Unter Aeschhorn 3.619 m.

Capra Alpina(e)k idatzia.
2320
bisita

Inguruan dituen mendi erraldoiek, dauzkan 3.619 metroekin oharkabe pasarazten dute. Dena den, behatoki paregabea gertatzen da Zinalrothorn eta Weisshorn ikusteko, ala nola Obergabelhorn ipar aurpegi beldurgarriari aurrez aurre begiratzeko ere. Hasiera batetan, gailurrera igotzea ez zen gure asmoetan sartzen. Gure begiradak betidanik mendi ezagun eta handiagoetan jarrita genituen, baina aitortu behar dut ez digula hutsik egin.

Rothorn Hütte aterpetxera bidean Zermatt herritik irten gara. Gaua bertan igarotzeko asmoa dugu eta hurrengo egunean Zinalrothorn 4.221 m. mendira igo. Aterpetxerako desnibela handia da baina eguerdirako lortu dugu bertara iristea. Behin gauzak utzi eta errekuperatu asmoz, jan eta hidratatzen gara. Oraindik goiz denez, komenigarria iruditzen zaigu gabez egin beharreko bidea aztertzera joatea. Kranpoiak, soka, pioletak,... hartuz, segurtasuna batez ere, ezin dugu hutsik egin, eta glaziarrean abiatzen gara. Behin rimaiara iristean eta garbi izanik zein den hurrengo goizean egin beharreko bidea, eskuinera hartuz glaziarraren gainaldera igotzea pentsatu dugu.

Aterpetxera iritsi garenetik, Beñatek begiz jo du aurrean dugun mendia, eta ezer esan ez badigu ere, bere asmoa bertara igotzea da. Gutxika bada ere glaziarrean aurrera goaz, apenas irekita dauden pitzadura gutxi batzuek zeharkatuz, Unter Aeschhorn (eskuinean) eta Ober Aeschhorn (ezkerrean) artean aurkitzen den lepora. Weisshorn eta bere glaziarrera dugun ikuskizuna harrigarria da, aho zabalik gaude.

Azken elurrezko malda tente bat igo beharrean gaude 35/40º desnibela izango duena. Azken ertzera iritsi gara, dagoeneko elurrik ez du baina harri hautsia bai ordea. Zailtasun handiegirik gabe, azkar batetan, gailurrera iritsi gara 3.619 m.

Zalantzarik gabe, behatoki eder honetara igotzeak merezi izan du. Gure eskuinera ikus dezakegu Weisshornen piramide handiosoa, aurrez aurre Zinalrothornen ertz zorrotza eta ezkerretara zirraragarria den Obergabelhorn ipar aurpegia, nahastezina den Cervino mendia eta Monte Rosa mendigunea, beste askoren artean.

Datu teknikoak

  • Ibilbidea: Unter Aeschhorn Rothorn Hütte-tik
  • Igoera data:4/08/2013
  • Desnibela:442 m.
  • Kokapena:Alpeak
  • Kategoriak : Kranpoiak, Oinezko igoera
  • Zailtasuna:F
  • Iristeko denbora:1:30 h
  • Nola iritsi:Zermatt-tik igoz Rothorn Hütte aterpetxeraino 3.177 m.
  • Igotzeko denbora:2:15 h
  • Jeisteko denbora:0:45 h
  • Ezaugarriak:Zailtasun handiegik gabeko igoera. Dena den, ezin dugu gutxietsi glaziarretik ibiltzea.
  • Materiala:Soka, kranpoiak, pioleta, kaskoa.
  • Garaia: Uda
  • IBILBIDEAREN DATU GUZTIAK IKUSI
Gureak eta beste batzuen Cookie-ak erabiltzen ditugu, webgune honen erabiltzaileen nabigazioaren analisia egin ahal izateko.
Nabigatzen jarraitzen baduzu, onartzen duzula suposatzen dugu. Nahi izanez gero, konfigurazioa aldatu edo informazio gehiago jaso ahalko duzu hemen.