Punta Sabre - 3.136 m.

Capra Alpina(e)k idatzia.
1262
bisita

Laneko aste gogor baten ondoren eta eguraldi ona datorren itxaropenez, goiz jaiki eta Gistain aranaren norabidean ateratzea erabaki dugu. Plan herri politera iritsi gara, bertatik lurrezko pista bat hartu behar dugularik, ez oso egokia kotxeentzako, Biados aterpetxera iritsi asmoz. Bertara iristea kosta zaigunarekin eta aparkatzeko lekurik ez. Ezin bestean, atzera jo beharrean gara eta kanpinaren inguruan kotxea utzi, garai honetan itxia dago.

Biados aterpetxetik atera gara (1.714 m.), bidea ongi hartu dugunaren itxaropenarekin,  ez bai dakigu nondik doan. Bachimala eta Tabernes aterpetxeko norabidea azaltzen digun kartela atzean utzi eta pinudi batetan sartu gara. Aldapa bortitza dauka eta bat batean hauspoa berotzen zaigu. Serrau txabola inguruan gaude (2.020 m.), Tabernes aterpetxera doan bidea alde batera utzi eta Oriels sakanetik datorren uharra parez pare jarraitzen dugu.

Malda berdeak igotzen goazen neurrian bidea erratu dugula konturatzen gara. Ateratzeko presarekin urik hartu ez dugunez, kantinplorak betetzeko uharreko uraz baliatzen gara. L´Ixabere (2.694 m.) eta Señal de Biados (2.596 m.) mendiek osatzen duten zirku txikian gaude; toki lasai, polit eta atsegina. Aurrez aurre aldapa neketsu bat dugu, malda tente eta malkartsua igo beharrean gaudelarik.

Señal de Biados mendiaren gailurrean gara; gure oinpean ikus ditzakegu Señal de Biados lepoa (2.536 m.), zein Bachimalara doan bide arrunta. Ezin bestean, bertara iristeko jaitsi beharrean gara. 

Apenas nabaria den bide batetik gorantz goaz, malda belartsua eta desegindako harri artean. Mugarriak jarraituz, espoloi harritsu bat gainditzea lortu dugu eta horma tente baten oinpean utzi. Arroka desegina badu ere, altuera azkar batean irabazten goaz, baina ez zailtasunik gabe, hormara iritsi bitartean. Kolore aldaketa arroka hautsi (beltz) eta horma (grisa) artean urrutitik nabaria da. Harri hautsi eta horma tentea saihestu asmoz, bien mugatik igotzen saiatzen gara.

Lehen zatia gainditu ostean, ez esfortzurik gabe; Sabre ertzera eta zeharkatzen duen bidexkara iritsi gara. Arreta handiz mugarriak jarraitzen saiatzen gara, bai eskuinera, bai ezkerrera errukirik gabe eramaten gaituzte. Zailtasun handiegirik aurkitzen ez badugu ere (II), tarte bereziren bat aurkitzen dugu. Arroka ez da oso fidagarria baina konfiantza pixka bat ematen digu, naiz tentu handiz jarraitzen dugun.

Bigarren mailako kota baten inguruan (3.067 m.) ertzetik jarraitzen dugu, oraingoan etzana baina oso airezko den zati batetik, azken tarte tenteena eta ertzeko zatirik zailenaren aurrean aurkitzen gara.

Mugarriak jarraitzen saiatzen gara. Horma tenteak gure pausoak arretaz ematea behartzen digu. Naiz itxura beldurgarria izan, zailtasun handiegirik gabe (II), Punta de Sabre gailurra zapaldu dugu (3.136 m.). Leku eder eta behatoki paregabea. Begiratzen dugun aldera begiratuta ere tontor harrigarriak ikusteko parada dugu, Poset, Aneto, Perdiguero, Espadas, Maladeta, Perdido, Cilindro, Pic Long, Munia, Vignemale eta beste hainbat. Dena den ezin ahaztuko dugu gertuen dugun Bachimala, ertz zorrotz eta airezko batek sakabanatzen gaituena.

Itzultzerakoan eta behin Señal de Biados lepoan, “paso la gatera” bezala ere ezaguna, Igotzerakoan bilatu ezin izan dugun bidea jarraitzen dugu eta malda belartsuak gaindituz, Serrau txabolara eramaten gaitu. Pinudian zehar jaitsi gara eta Biados aterpetxera iritsi, gure gaurko bidaiaren bukaera.

 

Datu teknikoak

  • Ibilbidea: Sabre punta Biados aterpetxetik
  • Desnibela:1.422 m.
  • Kokapena:Pirinioak
  • Kategoria : Oinezko igoera
  • Zailtasuna:F+
  • Harri eskaladaren zailtasuna:II-
  • Nola iritsi:San Juan de Plan eta Biadoseko aterpetxetik.
  • Ezaugarriak:Eskalada plaka ezegonkorretatik.
  • Garaia: Uda, Udazkena
  • IBILBIDEAREN DATU GUZTIAK IKUSI
Gureak eta beste batzuen Cookie-ak erabiltzen ditugu, webgune honen erabiltzaileen nabigazioaren analisia egin ahal izateko.
Nabigatzen jarraitzen baduzu, onartzen duzula suposatzen dugu. Nahi izanez gero, konfigurazioa aldatu edo informazio gehiago jaso ahalko duzu hemen.