Bisaurin Ipar Horma Klasikoa - 400m/D+

Capra Alpina(e)k idatzia.
512
bisita

Hecho eta Lizara aranen banalerroan, Mendebaldar Pirineo Parke Natural barnean, mendi bat beste guzien gainetik garaitzen da, Bisaurin mendia. Naiz eta 2.670 m dituen, bere ohiko bideak zailtasun tekniko handirik ez du eta negu garaian, mendi eskiatzaile edonorentzat oso ere erakargarria gertatzen da eta horrek, oso bisitatua egiten du. Bertikal eta malkartsu den ipar aurpegitik berriz, bide klasiko bat igotzen da (400 m/D+), eta bertatik igotzeko asmoa dugu.

Goizeko 6:00h-tan Lizara aterpetxetik atera gara (1.540 m), Bisaurin eta Bernera mendi zerrak osatzen duten sakan nabarira bidean. 1.705 m-ra Oldecua aterpetxe zaharrera iristen gara eta ezkerrean utziz, Bernera sakanean murgiltzen gara. Etengabeko 40º dituen malda gainditzeko kranpoiak oso beharrezkoak ditugu eta atseden handirik gabe, Plana Mistresa-ra igotzen gara (1.984 m), non egunsenti ikusgarri batek ongi etorria ematen digun.

Eskuinera Bernera Portura doan lautada zabala uzten dugu (2.115 m), Sarrios Aranera eramango gaituena eta pirineo esparru honetako paisai ikusgarrienetako bat dena. Ezkerretik jarraitzen dugu (ONO) sakan barnetik Secus Lepora bidean (2.401 m). Gorantz goazen heinean, ezkerrean kanal erraz bat uzten dugu Bisaurin ekialde aurre-tontorrera eramango gaituena (2.654 m), Secus Lepora bidean maldan gora sigi-saga ugariz jarraitu ahal izateko (35º), haizeak osaturiko erlaitzera iristeko (50º).

Gure ezkerrera Bisaurin Ipar-ekialde ertza utzi eta Secus lepoa zeharkatu ondoren, ipar aurpegi oinpera jaisten saiatzen gara. 150 m jaitsi ditugu eta jarraitu aurretik, tramankulu guziak gainean hartu, sokak arnesari lotu eta eskalada hasteko prest gaude. Eskaladak hiru gune bereizi ditu: lehen zatian malda tente bati aurre egin behar (70º), erdi gunean eskalada mixtoa (D+) eta hirugarrenean 50º-ko korridore luze bat, naiz 60º/65º-ko tarteak egon.

Eskuinera gorantzko zeharkaldi luze batek malda tente batera bideratzen gaitu (70º), non elur, zein izotz baldintzak ez diren aproposenak. Elurra bihurtu gabe dago eta izotza, apenas zarakar fin bat besterik ez, hasiera honetan ez da batere lagungarri. Korridoreak gorantz jarraitzen du horma batek bidea isten digularik, non zinta bat zintzilik ikusten dugun bainan nahiko goian. 90º ezkerrera bira egin eta metro batzuek gorago bilkura gunera iristea lortzen dugu. 

Lehen bilkura bertan aurkitzen dugun iltze batetan egiten dugu, naiz friend batekin sendotzen dugun. Onaino ensanblen igotzeko aukera izan dugu, bainan gune berri honetan ezin gara ausartu. Eskalada hastearekin batera gure burua babestea oso zail izango dela konturatzen gara. Aurkitzen dugun elur gutxia zapaltzean desegiten da eta izotza berriz, ikutzearekin batera birrintzen eta horrek, ez digu inongo aukerarik ematen. Friend edo fisurero bat jartzea ere oso zail gertatzen zaigu eta horregaitik, hortzak estutzea besterik ez zaigu geratzen.

Mugimendu txikiena ere ondo pentxatzen dugu eta horrek, oso geldi joanarazten digu. Pioletez lagundu ahal izateko dugun aukera bakarra elurra kendu eta arrokan pitzadura txikiena ere bilatzea da, piolet punta bertan sartu ahal izateko. Gutxika bada ere altuera irabazten goaz, tensioa gorantz doan bitartean. Fisurero bat jarri dugu, babesteko baino sikologikoa gehiago, eta lehen mogimenduarekin batera atera eta sokan behera dator. Ezer sartzeari utzi eta pauso seguruak ematen saiatzen gara. Bat batean iltze batetik zinta bat zintzilik ikusten dugu, non denborarik galdu gabe seguru bat jartzen dugun

Gauden lekua ez da batere erosoa bainan segurorik jartzeko aukerarik ez dugunez eta bertan bat egonik, bilkura egitea erabaki dugu berriz elkartu ahal izateko. Bigarren luzea 2 m-ko horma tente batekin hasten da, baldintza onekin erraza izango zena, bainan gaur oso zail ikusten da. Kontzentratuta eta pauso guziak ondo pentsatuz jarraitzen dugu, mogimendu atletiko batez horma gainera iristea lortuz. Hemendik aurrera elur askoz gehiago aurkitzen dugu eta pioletak, berriz ere, baliagarriak suertatzen dira. Eskubira zeharkaldi batek irtengune txiki batera eramaten gaitu, non bilkura egiten dugun bi torloju sartuz.

Hemendik aurrera gauzak errazago ikusten ditugu, elurrak bere trinkotasuna berreskuratu du eta bai pioletak, bai kranpoiak ikusgarri sartzen dira eta igotzeko lagungarri suertatu. Korridorean zehar ensanblen jarraitzen dugu (50º) eta ezkerraldeko bira batez altuera irabazten goaz, goran ikusten dugun estugunearen bila. 

Behin estugunetik ateratzea lortu dugu eta dagoeneko, azken malda igotzea geratzen zaigu eguzkitan ikusten dugun ertza arrapatu ahal izateko, naiz oraindik oso urrun ageri den. Malda porzentaia handitzen doa (60º) bainan elurra egoera onean dagoenez, erraz goaz. Ertzera ailegatzen goazen neurrian malda 65º-ra ere iristen da. Ertzaren gainera ateratzeko zailtasun handiegirik ez dugu aurkitzen, naiz erlaiza duen. Ustekabean, Bisaurin ipar-ekialde aurre tontorretik datorren jende asko aurkitzen dugu. Dagoeneko ertzaren azken zatia ibiltzea besterik ez zaigu geratzen Bisaurin tontorrera iritsi ahal izateko (2.670 m). 

Bost minuturen bueltan Bisaurin gailurrera iristen gara, non jendetza handia pilatzen dan. Bertan dauden gehienak eskiatzaileak dira eta berantz abiatzeko irrikitan daude, ez alferrik, Bisaurin mendia eskiatzaile edonorentzat oso ere erakargarria gertatzen da eta Ekialde Pirineoko txango ederrenetakoa dugu. Eguzki errea dago eta horrek, hego hego-mendebaldeko maldan pilatzen den elurra zapaltzearekin batera ondoratzen da, ibiltzea galeraziz. Orduan eta beherago elurra okerrago aurkitzen dugu eta Lizara aterpetxera iristea oso neketsua gertatzen zaigu. Ondoan eskiekin pasatzen direnek a zer nolako enbidia ematen diguten, guk ere izango bagenitu...

Datu teknikoak

  • Ibilbidea: Bisaurin Ipar korridorea
  • Igoera data:2019-02-09
  • Luzera:10.400 m.
  • Desnibela:1.350 m.
  • Kokapena:Pirinioak
  • Kategoriak : Ipar aurpegia, Izotz eskalada, Korridorea, Kranpoiak, Mixtoa
  • Zailtasuna:D+ (D+)
  • Korridorearen graduazioa:70º
  • Ibilbide zirkularra:Bai
  • Hasiera puntuan amaitzen da:Bai
  • Iristeko denbora:3:30 h horma oinpera
  • Nola iritsi:Lizara aterpetxetik 1.540 m, Aragües del Puerto udal barrutian
  • Igotzeko denbora:5:00 h ipar aurpegia
  • Jeisteko denbora:1:30 h
  • Ezaugarriak:Gerturatze ederra Bernera sakan eta Plana Mistresan zehar
  • Materiala:Friend, torloju, zinta, 60 m-ko soka, kranpoi, piolet, kaskoa
  • Egoera:Elur eta izotz baldintzak ez oso aproposak, batez ere lehen zatian eta zailtasuna ematen dion irtengunean ere.
  • Garaia: Negua
  • IBILBIDEAREN DATU GUZTIAK IKUSI
Gureak eta beste batzuen Cookie-ak erabiltzen ditugu, webgune honen erabiltzaileen nabigazioaren analisia egin ahal izateko.
Nabigatzen jarraitzen baduzu, onartzen duzula suposatzen dugu. Nahi izanez gero, konfigurazioa aldatu edo informazio gehiago jaso ahalko duzu hemen.