Talaia Bidea

Capra Alpina(e)k idatzia.
1853
bisita

Donostia Hondarribia Traila azken hilabeteetan egutegian markatuta dugun lasterketa bat da. Egunak daramatzagu beraz hitz egiten eta parte hartzeko zortea izatea nahiko genuke, baina kontutan izan da 500 korrikalarientzako dagoela lekua eta askoz gehiagok parte hartu nahi dutela, zaila egiten zaigu aukera izatea dortsal bat lortu ahal izateko. Apirilaren 9-an goizeko 10:00 h. zabaldu dute inskribatzeko aukera eta 10:58 h. agortuta geratu da, eskerrak Unai tentuz ibili dela eta bere izena eman ahal izan du eta nirea ere, Beñat berriz itxaron beharrean da erreserban.

Donostiako Gros auzoko Katalunia plazara iritsi gara, zerua estalia dago, hotz egiten du eta zirimiria erortzen ari da. Korrikalariak batera eta bestera dabiltza muskuluak berotu asmoz irteera eman aurretik, guk ere gauza berbera egiten dugu baina intentsitate gutxiz. 9:30 h. dira eta lasterketa bere orduan hasi Groseko kaleetan barrena Ulia mendira norabidean. Lehenbiziko zati hau lasai hartzen dugu, kontutan izan da aurrean dugun aldapa tenteak inbutua sortuko duela eta igotzeko erritmoa moteldu, gehienak oinez igotzen bai dira. Behin zatirik tente eta estuena igotzea lortu dugu eta Uliako bide dotorean korrika goazela, Zurriolako hondartza gainean izugarrizko ortzadarra ikusten dugu; aho zabalik utzi gaitu.

Bidea polita baina estua da eta banaka joatea behartzen digu eta aurreratu nahi izan ezkero, ezinbestekoa zaigu bidetik irtetea. Poliki bagoaz ere kilometroak arin egiten ditugu, daramagun erritmoa ona da eta sentsazioak ere. Plata Farora iritsi gara, lasterketako 6 km, eta errepidez zati bat eginez ezkerretara ateratzen den bidea hartu eta aldapa tente bat jaisten hasten gara eskailera luze bat bukaeran duena, itsasoaren mailan utziz Pasai San Pedro kaia inguruan eta guk txalupa hartu behar dugun lekutik gertu Pasai Donibanera zeharkatzeko. Oso berezia.

Marijo da gure jarraitzaile sutsuena eta bertan dago gure zain. Bere animoak saritu eta aurrera jarraitzen laguntzen digute. Itsasoa gurutzatu eta Pasai Donibaneko arrantzale auzo polita igaro eta lasterketako zatirik gogorrenari aurre egin beharrean gaude. Atalaia Farora iristeko aldapa tenteak, dugun hoberena ematea behartzen gaitu eta indar ugari erabiltzen dugu horretan, aurrerago faltan botako ditugunak ziurrenik. Bide oso polit bat jarraitzen ari gara itsaslabarra segituz, behin baino gehiagoetan eskuak erabiliz aurrera jarraitzeko. Eguzkiak aspaldian leku bat egin du laino artean eta berotzen hasi zaigu, Mitxintxola norabidean erritmo onean goazelarik. Hemendik aurrerantz bideak beranzko jarrera du azken aldapa tente batek hirugarren hornidura postura gerturatzen gaituelarik. Marijon animoak falta ezinak direnez, bertan dago berriz ere gure zain.

 

Denborarik galdu gabe, Jaizkibela doan errepidea zeharkatzen dugu pinudi txiki batetan sartuz, gorantz doan bideak lehenengo Behaketa Dorrera eramaten gaitu. Beñatek bere erritmoa jarraitzea pentsa du , Unai eta ni berriz aurreratu egiten dugun bitartean. Lasterka goazen bide dotoreak Dorreen ilara jarraitzen du, bidean aurkitzen ditugun aldapa tenteak Unairi kontua pasatzen hasi zaizkie, erritmoa jarraitzea nahi badu ere, bere gorputzak aurka egiten dio. Beregandik ahal-dudan gertuen joaten saiatzen nahiz, indar falta ailegatzen den unean animoak behar beharrezkoak dira eta funtsezkoak, borrokarako grina mantendu ahal izateko. Hirugarren Behaketa Dorrea iritsi gara eta laugarren hornidura postura iristeko bide lauan goaz, horretarako errepidea berriz gurutzatu behar dugularik. Orain ere Marijo bertan da eta animorik ez zaigu falta.

Itsaso izkina bertara doan aldapa behera bat hasi dugu, aldapa batzuek igo beharrean egonda ere, kilometroak aurrera doazen heinean gogortxu egiten direnak. Itsasoa bakoitzean gertuago ikusten dugu, itsas labarrak gertu dauden seinale. Ibilbidea itsas izkinatik sugea bailitzan doa, txirrista baten antzera, gure hanketan seinale utziz. Gure erritmo jaitsierak zer ikusia izan du Beñatek gu harrapatzearekin eta seigarren hornidurara iritsi aurretik, berriz ere elkartzen gara. Unai eta Beñat ura edaten gelditzen dira eta ni berriz aurrera jarraitzen dut eta beraiengandik aldendu, erritmoa handituz. Beste bi aldapa tenteren ostean eskuinera biratzen dugu, Guadalupen malda gogorrari hasiera emanez. Lasterketak kontua pasatzeko garaia da, hainbat lasterkari indar erreserban doaz aldapa gogor hauetan eta laster batetan atzean uzten ditugu. Azken malda oso tentea da baina ez orregatik erritmoa jaisten dut eta gainditzea lortu eta hornidura postura iritsi, Marijoren animoak berriz ere jasoz.

Azken kilometroak aldapa behera dira Hondarribiraino, hain gertu egonik erritmoa jaisterik ez dago eta horrek beste hainbat lasterkari aurreratzeko aukera ematen dit. Hondarribiko harresira pasabide batetik zeharkatuz sartzen gara eta behin bere kale estuetan, sigi-saga doan bidea, poliki poliki helmugara gerturatzen doa. Azken zatia jendez gainezka dago eta animorik ez zaigu falta, erritmoa mantentzea laguntzen duelarik eta igotzea ere. Azken luzea bukaezina dirudi baina azken ahalegin batek helmuga igarotzen laguntzen dit. Lasterkari gehiago datoz, Unai eta Beñat noiz ikusteko irrikitzen nago eta minutu batzuek geroago azken luzean agertzen dira, nekaturik nabari zaie baina oso kontentu daude bukatzeko aukera izan dutelako; Unaien kasuan lehenbiziko talaia lasterketa delarik. Behin helmuga zeharkatzen dutenean besarkatzen gara eta elkarri zoriondu, lasterketan gertatutako hainbat gauza aztertuz eta izan ditugun sentsazioak azalduz.

Nekaturik gaude baina oso kontent, lasterketa hau oso berezia da guretzako ez bakarrik etxean izaten delako, zeren ibilbidea ikusgarria eta oso polita delako. Gainera, itsasadarra txalupan zeharkatzeak erabat ezberdina egiten du lasterketa hau. Datorren urtean errepikatzea espero dugu.

Datu teknikoak

  • Ibilbidea: Talaia Bidea
  • Igoera data:28/04/2013
  • Luzera:30.800 m.
  • Desnibela:1.300 m.
  • Kokapena:Euskal Herria
  • Kategoria : Traila
  • Leihaketa:Bai
  • Nola iritsi:Donostiako Gros auzoko Kataluina emparantzatik
  • Ezaugarriak:Ibilbide zoragarria Gipuzkpoa kostako labar eta menditik. Ezinezkoa da fisikoki prestatua egotea.
  • Garaia: Udaberria
  • IBILBIDEAREN DATU GUZTIAK IKUSI
Gureak eta beste batzuen Cookie-ak erabiltzen ditugu, webgune honen erabiltzaileen nabigazioaren analisia egin ahal izateko.
Nabigatzen jarraitzen baduzu, onartzen duzula suposatzen dugu. Nahi izanez gero, konfigurazioa aldatu edo informazio gehiago jaso ahalko duzu hemen.