Marbore eta Urjauziko tontorrak

Capra Alpina(e)k idatzia.
6219
bisita

Betidanik ezinezkoa egin zaigu Marbore gailurra zapaltzea baina gaurko honetan igotzeko asmoarekin jaiki gara eta segurtasun osoarekin ere, naiz eta ibilbide luzeena eta desnibel handienetakoa aukeratu horretarako. Goizeko 5:30 h. esnatu gara eta ondo gosaldu ondoren auto hartuz, Formigaltik San Nicolas de Bujaruelora iritsi Cotefablo mendatea zeharkatuz. Harrizko zubiaren inguruan utzi dugu autoa, Ara ibaiaren eskuinaldean.

Goizeko 8:00 h. dira eta ibaia zeharkatu bezain laster igotzen hasi Bujaruelo edo Tentes lepoa bilatuz, bertan elkartzen dira bai Gavarnietik datorren bidea eta guk daramaguna ere. Lehenbiziko aldapak gogorrak sortatzen zaizkigu, baina igotzen goazen heinean askoz erosoago goaz. Basotik irten gara, tentsio handiko poste baten inguruan (1600 m.) eta pintura marka zuri eta gorriak jarraituz gorantz goaz aran etzan baten bila, Plana Lacoma. Hasiera batetan bideak ezkerretik jarraitzen du gorantz eta ondoren eskuinera pasa, azken aldapa tente batek Bujaruelo lepoan uzten gaituelarik (2270 m.) 9h.55´.

Eskuinean dugun aldapa tente batek lautada handi batetara eramaten gaitu. Gabieto glaziarretik datorren uharra zeharkatu eta Taillon mendiaren ipar isuriko aurpegi ikusgarria parez pare segituz Serradets mendiaren norabidean eta behin bere inguruan, eskuinera hartu eta aldapa tente bat igoz, Taillon glaziarretik datorren uharrera iritsi. Kontuz ibili beharreko lekua bustitzeko asmorik ez badugu behintzat, dena den kate finkoak jarrita daude laguntzearren. Harri bloke handien artetik goaz eta sigi-saga batzuez baliatuz Serradets lepora iritsi, bertatik aterpetxea ikusten dugularik eta inongo zailtasunik gabe iritsi (2587 m.) 10h.45´.

Lehen geldialdia egiteko baliotzen dugu hidratatu asmoz, zeren kantinplorak urez betetzeko ere. Tentu handiz ibili behar gara hemendik aurrera edateko ura aurkitzea oso zaila izango bai dugu, nolaz eta elurtegiren batetan aurkitzen ez dugun, kontutan izanik ibilbide oso luzea geratzen zaigula aurretik. Aterpetxetik atera bezain laster aurkitzen dugun aldapa tenteari aurre eginez Brecha glaziarrera iristen gara, Brecha ikusgarriaren aurrez aurre gaude eta zirraragarria dirudi. Azken malda bat igo beharrean gaude, tarteka bada ere eskuak erabiltzea behartzen digularik (I+), zailtasun handiegirik gabe igoz (2805 m.) eta eskertzen dugun haize bolada fresko batez agurtzen gaitu.

Aragoi isurialdetik jaisten gara Casco mendiaren horma ikusgarriaren parez pare eta aurrerago, berriz ere goranzko norabidean, erorketa handia duen korridore batetik igoz kate finkoak lagungarri izanik. Zirraragarria dela dirudien arren zailtasunik gabe saihesten duguna. Bidea jarraituz beste irtengune bat aurkitzen dugu eta behin gaindituz, Casco lepora eramaten gaitu naiz gailurra bertatik ikusten ez den. Goranzko norabidean jarraitzen dugu Torre mendiaren malda hautsien azpitik, denbora guzian gure ezkerretara eramanez, elurtegi batzuetara iritsiz eta behin gaindituz Cascada lepora ailegatuz, Torre eta Espalda mendien erdigunea. Behategi honetatik beldurgarria da Gavarnie aranera dagoen amildegia.

Cascada mendien parez pare goaz, beti ere Aragoi isurialdetik, harri bloke, elurtegi eta arroka hautsietan zehar. Azkenik gure helburua ikusten dugu eta nondik igo daitekeen sumatu ere, Marbore itxaroten dugu. Ezin bestekoa zaigu mugarriak jarraitzea bertan dagoen nahastea ikusiz. Tentu handiz ibili behar dugu lehenbiziko irtengunea igo orduko, bide argi eta garbiena laku izoztura bai doa, Monte Perdido eta Cilindro Marbore artean dagoena, eta jarraitu beharrekoa apenas ikusten da eta parez pare Marbore gailurreko norabidean doa. Tarteka azaltzen diren mugarriak jarraituz gorantz goaz eta kezkatu ere egin gara, bide garbi baten falta, ikusten ditugun mugarri eskas eta harri blokeen nahastea, harri hautsi eta  etengabeko gora beherak, pentsa arazten digute bidez erratu garela. Gauza bat garbi dugu, gailurra gure gainean dagoela eta bidetik edo biderik gabe, bertara zuzendu behar ditugula gure pausoak. Behin zatirik kaotikoena pasa dugu eta altura dezente igo dugula ikusiz, askoz ere lasaiago jarraitzen dugu inklinazio gutxiagoko maldetatik Marbore gailurreraino (3248 m.) 14:00 h.

Azkenik gailurra zapaltzea lortu dugu eta nola ez, gida liburuak esaten duten bezala da, handia, oso etzana eta futbol partidu bat jokatzeko lekua duena. Besarkatu eta zoriondu gara lehenengo helburua lortze arren. Harriekin eginiko hesi batetan babesten gara eta jan edan egiteko baliatu, ondo merezita dugu. Eguna argitsua da eta garbi ikus dezakegu inguruan dugun guzia. Gavarnieko zirkura dugun ikuspegia harrigarria da, Troumouseko zirkura ere Munia garaitzen delarik, Vignemale, Pic Long, Campbiel, Cilindro eta beste hainbat. Oso eroso eta lasai gaude, baina mugitzen hasi beharrean gara oraindik ere asko falta bai zaigu eta denbora aurrera doa. Jaisten hasi gara Gavarnieko zirkura azaltzen den ertzetik bide garbi bat jarraituz, Cascada gailurrak igotzeko asmoz.

Ertza tontor txikiz betea dago eta goitibehera bat bai litzan, bata bestearen atzetik igotzen goaz eta naiz ez altuera handiegirik izan, oso zirraragarriak eta airosoak dira, tartean Cascada ekialdeko gailurra (3161 m.) eta Cascada erdiko gailurra (3106 m.), Marboren ego mendebaldean daudenak. Lepora jaitsi gara (3029 m.) erdiko eta mendebaldeko gailurrak zatitzen dituena eta ertza jarraituz, zailtasunik gabeko irtengune bat igoz Cascada mendebaldeko tontorrera iristen gara (3095 m.). Hemendik aurrera ertza jarraitzea besterik ez dugu beerantz Espalda de Marbore gailurrera iristeko (3073 m.). Ertzetik lepora jaisten saiatu gara baina garbi ikusten ez dugunez, bidea desegitea erabaki dugu eta berriz ere Cascada mendebaldeko gailurra igo, ondoren oinpean dituen elurtegietara jaitsi ahal izateko, igotzerakoan pasa ditugunak zehazki. Cascada lepora iritsi gara eta goizean eginiko bidea alde batera utzi eta ertzetik jarraitzea pentsa dugu Torre de Marbore gailurrerantz (3009 m.) 17h.30´, hiru mendigoizaleekin elkartzen garenean Monte Perdido Behatza eskalatzetik datozenak. Ordesa isurialdetik datorren lainoa aspaldian gure atzetik ibili bada ere, azkenik estali digu.

Berantz jarraitzen dugu kanal hondatu batetik, gure bidea berriz aurkitu arte eta Casco lepora iritsi. Brecha-ra joateko, berriz ere kateetatik pasa beharrean aurkitzen gara, ondoren goranzko bidean jarraitu ahal izateko Casco hormaren parez pare. Behin goian Brecha glaziarrera jaitsi behar dugu ondoren Serradets aterpetxera iristeko. Arratsaldeko 18:35 h. dira eta atsedena merezi dugula pentsatzen dugu, zerbait jan eta garagardoren bat edateko baliatuz, ondo irabazia bai dugu. Oraindik ere Bujaruelora jaitsi beharrean gaudenez, bideari ekiteko erabakia hartu dugu. Taillon glaziarretik datorren uharra zeharkatuz, Tentes lepora jarraitzen dugu, inongo zailtasunik gabe bertara ailegatuz.

Oraintxe Ara ibaira jaistea besterik ez zaigu geratzen. Nekaturik baina iritsi gara eta denborarik galdu gabe bere ur hotzetan hankak freskatzen ditugu eta ausart direnak sartu irten bat ere egiten dute, ez dago erremedio hoberik errekuperatzeko. Arratsaldeko 20:30 h. dira eta eguna handia izan da, ibilbide luzea eta desnibel handikoa ere, baina jarrita genuen helburua lortu dugu eta oso arro gaude. Dena den, ibilbidea hain luzea eta gogorra izan ez dezan, nire aholkua bi egunetan egitea izango litzateke, lehen egunean Brecha edo Serradets aterpetxera igo eta bertan lo eginez, komenigarria litzateke erreserba egitea leku arazorik egon ez dadin, eta hurrengo egunean Marbore gailurrera bideratu. Beste aukera bat izango litzateke Goriz aterpetxean gaua pasatzea eta bertatik Marboreko saiakera egitea. Biak aukera onak dira. 

 

 

Datu teknikoak

  • Ibilbidea: Marbore San Nicolas de Bujaruelotik
  • Igoera data:29/08/2009
  • Desnibela:1.910 m.
  • Kokapena:Pirinioak
  • Kategoria : Oinezko igoera
  • Zailtasuna:F+
  • Harri eskaladaren zailtasuna:I+
  • Hasiera puntuan amaitzen da:Bai
  • Iristeko denbora:8h.05´
  • Nola iritsi:San Nicolas de Bujaruelo (1338 m.) 3 km. errepidez + 6 km. pistaz Torla herritik.
  • Igotzeko denbora:12h.30´
  • Jeisteko denbora:4h.25´
  • Ezaugarriak:Desnibel handiko ibilbidea, oso luzea eta zailtasunik duena. Fisikoki ondo egotea eskatzen du. Serradets edo Brecha aterpetxetik Aurrera ura aurkitzea oso zaila egiten dena, elurtegiretan ez bada.
  • Materiala:Makilak eta ur asko.
  • Garaia: Uda
  • IBILBIDEAREN DATU GUZTIAK IKUSI
Gureak eta beste batzuen Cookie-ak erabiltzen ditugu, webgune honen erabiltzaileen nabigazioaren analisia egin ahal izateko.
Nabigatzen jarraitzen baduzu, onartzen duzula suposatzen dugu. Nahi izanez gero, konfigurazioa aldatu edo informazio gehiago jaso ahalko duzu hemen.