Hiru Erregeen Mahaia - 2.444 m.

Capra Alpina(e)k idatzia.
4544
bisita

Euskal mendizaleentzako, betidanik, Hiru Erregeen Mahaia oso mendi berezia izan da. Nafarroako lurraldean kokatua dago eta Huesca eta Bearneko lurrekin muga egiten du. Bertara igotzeko aukera ezberdinak badaude ere, Linzatik doana izan oi da bide arrunta eta gehien erabilia.
Historia ugari kontatu izan dira bere inguruan; adibidez, hiru erregeen batzar leku izan zela. Hortik bere izena.

 

Linzako aparkalekua bete aurkitu dugu, eguraldiak horretarako laguntzen du. Goiza fresko esnatu zaigu baina eguzkia dagoeneko azaldu da. Ez gara bakarrak mendira irteten eta dagoeneko askok aurre hartu digute. Gu ere atera gara eta uharra zeharkatu bezain laster bideak goranzko jarrera hartu du. Hasiera honetan malda belartsuak aurkitzen ditugu, naiz tarteka harriak ere azaldu. Pakiza Linzola mendia parez dugu eta lautada berde batetik bere norabidean goaz, uhar berri bat zeharkatuz.
Linzako leporantz (1.936 m.),aldapa, berriz ere, tente jarri zaigu Pakizako maldak zeharkatzen ditugunean. Iristen goazen neurrian, lehenbizi Petrechemako gailurra ikusten dugu eta ondoren Hiru Erregeen Mahia. Ikuskizuna paregabea da. Aurrez aurre dugu eta urruti ikusten bada ere, garbi dugu bera dela gure gaurko helburua.

Bideak beherantz jarraitzen du Hoya de la Solana (1.823 m.) zeharkatzen dugun bitartean. Pakiza Linzolako beste aldean gaude dagoeneko. Metalezko txabola txiki baten ingurura iritsi gara, bide gurutze baten ondoan. Bertan elkartzen dira Belagoatik datorren bidea, Zurizatik datorrena eta Linzatik datorrena ere, guk dakarguna hain zuzen.

Bideak berriz goranzko jarrera hartu eta suge bat bai litzan, sigi-saga ugari eginez altuera harrapatzen goaz. Tarteka atseden hartzen dugu eta atzera begiratzen. Dagoeneko Linza urrun geratzen da. Halako batetan, harri handi baten ingurura iristen gara eta ezkerretara segi beharrean aurkitu.

Kare harrizko horma bat igo behar dugu eta hasiera batetan zaila dirudien harren, bidexka arin eta eroso doa. Gora iritsi gara eta ezinbestean bide arrastoak segi behar ditugu, urak kare harriak zulatu bai ditu eta pitzadura ugari sortu. Zein ala zein handiagoa. Arazo handiegirik gabe saihestea lortu ditugu eta berriz ere beherantz goaz.; Budogia (2.367 m.) mendiaren oinpera hain zuzen.

Pixkanaka goranzko norabidea hartu berri du bideak. Gora goazen heinean,Budogiako hormetatik eroritako harriek, ibiltzea oso deseroso egiten digute. Bidea jarraitzen saiatzen gara, batzuetan zaila izan harren. Hiru Erregeen Mahiko lepora inguratzen goaz; oraindik elurra dago bidean. Azken aldapatxo bat eta lepora iritsi gara (2.305 m.). Haizeak gogor astintzen digu eta ezin dugu geldialdi handirik egin.

Bi aukera ditugu tontorrera iristeko. Bata bide arrunta segituz eta bestea ertzetik igoz. Biak egiteko asmotan gaudenez, ertzetik igo eta bide arruntetik jaisteko erabakia hartu dugu. Bide arrunta eskuinera utzi eta parez pare hasi gara igotzen. Harria hotza dago baina segurtasun handia eskaintzen digu. Ez du zailtasun handiegirik azaltzen (II) eta azkar batetan altura irabazten goaz.

Dagoeneko tontorrean daudenen ahotsak entzuten ditugu. Harridura aurpegiekin begiratzen digute Hiru Erregeen Mahaira iristean (2.444 m.). Francisco Xabier Donearen gazteluko maketa eta bere irudia daude bertan.

Gure begien aurrean dugun ikuskizuna harrigarria da. Anie bertatik bertara dugu. Urrunean Midi d´Ossau, Balaitus, Frondiella, Paslas, Facha, Collarada eta beste hainbat ikus ditzakegu. Aurrez aurre Petrechema, Gamueta, Ansabereko orratzak, Alanoak, Ezkaurre eta Txamantxoia ere. Merezi izan du honaino igotzeak.

Aurrez erabaki bezala, jaitsiera bide arruntetik egiten hasi gara. Gorantz datozen hainbat jendeekin gurutzatu gara, batzuek galduta dabiltza ezin bidea bilaturik. Hiru gazteekin datorren gizon bati lagundu diogu norabide zuzena hartzen.

Igo garen baina azkarrago goaz berantz eta sei ordu geroago, berriz ere, Linzako aterpetxera iritsi gara (1.330 m.).

Datu teknikoak

  • Ibilbidea: Hiru Erregeen Mahaia Linzako aterpetxetik
  • Igoera data:25/08/2013
  • Luzera:7 m.
  • Desnibela:1.114 m.
  • Kokapena:Euskal Herria
  • Kategoria : Oinezko igoera
  • Zailtasuna:F
  • Iristeko denbora:3:40 h
  • Nola iritsi:Linza aterpetxeko aparkalekutik (1.330 m.)
  • Igotzeko denbora:6:00 h
  • Jeisteko denbora:2:20 h
  • Materiala:Makilak ondo etorriko zaizkigu.
  • Garaia: Uda, Udazkena, Udaberria
  • IBILBIDEAREN DATU GUZTIAK IKUSI
Gureak eta beste batzuen Cookie-ak erabiltzen ditugu, webgune honen erabiltzaileen nabigazioaren analisia egin ahal izateko.
Nabigatzen jarraitzen baduzu, onartzen duzula suposatzen dugu. Nahi izanez gero, konfigurazioa aldatu edo informazio gehiago jaso ahalko duzu hemen.