Xabier bidea (6a+), Egino

Capra Alpina(e)k idatzia.
6501
bisita

Eginoko eskolan aurkitzen da bide zoragarri hau, 6a+eko zailtasuna gainditzen ez duena. Nahiz eta hasiera batean eskalada zaila dirudien, parabolt ugari daude eta gozagarri egiten da maila asko ez dugunontzat. Eginoko herritik iritsi daiteke bertara, oinez 20 minutura, edo bestela, kotxea La Leze-ko aparkalekuan utzi daiteke, 7 monolitoak gurutzatu eta hemendik 10 minutura bidera iritsi. Azken aukera honekin, jetsieran kotxera zuzenean iritsiko gara.

1. luzea (V, 40m): Xabi hasi zen irikitzen. Zuhaitz baten azpian hasten da. Lehen bileraraino helduleku onak. Oso ondo ekipatua.

2. luzea (6a, 35m): Nik jarraitu nuen hormako zulo bertikaletik gora. Bilkunetik erraza zirudien, baina bertan negoenean majo sufritu nuen. Hortzak estutu eta agian tranparen bat edo besterekin, lortu nuen gora iristea. Ez zaio beldurrik izan behar, paraboltak 2 metroro baitaude.

1. bitartekoa (5 minutu): 3 metroko ertz estu estu bat. Zaldian muntatuko bagina bezala zeharkatu behar da, ez dago beste aukerarik. Oso estua. Pasa ondoren, balkoi eroso batera iritsiko gara.

3. luzea (V+, 50m): Niretzat, bide guztiko luzerik politena. Xabik izan zuen irekitzeko parada eta zortea. Eta gozatuz ireki zuen. Denetik du luze honek: "adherentziazko" pausuak, zulo bertikalak, deskantsatzeko aukera ematen duten helduleku onak, etab... 17 parabolt dauzka guztira. Gehiegitxo.

2. bitartekoa (10 minutu): Belar eta harroketatik zehar puntu gorriak jarraitu behar dira. Nahiko gogaikarria zatika. Puntu gorriak ez dira oso nabarmenak, erdi ezabatuak daude eta. I-eko pausu batzuk.

4. luzea (6a+/A0, 20m): Zailena eta bideari zailtasuna ematen diona. Hala ere, 2 metroro paraboltak dauzka eta beti egin daiteke A0n. Helduleku onak ditu eskuentzat, baina zailtasuna oinak ondo jartzean dago. Xabik pare bat parabolt zapaldu behar izan zituen, baina hala ere oso ondo igo zuen gainontzeko guztia.

3. bitartekoa (10 minutu): Berriz ere belar artetik pasa eta eskuinetan dagoen zulo baten ezkerreko ertzetik jarraitzen du bideak. Bidea ez dago oso argi. IIIko pausuren bat dago.

5. luzea (6a/alternatiba V+, 45m): Nahastu egin ginen. Eskuinegi joan ginen eta paraboltak ikusi bezain pronto, bertara joan ginen. Luzearen erdian konturatu nintzen ezkerretan zegoen ertzean paraboltak ere bazeudela, inguruko beste hainbat hormetan bezala. Luze honen erreferentzi gabe, gora jarraitu nuen eta amaieran ez zegoen bilera muntatzeko ezer. Beraz, zintak erabili behar izan nituen Xabiri goitik heltzeko. Orokorrean, oso luze gozagarria eta V+eko zailtasunekoa iruditu zitzaidan.

4. bitartekoa (15 minutu): Soka jaso eta azken luzeraino joan ginen. Horretarako, ezkerreruntz abiatu ginen, luze originalaren amaierara.

6º luzea (III, 10m): Ez da aseguratu beharrik. Guk ez genuen egin behintzat. Azkenik, Olanoren gainera iritsi ginen.

Eskalada egun zoragarria izan zen. Goizean, Urresteiko ertza egin genuen, Atxarten. Arratsaldean, Eginora joan ginen. Egia esan, luze batzuetan indarrak falta izan zitzaizkigun, eskalada ordu asko baikeramatzan gainean. Hala ere, Xabik eta nik taldelan bikaina egin genuen. Ondo konpentsatu ginen eta momentu zailetan Xabik ez zuen dudarik izan aurrera jarraitzeaz. Garbi dago ez dagoela urrutira joan beharrik kalitatezko eskaladaz gozatzeko!

Datu teknikoak

  • Ibilbidea: Egino Xabier bidea
  • Igoera data:15-06-2013
  • Luzera:200 m.
  • Desnibela:200 m.
  • Kokapena:Euskal Herria
  • Kategoriak : Ertza, Eskalada klasikoa
  • Zailtasuna:MD
  • Luze kopurua:6
  • Hasiera puntuan amaitzen da:Bai
  • Iristeko denbora:30'
  • Nola iritsi:La Leze-ko aparkalekutik, 30 bat minutura oinez. Pista batetik hasi igotzen, monolitoak zeharkatu eta 10 minututan iritsiko gara bidearen hasierara.
  • Igotzeko denbora:4 h.
  • Jeisteko denbora:45'
  • Ezaugarriak:Hegoaldera jotzen du. Bero asko. Oinezko zatietan gogaikarria izan daitekeen landaretza.
  • Materiala:17 express, soka, kaskoa, mosketoiak eta bilerak egiteko zintak.
  • Garaia: Uda, Udazkena, Udaberria
  • IBILBIDEAREN DATU GUZTIAK IKUSI
Gureak eta beste batzuen Cookie-ak erabiltzen ditugu, webgune honen erabiltzaileen nabigazioaren analisia egin ahal izateko.
Nabigatzen jarraitzen baduzu, onartzen duzula suposatzen dugu. Nahi izanez gero, konfigurazioa aldatu edo informazio gehiago jaso ahalko duzu hemen.