenak hartuz, Cilindro lepora gerturatzen gara (3074 m.). Bestaldeko ebakidura gainditzeko ezkerretara joan behar dugu mugarriak jarraituz. Erdiko plataformara jaitsiz, ondoren oinarriko harrikarira laku izoztuaren inguruan. Korridore bat igotzen da (E) inklinazio handia duena (30º elurrarekin) harri eta eremu ezegonkor batetik, igotzea oso zail egiten diguna. 175 m. desnibela du baina a zer nolako desnibela.

Oso nekaturik baina Cilindro lepora igortzea lortu dugu eta tximini nagusian talde bat dagoela ikusten dugu, sokekin erraztasunik ez duena. Bustirik gaude eta hotz geratu aurretik, tximini nagusian ezkerrera dagoen beste batetik igotzen gara, rappel egiteko ainguralekurik ez duena. Sokaz lotu gabe eta zailtasun handiegirik gabe igotzen dugu eta behin gaindituta itsu-itsu Gailurra bila goaz. Azken aldapa erraz batek Cilindro de Marbore gailurrera eramaten gaitu (3325 m.) 8h.35´.

Gure poza izugarria da. Egia esan behar ba dut ez genuen oso garbi gailurra zapalduko genuenik. Aukeratu dugun ibilbidea ez da oikoa Cilidro gailurrera iristeko Astazou mendiekin lotu bai dugu. Gure helburua falta zitzaizkigun gailurrak igotzea zen eta lortu dugu, naiz eta erraza ez den izango inork errepikatzea. Azkar batean zerbait jaten dugu eta jaisteko prestatzen gara, oraindik ere asko falta bai zaigu Pinetara iristeko eta horrek ordu batzuek eramango bai digu. Igotzeko erabili dugun bidea deseginez tximiniara iritsi eta berriz ere igo garen berdinetik jaitsi zailtasun handiegirik gabe. Igotzea hainbeste kosta zaigun korridorea bat batean jaisten dugu, a zer nolako diferentzia. Dagoeneko laku izoztuan gaude, gure ezkerretara biratu eta horma eskalatzen hasten gara Cilindro lepora iristeko mugarriak jarraituz eta behin bestaldean, glaziarrera iritsi arte eta zailtasunik gabe gainditzen duguna. Behin irtengunean eta gure segurtasunez, soka ateratzen dugu eta arnesa jarriz jaitsi egiten gara.

Dagoeneko legarrezko morrenan gaude eta Pinetako balkoiaren norabidean. Bukaezina egiten zaigu jaitsierako zati hau, seguruenik nekaturik gaudelako izan daiteke eta lehenbailehen aterpetxera iritsi nahi dugu. Behin balkoiaren ertzean 12 h.Pinetako azken jaitsiera zorabiagarria hasten dugu. Ahal dugun azkarren goaz, nahiz eta zati bat korrika egiten dugun daramagun ibilbidea eta gero, ez dugu gure bi lagunek kezkatzerik nahi. Eguna bukatzen hari da eta behin basoan ezer gutxi ikusten dugu. Eskerrak bidea oso erabilia den eta oso zapaldua, horrek estropuz egiteko arriskua gutxitzen digu. Unai iristen da lehen aparkalekura eta ni berriz 20:15 h. Goizean atera garenetik 12h.45´pasa dira eta dagoeneko esanda dagoen bezala, ez da ibilbide egokiena izan baina gure helburua lortzeko aukera bakarra zena. Ala eginez beste egun bat izango dugu beste igoera bat egiteko.   

 

Datu teknikoak

  • Ibilbidea: Astazou handia Pinetako balkoitik
  • Igoera data:10/09/2011
  • Desnibela:2.078 m.
  • Kokapena:Pirinioak
  • Kategoria : Oinezko igoera
  • Zailtasuna:F
  • Hasiera puntuan amaitzen da:Bai
  • Iristeko denbora:8h.35´
  • Nola iritsi:Pinetako zirkutik. 11 km. errepidez Bielsatik eta 56 km. Ainsatik.
  • Igotzeko denbora:12h.15´
  • Jeisteko denbora:3h.40´
  • Ezaugarriak:Mendi garaieko ibilbidea, desnivel handikoa.
  • Garaia: Uda, Udazkena
  • IBILBIDEAREN DATU GUZTIAK IKUSI

Datu teknikoak

  • Ibilbidea: Marboreko zilindroa Pinetako balkoitik
  • Igoera data:10/09/2011
  • Desnibela:2.078 m.
  • Kokapena:Pirinioak
  • Kategoriak : Ertza, Oinezko igoera
  • Zailtasuna:PD+
  • Hasiera puntuan amaitzen da:Bai
  • Iristeko denbora:8h.35´
  • Nola iritsi:Pinetako zirkutik. 11 km. errepidez Bielsatik eta 56 km. Ainsatik.
  • Igotzeko denbora:12h.15´
  • Jeisteko denbora:3h.40´
  • Ezaugarriak:Mendi garaieko ibilbidea, desnivel handikoa.
  • Materiala:Arnesa, soka, makilak.
  • Garaia: Uda, Udazkena
  • IBILBIDEAREN DATU GUZTIAK IKUSI
Gureak eta beste batzuen Cookie-ak erabiltzen ditugu, webgune honen erabiltzaileen nabigazioaren analisia egin ahal izateko.
Nabigatzen jarraitzen baduzu, onartzen duzula suposatzen dugu. Nahi izanez gero, konfigurazioa aldatu edo informazio gehiago jaso ahalko duzu hemen.