Neveras mendia - 2.890 m

Capra Alpina(e)k idatzia.
1763
bisita

Neveras mendia Ara (ekialde) eta Bramatuero (mendebalde) aranen artean kokaturik dago. Hainbat mendi bezala, ospe eta fama gutxi du. Alturaz garaia bada ere oso gutxi igoa izaten da. Bere kokapena azpimarragarria da, Vignemale mendigunearen parez pare aurkitzen bai da. Bertara igotzeko bide arrunta Bachimaña eta Bramatuero lakuetatik eta Letrero lepotik badoa ere, zehaztugabeko bide batetik naiz hito batzuek eduki; gu Serrato eta Labaza lakuetatik, Xuans eta Letreo lepotik igotzea erabaki dugu. Zer aurkituko dugun ez badakigu ere, inongo aipamenik ez bai dugu bilatu. 

Panticosatik abiatzen gara (1.636 m) Hotel Continentalaren eskuinean dauden eskaileratik igoz. Sigi-saga handiak eginez GR11 bide zabala basoko maldetan gorantz doa. Bachimaña lakuetara (ezker) doan bide gurutzera iritsi gara (15´) eta eskuinera jarraituz altuera azkar irabazten goaz. Behin basotik kanpo, bloke handiz betea dagoen zelaigune batetara iritsi gara, hain zuzen, Brazato (eskuin) eta Labaza (ezker) lakuen bide gurutzera, 1.970 m (1:00 h).

Ezkerrera apenas nabaria den bidexka jarraitzen dugu, Labaza tontorren azpialdetik sigi-saga ugariz altuera irabaziz. Erdi lurperatua dagoen hodi batetara iritsi gara 2.140 m Brazato urtegitik datorrena (1:30 h). Bidean aurkitzen diren hito ugariei jarraituz goaz, harri bloke handietatik zehar, eta irtengune batzuek gainditzen laguntzen dizkigute, Serrato lakuaren kokalekura iritsi aurretik 2.450 m (2:10 h).

Labaza tontorren azpialdean dagoen harri kaosetik gorantz goaz, laster batetan Labaza behe lakura iristen garelarik 2.475 m (2:25 h). 

Dagoeneko apenas nabaria izan den bidexka desagertu zaigu eta ezinbestean, aurkitzen ditugun hito eta arrasto zuri-beltzei jarraitu beharrean gara.

Harrizko zirku batera iritsi gara izugarrizko harrikari batetik gainditzen saiatzen  garelarik, Batanes hortzen hormara norabidean. Bertatik Labaza goiko lakua ikusten dugularik 2.700 m (2:55 h ).

Ipar-mendebaldera lakuaren kokapena histen duen kontrahorma gainditu beharrean gara (hitoak) terraza batetara iristeko eta bertatik, inongo zailtasunik gabe, Xuans lepora heldu 2.770 m (3:10 h).

Beste isurialdera iritsi bezain laster Arratille tontor handia, Neveras, Batanes lepoa eta Vignemale (ezkerretik eskuinera) ikusten ditugu. 

Peña Xuans ezkerrera eta Batanes Hortzak eskuinera uzten ditugu eta Serrato mendira norabidean  jarraitzen dugu. Behin bere inguruan berantz hasten gara, baina ¿ Nondik ?. Aurrez pentsatu bezala, ez bide arrastorik ez hitorik ez dugu ikusten.

Maldan behera irten gara, bidean aurkitzen ditugun granitozko harri bloke handiek saihestuz, Bramatuero goi lakura norabidean. Serrato mendiaren malda nahaspilatua jaisten jarraitzen dugu, erdialdera zeharkatuz Bramatuero eta Letreo lakuen bila. Bramatuero lakutik datorren zehaztugabeko xendara iritsi gara eta kanal batetik jarraituz Letrero lepo ingurura igotzea lortu dugu 2.640 m. (3:45 h). Neveras tontorretik erortzen den malda desegina zeharkatzen dugu, hasieran oso tentea bada ere gerora etzaten joaten da. Irtengune bat gainditu eta eskuinera hartuz, ertzera iristen gara eta hau jarraituz, gertu dagoen Neveras tontorrera iritsi ere 2.890 m. (4:25 h). Vignemal mendigunera dugun ikuskizuna paregabea da.

Argualas, Algas, Garmo Negro, Infiernos, etabar ditugunak ere ezin hobeak dira. Bertatik ikusten diren laku, erreka txulo eta uhar ugariek paisaiari kolore harrigarria ematen diote.

Bertara igotzeko beste aukera bat dago Cerbillonar txabolatik (Erraza-1.100 md) Ara ibar eta Letreo lepotik igoz. Lakuak izozturik badaude eskiatzeko aukera 100%. Gailurra eta Letrero lepora bitarteko bataz besteko 25% zatiak daude.

30´pasa ostean, inklinatua den maldan behera hasi gara, desegindako harrian garbi ikusten dugun bidexka jarraituz; normalean gertatzen den bezala, jaisteko igotzeko baina askoz ere erosoagoa dena. Konturatzerako Letrero lepoan aurkitzen gara. Ondoren Bramatuero goi lakura jaisten gara (5:30 h) eta ezkerretik zeharkatzen dugu, aspergarri egiten bazaigu ere. Hainbat tontor txiki igo eta jaitsi beharrean gara, aurkitzen ditugun hito ugariei jarraituz.

Behin urtegiko hormara iritsi eta bibaka egiteko eremu baten ingurutik pasaz, oso nabaria den ibilbide batek maldan behera garamatza, sigi-saga ugari eginez eta Bramatuero behe lakuan utziz (6:15 h). 

Bachimala goi lakua bere edertasun guzian ikusten dugu, bertara goazelarik. Bideak lakuaren bukaerara garamatza, Mercadau Portua, Infernuen lepora (GR11) eta gu gatozen bide gurutzera hain zuzen (6:35 h). Lakua zeharkatzen dugu betidanik gure ezkerrera eramanez, GR11 arrasto zuri gorriak jarraituz eta dagoeneko, Panticosako Harri Etxe aterpetxeraino bertan behera utziko ez ditugunak.

Bachimala behe lakura minutu gutxiren bueltan iristen gara, bertan aterpetxe berria ikusten dugularik. Fraidearen aldapa behin gaindituz, masifikatua den bidea jarraituz, inongo zailtasunik gabe, Panticosako Harri Etxe aterpetxera eramango gaitu (7:40 h).

 

 

 

 

 

Datu teknikoak

  • Ibilbidea: Neberas tontorra Serrato eta Labaza lakuak eta Letrero lepotik
  • Kokapena:Pirinioak
  • Kategoriak : Oinezko igoera, Trabesia
  • Zailtasuna:F
  • Ibilbide zirkularra:Bai
  • Hasiera puntuan amaitzen da:Bai
  • Iristeko denbora:4:25 h
  • Nola iritsi:Panticosa, Serrato eta Labaza lakuak eta Xuans eta Letreo lepotik.
  • Igotzeko denbora:7:40 h
  • Jeisteko denbora:3:15 h
  • Ezaugarriak:Ibilbide luze eta desnibel handikoa. Tarte batetan ez ibilbide, ez hito bakar bat ere ez dugu aurkituko. Lainoa sartu ezkero tentu handiz ibili beharreko lekua.
  • Materiala:Makilak
  • Garaia: Uda, Negua, Udazkena, Udaberria
  • IBILBIDEAREN DATU GUZTIAK IKUSI
Gureak eta beste batzuen Cookie-ak erabiltzen ditugu, webgune honen erabiltzaileen nabigazioaren analisia egin ahal izateko.
Nabigatzen jarraitzen baduzu, onartzen duzula suposatzen dugu. Nahi izanez gero, konfigurazioa aldatu edo informazio gehiago jaso ahalko duzu hemen.