Arnales eta bere lakuak

Capra Alpina(e)k idatzia.
3017
bisita

Dudarik gabe alderdi honetako gutxien zapaldutako hiru milakoa, kontutan izanik gainera zein bizi lagun dituen Picos del Infierno eta Garmo Negro. Behin baino gehiagotan saiatu arren ezin izan dugu gailurra zapaldu. Ez dago bide garbirik ez eta arrastorik ere, azken zati bertikal eta malkartsuak, zer ikusia izan dute horretan. Dena den, beti zerbait ikasten denez, saiakera berri bat egiteko asmoa dugu gailurra zapaldu asmoz eta ondoren, kontrako isurialde tentetik jaitsi, bertan aurkitzen diren laku dotoreetatik.

Autoz Panticosa Balneariora iritsi gara, baina bertan dagoen Casa de Piedra aterpetxean (1636 m.) lo egin genezakeen, bertan duen aparkalekutik ibilbidea hasiz. Ondo dakigu zer aurkituko dugun, ez alferrik behin baina gehiagotan igo gara bere malda tenteetatik. Bidetxur garbi batek bat batean Argualas uharraren ezkerraldetik altuera azkar irabazten laguntzen digu. Behin lehenengo zati hau gaindituz gero, zelai batera iristen gara uharraren inguruan eta inoiz zeharkatu behar ez duguna (1860 m.).

Gure norabidea iparrerantz doa malda tenteetatik zehar eta Argualas eta Arnales sakanaren erditik. Mallata alta de Argualas (2200 m.) deritzan lekuan gaude, baina oraindik ere Pondiellos lepoa oso urruti ikusten dugu. Hemen, Marijo eta Enara guregandik aldentzen dira eta Arnales lakuetara doan bidea jarraitzen dute, gure jaitsieraren zain geldituz bertan. Unai eta ni aurrerantz jarraitzen dugu inguru hau histen duen irtengunea gainditu asmoz. Zapaltzen goazen lurra oso ezegonkorra da eta eskuak behin baina gehiagotan erabili beharrean aurkitzen gara. Pondiellos lepotik jaisten den hodian sartzen gara, izugarri kostatzen zaigu aurrera egitea, biderik ez dago, mugarriak desagertu zaizkigu eta harriztatua dagoen malda bertikal bat igotzen goaz. Leku hau betidanik gogorra egiten zaigu eta oso maiz atseden hartu beharrean gara, badirudi inoiz ez dela bukatu behar. Esfortzu handia egin eta gero, azkenik Pondiellos lepora iritsi gara (2809 m.). Beste isurialdea askoz ere etzanagoa da eta politagoa ere, bertan Pondiellos lakuak ikus ditzakegu.

Gure eskuinera jarraitzen dugu Pondiellos mendiaren (2825 m.) oinetatik zehar, beti ere saiatuz altura gutxien galtzen. Bidea berriz ere garbi azaltzen zaigu eta zailtasunik gabe Arnales lepora eramaten gaitu eta zuzenean Erdi eta Ekialdeko Infiernos gailurren artean dagoen korridorera zuzentzen da, gauden lekutik oso ikusgai da. Dena den, Arnales oinpean gaudenean bidea utzi eta gorantz zuzentzen ditugu gure pausoak, horma bertikala zuzenean igotzen hasiz. Beti ere eskuinerako norabidea eramango dugu, ezkerretara agertzen den plaka liso eta heldulekurik ez duena saihestu asmoz. Behin plaka gainditzen dugunean ezkerretara hartuz gailurreko ertzera ateratzen gara eta zailtasunik gabe, Arnales tontorrera iritsi (3006 m.). Egun ederra, zerua urdin dago, lagunarte ezin hobea eta bista izugarriak. Picos del Infierno gure eskuinera, Garmo Negro eta Argualas ezkerrera, aurrez aurre Midi d´Ossau eta gure atzean Vignemale ikusgarria.

Ertza jarraitzen dugu bigarren mailako gailur bateraino (3001 m.), mugarri handi bat duena. Jaitsiera zuzena hasten dugu kanal estu batetik hormaren oinpean uzten gaituelarik, Arnales lakuen norabidean. Jaitsiera guzia harri solteen nahaspila da, mozketa eta amildegi izugarriak ere dituelarik, tarteka atzera ere egin beharrean gaude zeharkatu asmoz. Eskuak erabiltzea beharrezkoa egiten zaigu eta naiz berantz goazen, bide eta arrastoen faltak oso zaila egiten digu aurrerabidea. Azkenik lortu dugu lehen lakura heltzea, bertatik oso garbi ikusten ditugu Diente de Batanes (2894 m.) eta Peña Xuans (2838 m.) gailurrak.

Lakuaren eskuinetik jaisten gara eta isurbidea jarraituz bigarrenera ere heltzen gara, Marijo eta Enara dauden lekua hain zuzen. Behin denak elkarturik jateko baliatzen gara eta lasai atseden hartzeko ere. Gainditu dugun desnibelak, bai gorantz, bai berantz, oso estu hartu digu, kontutan izanik gainera ibilbide gehiena harri hautsien artetik egin beharra izan dugula.

Falta zaigun bakarra Balneariora jaistea besterik ez da eta Casa de Piedra aterpetxera iritsi, garagardo fresko batzuekin ospatzen duguna. Arnales ez da bisita asko jasotzen dituen gailurra eta guk aukeratu dugun jaisteko ibilbidea apenas ibili oi da. Ez dago bide arrastorik, ez da bidea erakutsiko digun mugarririk ere, baina egun argitsua den bitartean, ez du arazo gehiegirik. Kontu handiz lainoa sartzen bazaigu, norabidea bat batean galdu genezake eta amildegi ugari dagoenez arrisku handia jasan.

 

 

Datu teknikoak

  • Ibilbidea: Arnales Panticosa-ko Bainuetxetik
  • Igoera data:23/8/2010
  • Desnibela:1.470 m.
  • Kokapena:Pirinioak
  • Kategoria : Oinezko igoera
  • Zailtasuna:PD-
  • Harri eskaladaren zailtasuna:II
  • Hasiera puntuan amaitzen da:Bai
  • Iristeko denbora:3h.20´
  • Nola iritsi:Panticosa balneariotik (1636 m.) 7 km. errepidez Panticosa herritik.
  • Igotzeko denbora:5h.20´
  • Jeisteko denbora:2h.
  • Ezaugarriak:Pondiellos leporaino bidea nolabait markatua dago, bertatik gailurrera bitarte ez dago arrastorik. Jaitsiera Arnales lakuetara zuzenean egingo dugu, harri bloke handi eta amildegietatik , inongo arrastorik gabe.
  • Materiala:Makilak.
  • Garaia: Uda, Udazkena
  • IBILBIDEAREN DATU GUZTIAK IKUSI
Gureak eta beste batzuen Cookie-ak erabiltzen ditugu, webgune honen erabiltzaileen nabigazioaren analisia egin ahal izateko.
Nabigatzen jarraitzen baduzu, onartzen duzula suposatzen dugu. Nahi izanez gero, konfigurazioa aldatu edo informazio gehiago jaso ahalko duzu hemen.