Tendeñera 2.845 m

Capra Alpina(e)k idatzia.
5636
bisita

Kareharrizko horma bertikalak dituen Tendenera mendilerroak, izena ematen dion tontorrean du bere puntu garaiena. 3.000 m altuera mitikoa ez duenez, mendizale askok, tamalez, igotzeari uko egiten diote, baina pena merezi duela esango nieke. Edozein ibilbide aukeratzen dugula ere, Bujaruelotik (1.338 m), Panticosatik (1.200 m), Linas de Brototik (1.232 m) edo Yeserotik (1.160 m), desnibel handia eta gerturatze luzea gainditu beharrean izango gara.

Panticosatik hasten den ibilbidea aukeratzen dugu. Ripera ibarretik eta mendatearen sakanetik igotzen dena, Tendeñera lepora bitarte (2.330 m). Goiza oskarbi esnatu da eta egun eguzkitsua datorrela dirudi. Haskalditik ateratzen gara (km 5 Panticosa bainuetxerako bidetik), kate batez itxia dagoen pista jarraituz.

Desnibela azkar batetan gainditzen dugu Ripera ibarrera iritsiz. Gure ezkerrera ikusten dugun orratz dotore eta estraplomatu batek atentzioa deitu digu. Jainkoaren hatza o Yenefrito hatza (1.816 m) izenez ezaguna dena hain zuzen.

Ezkerrerantz aterpetxe txiki bat (librea) uzten dugu eta aurrerantz jarraitzen dugu goi-ibarrera, Ripera ibaia gure eskuinera eramanez. Aurrerago egurrezko zubi polit batetik zeharkatzen dugu, ICONA aterpetxera bidean, oso zikina dagoena. Escuellas mendia (2.504 m), ezkerrera eta Fazeras (2.140 m) eta Dero Verde (2.295 m) mendiak eskuinera eramanez oinez goaz. Ibon de Sabocos norabidean jarraitzen dugu, aurrerago uzten badugu ere Salto de Tendenera urjauziaren inguruan, mendatearen sakanetik jaisten dena.

Ezkerretik (NE) xenda bat gorantz doa urjauzia gainditu asmoz. Hasiera honetan oso gutxi nabaria bada ere, zeharka igotzen da urjauzia eta mendatearen sakanera. Gorantz goazen heinean xenda oso nabaria egiten da. Behin gaindituz gero, ur gardeneko huarra zeharkatzen dugu eta bete betean, mendatearen sakanean sartzen gara. 

Beste aterpetxe baten aurretik igarotzen gara, aurrekoen alde hau bai garbia eta erosoa. Tendeñera lepora norabidean jarraitzen dugu, bertatik dagoeneko ikusten dena.

GR arrasto zuri gorriek bidean zehar, oso maiz, aurkitzen ditugu. Azken aldapa batek, sigisaga bidez Tendeñera lepora igotzen gaitu (2.330 m). Aurrez aurre ikuskizun aparta ageri zaigu Otal bailara ikusgarrira.

Bujaruelo norabide hegalean GR arrasto zuri gorriek galtzen dire. Ezkerrera biratu eta aurkitzen ditugun hito ugariek jarraitzen hasi gara. Begien aurrean Tendenera mendi zerra edertasun osoan ageri zaigu.

Ez dirudi xamurra Tendeñera tontorretik banatzen gaituen 515 m-ko desnibela gainditzea. Igotzen goazen  bidea ez da batere erosoa. Hasieran bloke handiz osaturiko malda gainditu beharrean gara. Higaduraren ondorioz arroka oso latza da.

Terraza batera iritsi gara, harri hautsiko malda tente baten bezpera, hoinpean elurtegi bat duena. Gezurra badirudi ere hortik jarraitu beharrean gara baina, nondik?

 Hasieran, ezin bestean, hitoak jarraitu beharrean gara, baina gutxika bada ere, xenda bat nabaritzen doa.

Nekez bada ere, azken maldara iristea lortu dugu. Bertatik Tendeñera ekialdeko tontorrean aurkitzen den jendea ikus dezakegu.

Gertu ikusten bada ere oraindik erabat hautsia dagoen malda igotzea geratzen zaigu. Ez da oso erosoa gertatzen, baina tontorretik gertu egoteak laguntzen du. 

Behin malda gainditu eta ekialdeko tontorrera iritsi, zeharkaldi motz eta airezkoa bat geratzen zaigu tontorrera iristeko. Zailtasunik ez du (Erraza) baina elurra dagoenean arriskutsua gerta daiteke sortzen diren erlaitzak direla eta.

 

Tendeñera gailurra (2.845 m). Ego aldera ezer ikusterik ez dugu, laino trinkoa hormara erantsia bai dago eta pena bada ere, bertatik dauden ikuskizun apartak galerazten dizkigu.

Dena den, Ifarrera erabat garbi dago. Nouvielle, Munia eta Vignemale mendizerren ikuskizunak, beste batzuen artean, dudarik gabe, eginiko esfortzua eta gainditu beharreko desnibela saritzen digu.

Goizean kotxea utzi dugun haskaldirako itzulera, igotzeko erabili dugun bide berberetik egiten dugu.

 

Datu teknikoak

  • Ibilbidea: Tendenera Panticosako askalditik
  • Desnibela:1.645 m
  • Kokapena:Pirinioak
  • Kategoria : Oinezko igoera
  • Zailtasuna:F
  • Hasiera puntuan amaitzen da:Bai
  • Iristeko denbora:4:15 h
  • Nola iritsi:Panticosako askalditik (km 5 Panticosa bainuetxerako bidetik)
  • Igotzeko denbora:7:15 h
  • Jeisteko denbora:3:00 h
  • Ezaugarriak:Forma fisiko onean egotea eskatzen duen ibilbide luzea, handia bai da gainditu beharreko desnibela. Iparretik ekialdera doazen ibilbide guziak gailurrera iristeko, derrigorrez, zeharkaldi airezkoa dena gainditu beharrean izango dira .
  • Garaia: Uda, Negua, Udazkena, Udaberria
  • IBILBIDEAREN DATU GUZTIAK IKUSI

Igotzen diren mendiak

Erlazionatutako ibilbideak

Iruzkin bat egin

Gureak eta beste batzuen Cookie-ak erabiltzen ditugu, webgune honen erabiltzaileen nabigazioaren analisia egin ahal izateko.
Nabigatzen jarraitzen baduzu, onartzen duzula suposatzen dugu. Nahi izanez gero, konfigurazioa aldatu edo informazio gehiago jaso ahalko duzu hemen.