Mondicieto - 2.382 m

Capra Alpina(e)k idatzia.
2376
bisita

Mondicieto (2.384 m) Las Cutas mendizerraren tontor garaiena dugu eta Arazas eta Añisclo arroilen artean aurkitzen da, Ordesa eta Monte Perdido Parke Nazionalean. Ordesako mendi mitikoetatik urrun aurkitzen bada ere, hiru Sororeak (Cilindro, Monte Perdido eta Añisclo) bere edertasun guzian ikusteko behatoki paregabea dugu. Udan autobus batek Cuello Gordo edo Inferior de Goriz (2.188 m) ingururaino jendea gerturatzen badu ere, neguan ibilbide berau trabeskako eskia praktikatzeko oso erabilia da, ibilbide gomendatuenetakoa bat izanik eta guk egin nahi izan duguna eta hemen uzten dizuegu gure testigantza.

Nerin herrira (1.293 m) iritsi gara eta gorantz doan pista jarraitzen dugu langa batek bidea oztopatzen digun arte, bertan autoa aparkatzen dugularik.  Eguzkitsu bezain hotz dago goiza eta eguzki izpiek ukitu ez duen elurra izoztua dago. Behin beharrezkoa hartu dugunean eta seguruenik behar ez dena ere, motxila beti gainezka daramagu eta ez dugu inoiz ikasten,  mendian gora eskiak erritmoz arrastatuz abiatzen gara.

Lehen orduetan eguzkiaren berotasuna eskertu badugu ere, gorantz goazen heinean itzala eskertzen hasi gara.  Cuello Arenas lepora gerturatzen goaz, estu artzen gaituen malda tente batetik igoz. 

Behin bertan eta zeharkatu ostean, Cuello Arenas sakonunera (1.894 m) eramaten gaitu, Pueyo Mondiceto (2.384 m) eta La Estiba (2.006 m) artean. Hiru Sororera dugun ikuskizuna ikusgarria da. 

Aterpetxearen norabidean goaz eta bertara iritsi aurretik ezkerrera bira egiten dugu, zuzen jarraitu ezean arazoetan sar bai genezake, Barranco Pardina sakonunean buru belarri sartuz. Teilaturik ez duen txabola baten ingurutik pasa gara, duen elur geruzagatik apenas ikus daitekeena, eta Cuello Gordo o Cuello Inferior de Goriz lepora (2.188 m) norabidean jarraitzen dugu.  

Muino leunetatik aurrera goaz, haize jelatuak etengabe zigortzen digularik. Elurraren egoera ezin hobea denez, aurrerantz erraz egiten dugu. 

Haizeak bakoitzean indar gehiagoz astintzen badigu ere, Cuello Gordo o Cuello Inferior de Goriz lepora iristea lortu dugu (2.188 m) 2:45 h. Faja de Pelay horma harritsuaren ertzean aurkitzen gara, Parke Nazionaleko bidexka ezagunenetariko batek azpialdetik zeharkatzen duelarik, “Senda de los Cazadores” izenez ezaguna, Soasoko maila ikusgarrien oso goitik doana.

Gure ezkerretik jarraituz (NW)Mondicieto menditik jaisten den maldan norabidean goaz. Hotz sentsazioa areagotuz doa eta  janztea beste aukerarik ez dugu, ez alferrik motxilan hainbeste arropa igo ditugu. 

Azken malda gogorrak tontor aurrean uzten digu eta bertatik, inongo zailtasunik gabe, Pueyo de Mondicieto gailurrera iritsi gara (2.384 m) 3:30 h.

Gure begien aurrean ageri zaigun ikuskizunak, beste behin, aho zabalik uzten gaitu. Behatoki paregabea benetan Ordesa eta Monte Perdido Parke Naturala edertasun osoan ikusi ahal izateko, bereiziki Hiru Sororeak (Cilindro, Monte Perdido eta Añisclo).

Tontorrean egiten duen hotzak, ez digu gustatuko litzaigukeen bezain beste denbora igarotzen eta eskiak lotuz, mendebaldeko maldatik behera txirristatzeko prestatzen gara.  

Haize jelatuaren ondorioz, elurra oso gogor ageri zaigu eta egia esan,  ez du konfiantza gehiegirik eskaintzen, noizik eta behin lurrera erortzea ezinezkoa gertatuz. Cuello Arenas lepora (1.894 m) igo garen baina errazago jaitsi gara 5:00 h.

Haizetik babestuz eta eguzkiaren berotasunez, merezia dugun atsedena artzen dugu eta jan edan egiteko baliatu. 

Nerin herrira itzultzeko pistaz baliatzen gara, oso egoera txarrean aurkitzen bada ere, gaur goizean kotxea utzi dugun langaraino iritsiz, 6:30 h.

Datu teknikoak

  • Ibilbidea: Mondicieto Nerin eta Arazas lepotik
  • Igoera data:29/12/2013
  • Kokapena:Pirinioak
  • Kategoria : Eskia
  • Zailtasuna:F
  • Hasiera puntuan amaitzen da:Bai
  • Iristeko denbora:3:30 h
  • Nola iritsi:Nerein-dik Cuello Arazas lepora doan pista jarraitu langa aurkitu bitarte.
  • Igotzeko denbora:6:30 h
  • Jeisteko denbora:3:00 h
  • Ezaugarriak:Ibilbide ikusgarri eta erabat gomendagarria mendi eskiaz gozatzeko.
  • Materiala:Trabeskako eskiak eta kaskoa
  • Garaia: Negua, Udaberria
  • IBILBIDEAREN DATU GUZTIAK IKUSI
Gureak eta beste batzuen Cookie-ak erabiltzen ditugu, webgune honen erabiltzaileen nabigazioaren analisia egin ahal izateko.
Nabigatzen jarraitzen baduzu, onartzen duzula suposatzen dugu. Nahi izanez gero, konfigurazioa aldatu edo informazio gehiago jaso ahalko duzu hemen.