Aizkorri otsailean

Capra Alpina(e)k idatzia.
3388
bisita

Aizkorriko mendigunea oasi bat dirudi basamortuan. Euskal geografian eta perineotako mendien salbuespenekin, bere tontorren garaiera 1500 m. dituzten bakarrak dira. Eguraldi txarrak atseden eman digula eta, bere gailur adierazgarri eta bisitatuena igotzea pentsatu dugu. Egun hauetan pilatu den elurra ere beste arrazoi erakargarri bat da.

Otzaurte Benta (670 m.) 0h. Apenas dugu autoa aparkatzeko lekurik eta ez da harritzekoa, Otzaurte aterpetxeko aparkalekura joaten den pista itxia bai dago elurragatik. Materiala berrikusi dugu, ez zaigun ezer garrantzitsua ahaztu, eta pista elurtu eta tarteka izoztua dagoenetik zehar ibiltzen hasten gara. Ez zaigu erraza egiten erritmo egoki bat bilatzea, elurretan ibiltzea oso pisua egiten zaigu eta. Minutu batzuek geroago Beundako zelaien parez pare aurkitzen gara.

Elurretan egina dagoen bide arrastoa segituz goaz aldapa gora eta pagadiaren ezkerraldetik. Elurraren lodiera handitzen doa eta izoztua egongo zela pentsatu arren, oker gabiltza. Añabaso (952 m.), Txaparri (945 m.) atzean utziz Aldaola (970 m.) mendira iristen gara. Berantz goaz bide gurutze batera iritsiz, aterpetxeko aparkaleku inguruan. Aldapa tente eta gogor batek Otzaurteko aterpetxera eramaten gaitu (870 m.) 1h.35´.

San Adriango tunel ezagunaren norabidean goaz, Gipuzkoa eta Araba betidanik lotzeko erabili dena. 20´barru sarrerako atea zeharkatzen dugu eta denbora pixka bat hartu bere balkoitik ikusten den paisaia miresteko. Zuloaren sabaian izotzezko estalaktita batzuek ikusten ditugu erortzeko mehatxatuz eta konturatzerako bat erortzen da gure ondoan. Lehenbailehen zulotik ateratzea pentsatu dugu, beste bat gure gainera eror ez dadin. Beste aldean elur mantua ikusgarria da eta bertatik ibiltzea oso zaila. Elurra oso biguna dago eta erraketak ere ez dute hondoratu gabe eutsi. Gurutze bidera iritsi gara eta eskuinera hartzen dugu kalbario aldapa beldurgarriaren bila 2h..

Pagadian zehar igotzen hasten gara pauso lasaiez. Goitik behera datozen batzuekin gurutzatzen gara. Gutxika bada ere kostata altura harrapatzen goaz eta tarteka gelditu beharrean aurkitzen gara arnasketa berreskuratzeko. Pagadian goiko aldera iritsi gara eta hanka arrastoak jarraitzen ditugu, igotzeko bide arrunta bertatik ez ba doa ere, baina egoera honetan besteek igaro diren lekutik joatea hobe dugu. Perineotan edo Alpetan gaudela dirudi eta begiratzen dugun edozein lekutara ere, elurra eta harkaitz hormak besterik ez ditugu ikusten. Aurrean zeharkatu behar dugun aldapa handi bat dugu elurrez betea eta eskuinera amildegi garrantzitsu bat duena.

Gainditzea ez zaigu zaila egiten eta bere bizkarretik jarraituz, bigarren aldapa tente bat igoz Aiztontor Altua (1453 m.) eramaten gaitu, 3h. Bere gainetik gertu dagoen Aizkorriko gailurra ikusten dugu. Altura pixka bat galdu eta ordekan zehar jarraitzen dugu azken aldaparen azpian egon arte eta zailtasunik gabe igotzen gara aterpetxe eta ermita aurretik pasatuz, Aizkorriko gurutze eta buzoia iritsiz (1528 m.) 3h.20´.

Gailurrean jende asko dago, aterpetxea ere gainezka dago eta ermita barruan ere jendea gorde da. Eguna zoragarria dugu, zerua urdina dago eta apenas dabil haizerik. Dena den tenperatura hotza dago eta denbora asko galdu gabe, derrigorrezko argazkiak ateratzen ditugu eta jaisten hasten gara. Ez dugu igotako lekutik jaisteko asmorik, Portua Zarra ondoan dagoen Leizarrate pasartetik baizik. Ezkerrera utzi dugu igotako bidea eta elur asko duen aldapa tente batetik jaisten gara. Minutu batzuek geroago pagadian sartzen gara, gorantz doazen pertsona batzuek gurutzatzen ditugu, bikote bat ere bi ahur txiki oinez eta hirugarren bat aitak bizkarrean duen motxilan sartuta, a zer nolako meritua. Belauneraino elurretan sartzen gara eta oso zail egiten digu ibiltzea. Leizarratera iritsi gara, Otzaurte eta Urbia lotzen dituen bidera eta gure ezkerrera jarraitu, Oria ibaia jaiotzen den ondotik 20´barru gurutze bide eta Kalbarioko saihesbidera iritsiz.

Hemendik aurrera igotako bide berdinetik jarraituko dugu autora iritsi arte eta denbora gutxi barru San Adriango pasabidean gaude. Behin beste aldean Otzaurte aterpetxeko norabidea jarraitzen dugu. Geldialdirik egin gabe aurrera jarraitzea erabakitzen dugu, aparkalekuaren ondoan dagoen gurutze bideraino. Beste aldapa tente batek berriz ere gure indarrak neurtzen ditu, nekaturik gaude eta elur eta urak ez digute laguntzen. Atsedenak hartuz eta kostata bada ere, Aldaola ingurura iritsi gara. Bakoitzean gutxiago falta zaigu eta horrek animoak ematen dizkigu. Azken aldapa bat gelditzen zaigu eta aurre eginez Beunda atseden lekura eraman gaitu. Azken jaitsiera gelditzen zaigu eta inongo zailtasunik gabe Otzaurteko aparkalekura iritsi gara, 6h.30´. 

Datu teknikoak

  • Ibilbidea: Aizkorri Otzaurtetik neguan
  • Desnibela:842 m.
  • Kokapena:Euskal Herria
  • Kategoriak : Erraketak, Kranpoiak
  • Zailtasuna:F
  • Hasiera puntuan amaitzen da:Bai
  • Iristeko denbora:3h.20´
  • Nola iritsi:Otzaurteko bentatik (670 m.)
  • Igotzeko denbora:6h.30´
  • Jeisteko denbora:3h 10´
  • Ezaugarriak:Neguko ibilbide luzea eta elur baldintzak onak ez badira oso neketsua egin daitekeena.
  • Materiala:Kranpoiak, pioleta, bastoiak eta erraketak ere ondo etorriko zaizkigu.
  • Garaia: Negua, Udaberria
  • IBILBIDEAREN DATU GUZTIAK IKUSI
Gureak eta beste batzuen Cookie-ak erabiltzen ditugu, webgune honen erabiltzaileen nabigazioaren analisia egin ahal izateko.
Nabigatzen jarraitzen baduzu, onartzen duzula suposatzen dugu. Nahi izanez gero, konfigurazioa aldatu edo informazio gehiago jaso ahalko duzu hemen.