Margalidako Ipar Korridorea

Capra Alpina(e)k idatzia.
2389
bisita

Ordubitan lanetik atera eta Benasquera joan ginen zuzenean. Motxila prestatu eta 19:30etan hasi ginen oinez. Aigualluts zeharkatu, hegoaldetik jeisten den erreka goruntz jarraitu, Anetoko glaziarraren azpitik, Barrancs-eko lakutik datorrena eta elurra zapaltzen hasi ginen. Ia bi ordu bete genituenean, Barrancs-eko lepotik gertu, gure kanpamentua jarri genuen. Pozik ginen momentuan, baina ez genekien zer zetorkigun gainera gau hartan.

Nire zakuan goxo-goxo esnatu nintzen, kanpoan euria nola ari zuen entzunez. Mugikorreko pantaila piztu nuen ordua ikusteko, 3:00ak ez izateko esperoan, ordu horretan jo behar baitzuen iratzargailuak. Pantaila itzailtzeko botoia sakatu nuen momentuan argi batek denda guztia argiztatu zuen. Harrituta geratu nintzen nire mugikorrak horrelako argitasuna nola atera zuen galdetzen.

- Tximistaka ari duk - esan zidan nire lagunak.

- Hori tximista bat izan al da? Nire mugikorra izan zelakoan nengoen...

- Aspalditik ari dituk, baina urruti zeudek.

Bat batean berriz argitu zen denda segundu erdiz. Ikusgarria zen. Gure ondoan izan zela zirudien. Zentzu guztiak azti jarri genituen ea trumoia noiz entzuten genuen eta handik 4 edo 6 segundutara egin zuen. Argiak 300.000 km/s-ko bidaiatzen du, aldiz, soinuak airean 0º-tan 331 m/s-ko. Aldagai hauen kalkulu bat egiten badugu, ekaitza pare bat kilometrotara zegoela esan genezake. Baina horietako bat gertuago entzun genuen...

- Pioleta kanpoan utzi diat punta gora begira - onartu zidan nire lagunak.

Momentu horretan nik jada ezin nuen lorik egin. Gorputza gortuta nuen, postura defentsibo batean, tximistaren hurrengo golpearen zain. Beste argiztatze batzuen ondoren, baretu egin zen. Pixkanaka lasaitzen joan eta lo hartzea lortu nuen.

Hurrengo egunean 3:00etan jaiki eta 3:45etako oinez hasi ginen. Barrancs-eko lepoa igo, ondoren 100 metro behera egin genuen eta, azkenik, 600 metroko desnibeleko aldapa igo genuen, 3.000 metroko alturara iritsi arte. Goizeko 6:30ak ziren jada eta argitzen hasita zegoen, baina lainoek tontorrik altuenetan itsatsiak jarraitzen zuten.

Margalidako ipar korridorea zoragarri ikusten zen, baina egun hauetan egin zuen beroarekin dudak genituen ea egoera onean egongo zen. Saiakera bat egitea erabaki genuen. Materiala jantzi eta 7:00ak puntuan hasi nintzen eskalatzen:

L1 (45m.): Errimaia gainditu, 55º-ko pala bat igo eta 75º-ko urjauzi txiki bat gainditu. Bilera ezkerretan dago. Nik pixkat aurrerago jarraitu nuen arroka zubi batera iritsi arte, eta torlojuarekin indartu nuen. Erresalde txikia aseguratu nuenean, nire sokalagunari abisatu nion izotza, zati hartan, ez zegoela oso egoera onean.

L2 (20m.): Bileran izotz eta arroka artean geuden. Nire sokalaguna korridore estutik aurrera zijoan goruntz, nahiko tente jartzen ziren erresalteak gaindituz. Lehena gainditu baino lehen lagungarri egin zitzaion iltze bat aurkitu zuen. Izotza ez hausteko ia errezatu egin behar izan zuen. Luzea motza baina oso polita, eta bilera, erresalteak gainditu ondoren, ezkerreko horman aurkitu zuen.

L3 (55m.): Bideko zati estuenarekin topo egin nintzen. Motxilak estorbu egiten zidan izotz erresaltea gainditzeko. Eskuinaldera egin behar zen pausua, zulotik irteteko. Oso polita! Pausua baino lehen iltze batekin aurkitu nintzen, eta torloju bat ere sartu nuen, oraingo honetan, izotz onean. Erresaltearen ondoren, arrandegiko elurra zirudien 60º-ko malda batek jarraitzen zuen. Soka ia amaieraraino eramanez, eskuineko horman aurkitu nituen paraboltak.

L4 (40m.): Bideko zati klabea. Hiru erresalte mixto (M4) nire sokalagunak izotzarekin aurkitu zituenak ondo trakzionatzeko, baina babesteko zailak zeudenak (batez ere azkenekoa). Hasieran iltze bat dago eskuinean. Izotza ezker partean zegoen, beraz, handik gainditu zuen. Bigarrena errazagoa zen. Hirugarrena, aldiz, psikologikoena zen segururik ezin baitzen jarri eta zerbait "apretatu" behar izan baitzuen. Bilera irteeran paraboltekin.

L5 (30m.): Zailena gaindituta, metro bateko erresalte bat gainditzen dugu. Ondoren, harri artetik jarraitu eta eskuinera trabesia txiki bat egin behar izan genuen. Friend eta fisureroekin ondo babesten zen. Bilera eskuin horman.

L6 (32m.): Korridoretik irteteko azken luzea, errezena dena. Elur malda bat igo harri batzuk sahiesten. Lepoan azken bilera.

Jetsiera 5 rappeletan egin genuen. Lehen biak batera egin daitezke agian, baina blog batean soka txikleatu egin behar dela bilerara iristeko irakurri genuen. Azken bi luzeak rappel batean egin genituen, nahiz eta errimaiararte destrepatu behar izan gero.

Prebisio guztiek eguerdirako eguraldi txarra etorriko zela zioten. 3,30 ordutan igo genuen korridorea eta 1,10 ordutan rappelatu genuen. 11:45 ziren eta ez zirudien euririk egingo zuekin. Goizeko lainoak bazijoaztela zirudien. Hala eta guztiz ere, ez genuen denborarik galdu eta ezer hasi aurretik, denda jasotzea erabaki genuen.

15:30ak pasata iritsi ginen kotxera, Margalidako ipar korridorea poltsikoan eta ordutegi oso ona egin ondoren, Benasquen bokata bat jan eta afaltzera etxera iristeko denbora eman zigularik. Zoriontasun osoa!

Datu teknikoak

  • Ibilbidea: Margalida Ipar korridorea
  • Igoera data:2016-05-28
  • Luzera:230 m.
  • Desnibela:1.749 m.
  • Kokapena:Pirinioak
  • Kategoriak : Ipar aurpegia, Korridorea, Kranpoiak
  • Zailtasuna:MD
  • Harri eskaladaren zailtasuna:IV
  • Korridorearen graduazioa:75º
  • Eskalada mixtoaren zailtasuna:M4
  • Izotz eskaladaren zailtasuna:WI3
  • Luze kopurua:6
  • Hasiera puntuan amaitzen da:Bai
  • Iristeko denbora:1. egunean: 2h - 2. egunean: 2,5h
  • Nola iritsi:Besurtatik, Forau d`Aigualluts zeharkatuz.
  • Igotzeko denbora:3,5h
  • Jeisteko denbora:1,15h rappela - 3,5h oinez
  • Ezaugarriak:Gerturatzea oso gogorra denez, guk bi zatitan banatu genuen: Lehen egunean Barrancs-etik ordu erdira akanpatu genuen. Goulottea oso estetikoa eta estua da, motxilak agian oztopatu egin gaitzake. Paso klabea M4-ko hiru erresalte dira. Paraboltez eginiko bilerak.
  • Materiala:60m-ko bi soka, 4 torloju, friend txiki eta ertain jokuak, fisureroak, bagak, kranpoiak, kaskoa eta 2 piolet.
  • Egoera:Goulottea sortua egin behar da.
  • Garaia: Negua, Udaberria
  • IBILBIDEAREN DATU GUZTIAK IKUSI
Gureak eta beste batzuen Cookie-ak erabiltzen ditugu, webgune honen erabiltzaileen nabigazioaren analisia egin ahal izateko.
Nabigatzen jarraitzen baduzu, onartzen duzula suposatzen dugu. Nahi izanez gero, konfigurazioa aldatu edo informazio gehiago jaso ahalko duzu hemen.