Robiñera

Capra Alpina(e)k idatzia.
2543
bisita

Bere profila leku askotatik ikusi oi dugu eta betidanik aurkitu izan dugu gailur tente eta ikustatuz inguratua, ezin bestean oharkabe egin dutena dudarik gabe. Bere kokapena Munia mendigunearen hegoaldean datza, Aragoi lurretan osotasunean dagoelarik. Pineta aranean gaude, igandea da eta etxera itzuli beharra dugu; dena den, ez dugu beste behin aukera galtzeko asmorik eta bere gailurrera igotzeko erabakia hartu.

Autoz Pietramula iturrira bideratu gara (1920 m.), bai baitakigu bertan aparkaleku bat dagoela. Pistaren azken zati eskasak galarazi gaitu bertara iristea eta autoa beherago, ezin bestean, utzi beharrean gara eta oinez gerturatu. Behin Pietramulako ordokira iritsi, eskuinera Pinetara doan GR11 bidea utzi, Lienako meategietara doan pista eskuinetara utzi eta zuzenean jarraituko dugu Clot sakanaren norabidean. Ibilbidea garbia da eta sigi-saga eginez Chinipro (2800 m.) mendiaren belarrezko maldetatik igotzen doa.

Gutxika bada ere desnibela gainditzen goaz zailtasunik gabe eta azken arrokazko aldapa batek Las Puertas lepoan uzten gaitu (2530 m.). Bide gurutze batetan gaude , hemen elkartzen dira Pinetatik Fuen Santa sakanetik datorrena, Troumouse zirkutik eta Munia lepotik igotzen dena, Barrosa zirkutik datorrena ere eta gu igo garena. Denbora batez atseden hartzen dugu eta ikuskizunez gozatu. Munia lakuen ondoan aurkitzen gara, Robiñera mendiaren oinpean. Bestaldeko sakanera zeharkatzen dugu, harriztatutako malda tente eta bukaezin bat aurkitzen dugularik (elurra dagoenean 40º). Pazientzi handiz eta sigi-saga ugari eginez altura pixkana irabazten goaz, elurrik gabe zailtasunik ez duena. Sakabanaturik goaz bakoitza bere bidea eginez, baina denak ere lortu dugu maldaren goiko aldera inguratzea eta gure ezkerretara zeharkatuz, ertzaren azpira iritsi, kanal batetik (I+) gainditzen dugularik.

Barrosa aran-aldetik ertza jarraitzen dugu, zulo batera jaitsi eta horma batek jarraitzen diolarik, Robiñera gailurrean uzten gaituena (3003 m.). Ezustea, jendea dago gailurrean eta guk pentsatzen genuen apenas etortzen zela inor. Hotz dago, eguna lainotu zaigu eta haizea indarrez dabil. Zoritxarrez ezin dugu bertatik dagoen ikuskizunez gozatu.

Denborarik galdu gabe jaitsiera hasi dugu ertza jarraituz, harriztatua den malda tentera iritsiz, hemen goitik oso ezberdina ikusten badugu ere. Behin Las Puertas lepoan, Chinipro mendiaren malda belartsuetatik jaistea besterik ez dugu Pietramulako aparkalekura iristeko. Lainotua dago baina eguzkia tarteka ateratzen da eta dagoeneko epelago, pistatik goaz aparkatuta utzi dugun autoaren bila. Garbi dago ez dela gailur harrigarri, erakargarri, ez eta tentagarria, baina bere 3003 metroak ezinezkoa egiten dute Pirineotako hiru milakoak pilatu nahi dituenari igotzea. Dena den, mendia eta natura gustukoa dituen edonork beti izango du bertara igotzeko arrazoirik. 

 

Datu teknikoak

  • Ibilbidea: Robiñera Pietramulako Iturritik
  • Igoera data:11/09/2011
  • Desnibela:1.083 m.
  • Kokapena:Pirinioak
  • Kategoria : Oinezko igoera
  • Zailtasuna:F
  • Hasiera puntuan amaitzen da:Bai
  • Iristeko denbora:3h.
  • Nola iritsi:Pietramula iturritik (1920 m.) 7 km. errepidez eta 6 km. pistaz Bielsatik.
  • Igotzeko denbora:4h.30´
  • Jeisteko denbora:1h.30´
  • Ezaugarriak:Igoera zuzena apenas atsedenik duena hartxingadi luze eta tente batetik.
  • Materiala:Makilak.
  • Garaia: Uda, Udazkena
  • IBILBIDEAREN DATU GUZTIAK IKUSI
Gureak eta beste batzuen Cookie-ak erabiltzen ditugu, webgune honen erabiltzaileen nabigazioaren analisia egin ahal izateko.
Nabigatzen jarraitzen baduzu, onartzen duzula suposatzen dugu. Nahi izanez gero, konfigurazioa aldatu edo informazio gehiago jaso ahalko duzu hemen.