Midi d´Ossau - 2.884 m.

Capra Alpina(e)k idatzia.
1528
bisita

Uda da eta Tena bailaran gaude opor egun batzuk pasatzen. Unai bisitan etorri zaigu eta ezinbestean, mendira joatea behartuta gaude. Aukera ezberdinak aztertu ditugu eta Midi d´Ossau mendira joatea erabaki. Mendebaldeko Pirineotan mendi ezagunenetakoa dugu. Antzinako sumendia, guk ikusten duguna laba gogortua bada ere. Beti esan ohi da, pirineista den batek, gutxienez bizitzan behin, bertara igo beharko lukeela..

Kotxea Anéou aparkalekuan utzi dugu (1.707 m.), 1,5 km. Portaletetik behera (1.794 m.). Errekaraino jaitsi gara eta zubia erabili zeharkatzeko. Pistatik gorantz goaz artzain txabolen norabidean. Pista dagoeneko xenda bihurtu da eta sigi-sagak eginez altura azkar irabazten doa. Soum de Pombie (2.129 m.) lepora iritsi gara; bertatik Pombie aterpetxea eta Souzón leporantz doan bidea ederki ikusten ditugu.

Pombie aterpetxea (2.031 m.) iritsi bitarte beherantz goaz. Lakuaren ondoan eta aterpetxearen atzean dagoen iturrian kantinplorak urez betetzen ditugu. Denborarik galdu gabe aurrera jarraitzen dugu, harri blokez beteriko bidea jarraituz, oso nekeza gertatzen bazaigu ere. Kostata baina harri artetik ateratzea lortu dugu eta xenda garbi batetik jarraitzen dugu, Souzón lepora iritsiz (2.127 m.). Bideak beherantz jarraitzen du Biou Artiges (1.425 m.) lakura baina guk alde batera utzi eta ezkerrera doana jarraitu behar dugu, Midi hormara norabidean, itzel eta bakar azaltzen dena.

Hormak igo ezina dirudi; inguratzen goazen heinean, pitzadura bat sumatzen dugu bertan, gure hasierako ideia aldarazten diguna. Harriari gogor helduz eskalatzen hasten gara. 25 m. luze eta zailtasuna (II). Tximiniaren azken zatian ez dira helduleku askorik aurkitzen eta igoera errazten duten burdin batzuek jarrita daude. Igotzea lortu dugu eta azkar batetan, xendak bigarren tximiniara eramaten gaitu, 30m. izango ditu honek, aurrekoa baina tenteagoa eta helduleku gehiago eta hobeagorekin (II+).

Jende pilaketak sortzea ez da batere harritzekoa eta gaur ez da ezberdina. Saihestu asmoz, tximiniaren ezkerretik eskalatzea pentsatu dugu, pitzadura txiki bat baliatuz eta bide nagusiaren parez pare igotzen dena. Guk aukeratu duguna askoz ere errazagoa iruditzen zaigu.

Bigarren tximinia ere igo dugu, gure aurretik zoaztenak oraindik bertan gelditu dira. Sigi-sagak eginez xendak hirugarren tximiniara eraman gaitu, 50 m. izango ditu (II-). Anklaje tinkoak ezarrita daude, bai igoeran segurtasuna bilatze arren, bai jaitsieran rapelatu dezagun. Dena den ez diogu zailtasun handiegirik aurkitzen erabili ahal izateko. Heldulekuak asko eta ugari daude eta erraztasun handiz igotzen gara. Tximinia bukaera iritsi gara, Portillón de Midi (2.657 m.), burdinazko gurutze bat dagoelarik. Laino edo ekaitz egunetan kontutan hartu beharreko gurutzea, berak adierazten bai digu tximinien hasiera; ala nola, horma bertikaletatik aldentzeko momentua ere.

Hemendik aurrera bidea oso garbi ikusten da eta cairn ugariz beterik dago. Zailtasunik ez du baina desnibela handia da oraindik eta kosta egiten zaigu azken zatira iristea. Bi tontor ikusten ditugu, bata eskuinean eta beste ezkerrean. Badaezpada ere, bietara igotzea pentsa dugu. Eskuinekoa baxuagoa da eta igotzeko errazagoa. Ezkerrekoa berriz, altuagoa izatetik aparte, urrunago dago eta zailtasun gehiago du. Bertara iritsi ahal izateko, bretxa batetara jaitsi behar gara, eskuak erabiliz eta arreta pixka bat jarriz.

Ikuskizuna paregabea da. Balaitus, Frondiella, Palas, Infiernos, Garmo Negro, Anayet, Collarada, Punta Escarra, Aspe eta beste hainbat. Gure oinpean Ayous  eta Bious Artigues lakuak ikus dezazkegu. Jaistea bakarrik falta zaigu eta Marijo eta Enarakin Pombie aterpetxean elkartu, eguna borobildu eta igoeraz gozatu ahal izateko.

Datu teknikoak

  • Ibilbidea: Midi d`Ossau Ohiko bidetik
  • Igoera data:18/08/2009
  • Luzera:15 m.
  • Desnibela:1.177 m.
  • Kokapena:Pirinioak
  • Kategoriak : Eskalada klasikoa, Oinezko igoera
  • Zailtasuna:PD+
  • Harri eskaladaren zailtasuna:III-
  • Iristeko denbora:2:45 h
  • Nola iritsi:Anéou aparkalekua (1,5 km. Portalet mugatik), Soum de Pombie lepoa, Pombie aterpetxea (2.031 m.) eta Souzòn lepotik (2.127 m.).
  • Igotzeko denbora:4:15 h
  • Jeisteko denbora:1:30 h
  • Ezaugarriak:Ibilbidea barraz eta rapelatzeko anklajeekin hornitua dago.
  • Materiala:Ez da beharrezkoa baina bai gomendagarria soka, kaskoa eta arnesa.
  • Garaia: Uda, Udazkena
  • IBILBIDEAREN DATU GUZTIAK IKUSI
Gureak eta beste batzuen Cookie-ak erabiltzen ditugu, webgune honen erabiltzaileen nabigazioaren analisia egin ahal izateko.
Nabigatzen jarraitzen baduzu, onartzen duzula suposatzen dugu. Nahi izanez gero, konfigurazioa aldatu edo informazio gehiago jaso ahalko duzu hemen.