Balerdiko hego ertza

Capra Alpina(e)k idatzia.
5542
bisita

Nondik hasten zen ideia askorik gabe abiatu ginen Balerdiko ertza egitera. Intuizio apur bat eta laguntza teknologikoari esker, berehala aurkitu genuen. Hala ere, bidea hain nabaria ez denez, hasierako erreferentzia garbi izatea komeni da. Erreferentzia hori, paretetik irmo irteten den zuhaitz txiki bat da. Bertatik hasten da ertzaren igoera.

Ohiko bidea Gaintzatik hasten da. Smithyren blogean duzue informazio baliogarria. Hala ere, guk beste bide bat proposatuko dizuegu. Azkarateko hilerritik gora doan pistaren amaiera utzi genuen kotxea eta, mendiaren ekialdetik, hegoalderuntz joan ginen. Horretarako, pago zuahizti batetik sartu ginen. Bidetxur polit bat jarraitu genuen Balerdiren horma tentenen azpitik. Azkenik, ertza igo eta tontorrera iritsi ondoren, mendebaldeko malda zorrotzetik behera jetsi ginen.

Hauxe da hasiera puntua: Zuhaitza duen harri horma. Balerdiren hegoalderuntz joan eta irudi hau gogoan hartuz gero, ez dago galbiderik.

1. luzea:

III+, baina hastea kosta zaigu. Erritmoa hartu, berotu eta kontzentratu. Momentu batzuetan III+eko zatiren bat IV izan daitekeen sentsazioa izan dugu. Ordu bat igaro da kotxea utzi dugun momentutik. Luze hau, agian, bideko luzerik ederrena izango da, harria ona baita, hormaren pitzaduratik igoko gara eta zintak sartzeko zuhaitza eta pare bat harri zubi baitaude. Amaieran, horma asko zutitzen da, baina helduleku onak dituenez, errez gainditzen da. 30 metroko luzea.

2. luzea:

II, ta listo. Oso erraza, eta hurrengo luzearen hormaren azpira iristeko erabiliko dugu. Hurrengo luzea zailagoa denez, saiatu ahalik eta gehien gerturatzen. Amaieran, "gendarme" polita inguratuko dugu. Luzea hau 70 bat metrokoa da.

3. luzea:

IV, ertzaren zati zailena da bere zailtasuna eta harri askearengatik. Gainera, gure eskuinetan amildegi sakona ikusteak zirrara sortzen digu sabelean. Pena da igoera honen argazkirik ez dugula. 3 metro igoko gara hormatik lehen erlaitzera; ondoren, helduleku gutxiko hormatik 10 metro gora egindo dugu bigarren erlaitzera iritsi arte. Azkenik, 5 bat metroko diedro txikia gaindituko dugu.

4. luzea:

III, amaitzeko. Hala eta guztiz ere, azken luzera iristeko, aurretik 70 bat metroko zati bat gaindituko dugu oinez eta lotu gabe. Kontuz azken luzearekin, harri aske asko baitaude!

Momentu honetan, soka jaso eta botak jazten ditugu. Bi aukera ditugu: Lehena, ertzetik jarraitu eta ekialdera ematen duen ertzean sartu. Hasiera batean, han goran, soka atera beharko dela dirudi, baina dirudienez, eskuinetik pasatzeko errez omen dago. Hala ere, guk bigarren aukera hartu genuen, ertzaren azpitik tontorrera zuzenean igotzekoa, presaka baikebiltzan.

Kobaruntz zuzendu ginen eta ezkerreko irtengunea igo ostean, tontorrera zuzen ekin genion.

Tontorrera igo eta gero, iparmendebaldeko maldatik behera jetsi ginen, zuhaizti batetik behera: lokatza, harritxoak, hostoak, etab. aurkitu genituen bertan eta oso irristakorra zegoen dena. Malda 45 bat gradukoa zen eta tentu handiz ibili behar genuen oina non jarri behar genuen aukeratzen. Odisea txikia pasa ondoren, tontorretik irten eta ordu betera, kotxera iritsi ginen oso osorik.

Datu teknikoak

  • Ibilbidea: Balerdi Hegoaldeko ertza
  • Igoera data:20-04-2013
  • Luzera:200 m.
  • Desnibela:600 m.
  • Kokapena:Euskal Herria
  • Kategoriak : Ertza, Eskalada klasikoa
  • Zailtasuna:AD
  • Harri eskaladaren zailtasuna:IV
  • Luze kopurua:4
  • Hasiera puntuan amaitzen da:Bai
  • Iristeko denbora:1 ordu ertzera
  • Nola iritsi:Gaintzatik edo Azkarateko hilerritik gora.
  • Igotzeko denbora:5.30 h.
  • Jeisteko denbora:1 h.
  • Ezaugarriak:200 metroko ertza, ezker aldean irteerarekin. Pausu zailena: IV. Harria aske dago, batez ere azken luzean. Kontuz! Ekipatu gabeko bidea.
  • Materiala:Friend-ak, fisureroak, zintak, soka eta kaskoa.
  • Garaia: Uda, Udazkena, Udaberria
  • IBILBIDEAREN DATU GUZTIAK IKUSI
Gureak eta beste batzuen Cookie-ak erabiltzen ditugu, webgune honen erabiltzaileen nabigazioaren analisia egin ahal izateko.
Nabigatzen jarraitzen baduzu, onartzen duzula suposatzen dugu. Nahi izanez gero, konfigurazioa aldatu edo informazio gehiago jaso ahalko duzu hemen.