Geodesicos ertza - Palas

Capra Alpina(e)k idatzia.
6198
bisita

Palas gailurrak bereizgarri guztiak betetzen ditu mendi handi bat izateko; hurbilketa luzea, itxura lehiakorra, zailtasun ezberdineko igoerak eta ingurune harrigarria. Gure hurbiltzea Soques txabolaren aparkalekuan hasten da (FR), Portaletetik 5 km behera eta oinarri bezala Arremoulit aterpetxe bukolikoa erabiltzen dugu (2305 m.).

Goizeko 6:30ak dira eta iratzargailuak errukirik gabe jotzen du. Aterpetxeko zaindariarekin goizeko 7:00tan gelditu gara gosaltzeko. Prestatu digun guztia jan eta gero, motxilak bizkarreratu eta aterpetxearen atzetik igoera hasten dugu, Palas lepora norabidean. Berehala desbideratu beharrean gara gure ezkerrera (N), harrikari eta elurtegietatik igoz. Udaberri honetan elur asko egin duenez elurra erruz pilatu da. Ikusi besterik ez dugu, inguruan dauden laku guziak izoztuta eta elurreztatuta daudela.

1h.30´eta gero ertzaren hasierara iritsi gara. Arnesak jantzi eta zailtasun handiegirik gabe igotzen hasi gara. Berehala altura irabazten goaz eta aldi berean ertza zorrozten doa. Gutxika bada ere jendarme batzuetara inguratzen goaz. Lehenbizikoa eta handiena mendebaldetik zeharkatzen dugu, segituan berriz ere ertzaren gailurrera igoz.

Azken zatira iristen goazen heinean, ertza aereoago bihurtzen da. Zailtasun handiegirik ez badu ere, gure sentipena oso berezia da.

Harri bloke handi batzuek bidera atera zaizkigun arren, gainditu eta Palas gailurrera iristea lortu dugu (2974 m.). Bertan mugarri izugarri bat dago harri ugariz egina.

Gailurretik dugun ikuskizuna aparta da: Balaitous, Frondellas, Arriel eta bere laku izoztuak, Midi d´Ossau eta beste hainbat ditugu begi bistan. Indarrak berreskuratu ondoren Ladormeur tximiniatik jaisteko prestatzen gara. Horretarako Piton Von Martin norabidean jaitsi behar dugu, kontu handia izanik harri erorketekin, jaitsi behar dugun tartean harri solte asko baitago.

Tximiniaren hasiera gezi gorri nahastezin batek adierazten digu. Rapel egiteko bi ainguraleku badaude ere, guk destrepatzea erabaki dugu. Kontu handia izan behar dugu harrien erorketekin.

Tximiniaren bukaerara iritsi gara eta zeharkaldi motz bezain etzan bat eginez, elurtegi batetara jaitsi eta Piton Von Martinen azpian dagoen tximiniarako norabidean gurutzatu dugu.

Pitonetik jaisten den kontrahorma biratu eta bat batean Palas lepoa ikusten dugu. Arremoulit aterpetxerako jaitsiera elurreztatutako malda batetik jetsi eta umeak baginan bezala gozatzen dugu.

Aterpetxera iritsi aurretik euria hasi digu, eskerrak gutxi egiten duen, baina dagoeneko ez zaigu asko axola. Behin atseden hartu eta indarrak berreskuratu ondoren, berriz ere abiatzen gara Pasage d´Orteigera bidean.

Atera bezain laster ekaitz izugarri bat hasi da, hasierako euriak txingorrari lekua utzi dio eta minutu batzuetan zoru guztia zuritzea lortu du. Trumoiak hots beldurgarriz lehertzen dira gure gainean eta tximistak, berriz, gure inguruan erortzen dira. Ekaitzaren erdi erdian gaude eta nahi dugun bakarra aldentzea besterik ez da. Arrious lepora iristean korrika hasi gara, Soques txabola ingurura bitarte.

Jaitsieran sentitu duguna hitz bakar batekin definitu behar izango bagenu “beldurra” izango litzateke eta behin kotxera iristea lortzen dugunean berriz ”lasaitasuna”. Ekaitzak, mendian, arriskutsuak dira. Batez ere, metalezko aparatuak aldakatik zintzilik baditugu.

Datu teknikoak

  • Ibilbidea: Palas Geodesikoen ertza
  • Igoera data:21/07/2013
  • Desnibela:669 m.
  • Kokapena:Pirinioak
  • Kategoriak : Ertza, Oinezko igoera
  • Zailtasuna:PD
  • Harri eskaladaren zailtasuna:II
  • Hasiera puntuan amaitzen da:Bai
  • Iristeko denbora:4h.
  • Nola iritsi:Arremoulit aterpetxetik (2305 m.)
  • Igotzeko denbora:8h. 30´
  • Jeisteko denbora:4h. 30´
  • Ezaugarriak:Mendigoizale frantxesen ibilbide arrunta. Zailtasun handiegirik gabeko eskalada, azken zatian oso airezko bada ere. Beharrezkoa ez bada ere eskalatzeko gauzak erabiltzea pentsa dugu, entrenamendu bailitzan, ondoren saiatuko garen beste proiektu handiagoak direla eta.
  • Materiala:Soka, kaskoa, zintak, friend-ak eta fisureroak.
  • Egoera:Elur askorekin aurkitu gara, ertzean izan ezik. Arroka ona bilatu dugu eta heldulekuak ugari.
  • Garaia: Uda, Udazkena
  • IBILBIDEAREN DATU GUZTIAK IKUSI
Gureak eta beste batzuen Cookie-ak erabiltzen ditugu, webgune honen erabiltzaileen nabigazioaren analisia egin ahal izateko.
Nabigatzen jarraitzen baduzu, onartzen duzula suposatzen dugu. Nahi izanez gero, konfigurazioa aldatu edo informazio gehiago jaso ahalko duzu hemen.