Néouvielle eta Trois Conseillers ertza

Capra Alpina(e)k idatzia.
5468
bisita

Harrigarria, hunkigarria eta erabat gomendagarria. Edozein adjektibo jartzen diogularik ere igoera miresgarri onek edozer txiki uzten du, Pirineotako klasikoen artean klasikoa. Ertza Point Reboul Vidal-en hasten da eta Ramoun mendian bukatu, Neuvielle gailurra izanik puntu gorenena eta Erreserba Naturak honi izena ematen diona. Frantses mendigoizaleen artean bisitatuenetako mendia izanik.

Ostirala da eta lanetik irten bezain laster Nouvielle Erreserba Naturalera gerturatzen gara, Saint Lary Soulan herri polita atzean utziz. Gabeko hamaikak dira eta oso ilun dago Aubert lakuko aparkalekura iristen garenean. Kanpin denda inguruan ezartzen dugu eta denbora askorik ez dugunez, zakuetan sartu eta lo egiten saiatzen gara.

Goizeko 6:00-tan jaikitzen gara, zakuak eta kanpin denda jaso ondoren, gosaldu eta abiatzeko prestatu ere. Bila ibili arren ez dut nire frontala aurkitzen, ziur etxean utzi dudala, harritzekoa. Beñat eta Unaien inguruan joaten saiatzen nahiz, hauek frontala ekarri bai dute, igotzen hasten gara harri bloke handien artean Katuaren mendatera norabidean. Ez zait batere erraza egiten bikotea segitzea eta estropuz besterik ez dut egiten. Eskerrak ez dela denbora asko falta eguna argitzen hasteko eta horrek lasaitzen nau.

Ez zaigu batere erraza egiten Cap de Long isurialdera jaisten. Gorantz goaz Ramoun hormaren oinpean, Nouvielle zuloguneko norabidean. Bidea oso argi ikusten dugu eta inongo zailtasunik gabe zulogunearen hasiera igotzen gaitu. Hasierako zati airezkoak eskuak erabiltzea behartzen gaitu (II), ondoren harkaiztegi bertikal batek, esfortzu handia eraginez, Nouvielle zulogunearen gainean uzten digu (2926 m.), Tres Conseillers eta Nouvielle mendien erdian.

Ezkerretara jotzen dugu Tres Conseillers (3039 m.) mendia igo asmoz. Nouvielle ertzera dauden bistak ikusgarriak dira. Ertza jarraituz berantz goaz Turon de Nouvielle norabidean, granitoko bloke handien gora behera artean, Turon lepora iritsiz eta bertatik inongo zailtasunik gabe bere gailurrera (3035 m.), harriz eginiko mugarri handi bat duelarik. Ertza jarraituz, gure oinpean Pointe Reboul Vidal gailurra (3007 m.) ikusten dugu eta beregana bideratzen ditugu gure pausoak, zailtasun handiegirik gabe iritsiz.

Nouvielle zulogunera (2926 m.) bitarteko bidea desegiten dugu, ertz bertikalaren oinperaino, bertan dagoeneko jendea eskalatzen ikusten dugularik. Jende asko pilatuta dagoenez hormaren azpian itxarotea pentsa dugu. Indarrak berreskuratzeko baliatzen gara eta prestatu eskaladarako, botak kendu eta katu hankak, arnesa, kaskoa jarriz eta sokak ateraz.

Unai lehenengo luzearen eskalada hasi du, ez da zaila (II+) eta konturatzen garenerako aurreneko bilkura prestatu du. Beñatek eta nik atzetik jarraitzen diogu. Bigarren luzea aurrekoa baina exigentegoa da, baina zailtasunik gabe gainditzen du (II-III), irtengune baten oinpera iritsiz, eguneko lehen benetako zailtasuna, bertan pitoi bat dagoelarik.

Bi aldeetara ditugun amildegiek zirrara sorten dute baina oso seguru goaz eta granitozko arroka bikainek ematen diguten konfiantza handia da. Unai aurrera doa indartsu, behatzak sartzeko arteka batzuk baina oinak jartzeko apenas dauzka (piton bat), dena den, bertikala izan arren, dituen bost metroak oso erraz gainditzen ditu (IV).

Itxuraz ertzak atseden txiki bat eskaintzen digu eta etzanagoa den zati batetik (I-II) jarraitzen dugu, harri bloke handi eta oinpean ditugun amildegi artean. Iritsi gara diedroaren oinpera hainbeste ezinegon eta zalantza sortu diguna. Jakin badakigu aukera errazago bat dagoela gainditu ahal izateko eskuinerantz, buzoiaren pasabidea, baina zalantza izpirik gabe aurrean dugun diedro polit eta bertikala igotzeko erabakia hartu dugu (10 m. eta IV+), Bertan pitoi bat dago eta ezin atera utzitako friend bat ere eta baliatzen ditugu ziurtatzeko. Unai konfiantza osoz doa eta koordinazio bikainarekin diedroa erraztasunez gainditzen du, gozatua da nola igotzen duen ikustea.

Hemendik aurrera, ertzak berriro ere atseden unea eskaintzen digu, naiz igo eta jaitsi egin beharrean gauden ataka pare bat, oso airezko (II-II+), azken irtengune garrantzitsura iristen garelarik, “La Proa” bezala ezaguna dena. Horma tente bat da gailurra babesten duena eta itsasontzi baten branka dirudiena. Eskuinetik erasotzen diogu, heldulekuak ugariak dira eta oso onak, zeharka igotzen doazen apal batzuek (III), gailurraren ingurura igotzen gaituzte.

Katu hankak kentzeko baliatzen gara, dagoeneko bere betebeharra soberan bete bai dute eta gainera, egia esan, min ematen digute, eta zailtasun handiegirik gabe (I) Nouvielle gailurrera iritsi (3091 m.). Oso zoriontsu eta arro gaude, eskalada oso polita eta dotorea izan da. Bertatik dugun ikuskizuna ere aparta, Vignemale, Gavarnieko zirkua, Hiru Sororeak, Troumouseko zirkua, Poset, Bachimala, Pic Long, Campbiel eta askoz gehiago ere.

 

Jaisten hasi gara gure ezkerretara amildegi bat saihestu asmoz eta behin gainditzea lortu dugunean, eskuinera hartu altura gutxien galduz, berriz ere ertzera igo asmoz, Ramoun mendiaren norabidean. Bukaezinak diruditen ataka txikietatik goaz gora eta behera, lepora iritsi bitarte. Horma bertikal batek, helduleku onak dituena (III), bloke handi batzuetara eramaten gaitu eta zailtasun gehiegirik gabe Ramoun gailurrean utzi (3011 m.) eta ertz zoragarri honen amaiera.

Oikoa den argazkia egin eta or goaz berantz denbora askorik galdu gabe. Ipiniak dauden anklajeak baliatuz rappel pare bat eginez, hormaren oinpera jaisten gara eta harrikari deseroso batera ere. Egia esan, beherantz harrikarian denbora luzez joan beharrean gaude eta ez da batere atsegina, Barris d´Aubert ertzaren azpitik.

Behin 2400 m. inguruan gaudelarik, Ramoun-etik jaisten den ertza zeharkatzen dugu eta sigi-saga ugari eginez, Aubert lakuaren hormaraino jaisten gara eta minutu batzuek geroago, autoa aparkatuta dugun lekura iritsi.

Eskalada ikusgarri honek momentu hunkigarriak eta ahaztezinak oparitu dizkigu, umeak baginan disfrutatzeko aukera ere. Kontutan izan beharrekoa, oso komenigarria da goiz ibiltzea eskalada unean jende pilaketa sortzen bai da eta ibilbidea oso luzea eta gogorra egiten da.

Datu teknikoak

  • Ibilbidea: Neouvielle Trois Conseillers ertza
  • Igoera data:15/09/2012
  • Desnibela:929 m.
  • Kokapena:Pirinioak
  • Kategoriak : Ertza, Eskalada klasikoa
  • Zailtasuna:AD+ (III+ behartua)
  • Harri eskaladaren zailtasuna:IV+
  • Iristeko denbora:10h.25´
  • Nola iritsi:San Lary Souland herritik Fabianera igotzen gara eta Nouvielleko Erreserba Naturalera doan bide bihurria segiz Oredon lakura eta jarraian Aubert lakura (2160 m.).
  • Igotzeko denbora:12h.30´
  • Jeisteko denbora:2h.05´
  • Ezaugarriak:Ibilbide luze eta oso gogorra. Hiru konseilarien ertzean IV et IV+ pausuak.
  • Materiala:Soka, kaskoa, arnesa, katu hankak, zintak, fisureroak eta friend batzuek.
  • Garaia: Uda, Udazkena
  • IBILBIDEAREN DATU GUZTIAK IKUSI
Gureak eta beste batzuen Cookie-ak erabiltzen ditugu, webgune honen erabiltzaileen nabigazioaren analisia egin ahal izateko.
Nabigatzen jarraitzen baduzu, onartzen duzula suposatzen dugu. Nahi izanez gero, konfigurazioa aldatu edo informazio gehiago jaso ahalko duzu hemen.