Mont Blanc itzulia - Zazpigarren etapa

Capra Alpina(e)k idatzia.
2443
bisita

Zazpigarren etapa.

Tré le champ-Chamonix. 

 

Presarik gabe jaiki gara, azken eguna da eta lasai hartzeko asmotan gaude. Gosaltzera kanpineko jangelara sartu gara, a zer nolako gosaria idazmahai ikusgarria. Denetik jan eta edaten dugu, errepikatu ere ezin bada ere, baina Alpeetan gaudenetik ez dugu honelako gosaririk egin eta ezin utziko dugu. Sabela bete dugu eta motxilak bizkarreratuz, atzo egindako ibilbidea deseginez errepideraino iritsi gara eta zeharkatu TMB bidea segi asmoz. Gorantz hasi gara baso dotore batetik, eguna eguzkitsua da eta dagoeneko bero egiten du. Tour eta Argentière glaziarren ikuskizuna itzela da. Ordu bat eta gero L´Aiguillette d´Argentière orratzetara iristen gara, bertan jendea eskalatzen ikusten dugu eta egia esan inbidia pixka bat ere ematen digu.

Parez pare harrizko horma tente bat dugu eta ezinbestean burdinazko eskailera batzuek erabiliz igotzen dugu. Oso denbora gutxian altura handia irabazi dugu eta dagoeneko Argentière oso beheran ikusten dugu. Bakoitzean jende ilara handiago osatzen dugu, zahar eta gazte, denak hemen goaz gorantz. Tête aux Vents mendatera iritsi gara (2132 m.) eta atseden hartzen dugu eta zerbait jateko baliatu ere. Chamonix gertu dagoenez gauzak lasai hartzea erabaki dugu eta denbora luzez gelditu gara paisaiaz gozatzeko, Tour, Argentière, Mer de Glace glaziarrak eta Verte, Dru, Grandes Jorasses, Dent du Géant, Aiguille du Midi eta nola ez Mont Blanc.

Denbora luzez egon eta gero berantz hasi gara La Flégère mendatearen bila (1877 m.). Bertara teleferikoa iristen da Les Praz herritik eta neguan elur pistak dira orain zapaltzen ari garen bide eta zelaiak. Bertatik pasatzean jende pilo bat ikusten dugu, tabernak gainezka daude eta atzera eta aurrera ere jendea asko dabil. Les Houches herrira joan izango bagina gorantz jarraitu beharrean izango ginateke, baina gu Chamonix-era goaz eta horrek berantzako bidea egitea behartzen digu. Eski pistetatik goaz pinudian sartzen garen arte eta bertatik jarraitzen dugu, eskerrak itzaletik goazela eguzkiak errukirik gabe berotzen baitu.

Dagoeneko iristeko gogoa ere badugu, Chamonix aspalditik ikusia dugu baina badirudi bakoitzean urrunago dagoela ez baita inoiz iristen. Bat batean errepidera iritsi gara eta etxe artean gabiltza, baina oraindik ere denbora beharko dugu gure helburua bete ahal izateko. Azkenean Chamonix erdigunean gaude oso ezaguna den giden etxe aurreko plazan. Lortu dugu eta elkar zoriontzen gara egin dugunak merezi du eta. Oso nekaturik gaude baina pozik, ikusi eta bizi izan duguna azken zazpi egun hauetan ahaztezina izango baita.

Beste etapak:

Tour del Mont Blanc - Etapa 1

Tour del Mont Blanc - Etapa 2

Tour del Mont Blanc - Etapa 3

Tour del Mont Blanc - Etapa 4

Tour del Mont Blanc - Etapa 5

Tour del Mont Blanc - Etapa 6

 

 

Ibilbide nagusia

Datu teknikoak

  • Ibilbidea: Mont Blanc itzulia - Zazpigarren etapa
  • Igoera data:17/08/2012
  • Luzera:23 m.
  • Desnibela:1.100 m.
  • Kokapena:Alpeak
  • Zailtasuna:PD
  • Nola iritsi:Trê le Champ, Camonix eta Martigny lotzen dituen herrepidetik.
  • Igotzeko denbora:6h.15
  • Materiala:Bibak egiteko beharrezkoak.
  • Garaia: Uda
  • IBILBIDEAREN DATU GUZTIAK IKUSI
Gureak eta beste batzuen Cookie-ak erabiltzen ditugu, webgune honen erabiltzaileen nabigazioaren analisia egin ahal izateko.
Nabigatzen jarraitzen baduzu, onartzen duzula suposatzen dugu. Nahi izanez gero, konfigurazioa aldatu edo informazio gehiago jaso ahalko duzu hemen.