Euskal Herria Mendi Erronka

Capra Alpina(e)k idatzia.
2435
bisita

Euskal herria mendi erronka Esaitek eta Euskal Herriko federazio nazionalak antolatu dute. Leitzan hasi eta amaitu da, 65km eta 3.500 malda positiboa duelarik. Izena  eman genuen momentuan ez genuen pentsatu ere egiten zer eguraldi izango genuen;  nork pentsa behar zuen negu giroan murgilduta egongo ginakeela! Jada atzera bueltarik ez dago.

Lasterketa eguna iritsi da eta goizeko 4:45 ordutan iratzargailuak jo du. Prestatuta dauzkagun arropak jantzi eta sukaldera gosaltzera sartu gara. Aurrez aurre ohar bat aurkitu dut eta beste gauza batzuen artean honako hau dio, “Badakizu zugan konfiantza osoa dugula. Gogoratu hitz hauek momentu txarretan. Muxu handi bat!”. Inongo dudarik baldin banuen, orain zalantza guziak uxatu ditut hitz hauek irakurtzean.

Gezurra badirudi ere ekainaren lehen egunean gaude eta negu betean gaudela dirudi. Euria, lainoa, hotza, haizea… ez da ezertxo ere falta. Goizeko seiretako Leitza herrian gaude, lasterketa zenbakia jaso behar dugu eta Unai bertan dago. Beñat eta Oihana minutu batzuk geroago iritsi dira. Zazpiak arteko denbora taberna batean kafesne bat hartuz pasatu dugu, kalean itxaroten egoteko ez baitago giro aproposik. Irteteko ordua inguratzen doa eta irteera gunera gerturatu gara. Euria ari du eta eguraldi kaxkar honek lasterketari batzuk atzera bota ditu. Hasiera batean izen emanda geunden 500 bat korrikalarietatik, 400 bat geratzen gara.

Hasi gara korrika Leitzako kaleetan zehar Guratz eta Gorritirantz. Hasierako bide zabala bidexka estu batetan bihurtu da eta banaka bakarrik joan daiteke. Hilera luze bat osatzen dugu, suge bat bailitzan, ezker eskuin dabilena. Bidea oso polita da baina apenas ikusterik dugu, lainoak dagoeneko irentsi baikaitu. Jendea pasa ahala lokatza areagotzen doa eta aldapan gora ibiltzea oso zaila egiten da. Gorriti herria atzean utzi eta Santa Barbara gailurrera igo gara. Bertatik Arribe herrirako jaitsiera luzea egin eta berriz ere gorantz Gaintza herriko hornidura postura igo gara.

Zerbait jan eta edan ostean, lasterketako zatirik gogorrena hastear gaude: Irumugarrietako igoera. Lokatzak ez digu batere laguntzen aldapa igotzen, pausoak aurrera bezain laster atzera joaten dira eta bukaezina dirudi. Bat batean oihuak entzuten ditugu, laino artetik datoz. Irumugarrietako lepora iritsi gara eta haizeak eta euriak gogor astintzen gaituzte. Lainoaren erruz ezer ikusten ez dugunez gutxi falta zaigula dirudi baina gailurrerako bidea oraindik ere luze egiten zaigu. Iritsi gara eta kontrola dago bertan. Antolatzaileek badute bai meritua orduak eta orduak hantxe geldi guri itxoiten jarrita. Harkaitz arten goaz ahal dugun bezala Unagako putzu inguruan dagoen hornidura postu-arte. Eskularruak janztea ere oso zaila egiten zait, hotza baitago. Euria eta haizea ere ez zaizkigu falta, beraz, lehenbailehen Albira jaitsi beharra daukagu. Bertan haize eta hotz sentsazioa gutxitu da.

San Migelera igotzen hasi gara eta azken bi kilometroak errepidez egin ditugu. Eguraldi txarra dela eta jende gutxi dago. Kontrola eta hornidura postua dago bertan. Zerbait jan eta salda bero bat edan ondoren, berriz ere lasterkan Ata norabidean goaz. Lokatzez gainezka dago ibilbidea, zutik egotea ere zaila egiten da. Nola edo ala Atako hornidura postutik igaro eta Lekunberrira zuzendu ditugu gure pausoak. Kostata baina bertan gaude, tren geltokian dago hornidura postua.

Jan eta edan ondoren Ireber mendiaren gailurrera zuzentzen gara, lasterketako azken zailtasuna. Hasiera erosoa du eta gutxika gorantz goaz, baina bat batean malda tente batzuekin aurkitzen gara eta ezusteko galanta izan dugu. Hemen ere haizea oso gogor eta zakar dabil eta hotza hezurretaraino sartzen da. Denborarik galdu gabe beherantzako bideari ekiten diogu eta inguruan dagoen ur postutik pasaz, Kornietako hornidura postura iristen gara. Dagoeneko azken sei kilometroetan gara, helmuga gertu dago eta iristeko gogoa handia da. Berantz goazen neurrian lainopetik ateratzen gara. Leitzako baserriak begi bistan ditugu eta emozioa handitzen doa. Azken aldapa batek Leitzako kaleetan utzi gaitu eta plazara bidean jendearen txaloak jasotzen ditugu. Helmuga aurrez aurre dugu, azken pausoak eta lasterketa amaitu da.

Emozioa, poza, hainbat sentsazio bat batean burura etorri zaizkigu. Gogorra egin zaigu, euria, haizea, hotza eta lainoaren erruz. Eguraldia txarra izateak oraindik ere meritu gehiago ematen dio lasterketa bukatzeari. Dena den lasterketan parte hartu dugunok gaizki pasa badugu ere, antolatzaile eta bolondresek  ez dute meritu makala. Edozein lekuetan aurkitzen ziren gure ibilbidea erosoagoa eginez, edaria eta jana ez zaigu falta izan eta beti ere animatu eta laguntzeko prest egon dira. Beraiengatik izan ez balitz lasterketak arrakastarik ez luke izango. Ibilbidea ikusgarri markatua zeukaten eta galtzeko arriskurik ez zegoen, helmugan berriz jaten eta edaten nahi haina eman ziguten. Suhiltzaileak ere bertan zeuden eta lokatza kentzen lagundu digute. Zorionak denei eta datorren urterarte.

Datu teknikoak

  • Ibilbidea: Euskal Herria Mendi Erronka
  • Igoera data:01/06/2013
  • Luzera:65 m.
  • Desnibela:3.500 m.
  • Kokapena:Euskal Herria
  • Kategoria : Traila
  • Leihaketa:Bai
  • Gehieneko denbora:16 h.
  • Webgunea:http://ehmendierronka.com/
  • Nola iritsi:Leitzako plazatik.
  • Materiala:Makilak
  • Garaia: Udaberria
  • IBILBIDEAREN DATU GUZTIAK IKUSI
Gureak eta beste batzuen Cookie-ak erabiltzen ditugu, webgune honen erabiltzaileen nabigazioaren analisia egin ahal izateko.
Nabigatzen jarraitzen baduzu, onartzen duzula suposatzen dugu. Nahi izanez gero, konfigurazioa aldatu edo informazio gehiago jaso ahalko duzu hemen.