Mont Blanc itzulia - Seigarren etapa

Capra Alpina(e)k idatzia.
2274
bisita

Seigarren etapa.

Fenêtre d´Arpette-Tré le Champ.

 

Gure gainean dugun Orny glaziarra gau guztian hotsa ateratzen egon da, pentsa ere egin dugu gainera harriren bat etorriko zitzaigula baina ez. Eguna triste esnatu zaigu eta euria ari du, modu ez egokia dendak biltzeko baina aukerarik ez dugu. Gosaldu dugu eta dena jaso ere eta berriz ere gorantz goaz. Atzo garbi ikusten genuen lepoa ezin dugu gaur ikusi, lainoak estalita baitago.

Argazkiak ateratzen nago eta besteengandik oso atzera geratu ere, baina bidea ondo markatuta dago eta galtzeko arriskurik ez dut. Fenêtre d´Arpette lepora iritsi gara (2665 m.) eta denak berriz ere elkartu. Lainoak uzten digun heinean Trient glaziarra ikusten hasi gara, benetan zirraragarria.

Hasi gara berantz, aldapa handia benetan eta batzuetan eskuak erabili beharra izan badugu ere, zailtasunik gabe jaisten duguna. Jaitsi ala eguna argitzen doa, eguzkia ere atera zaigu eta Trient glaziarra bere osotasunean ikusteko aukera dugu, ikusgarria da benetan eta hain gertu egonik, izugarrizko inpresioa egiten digu.

Denbora gutxi pasa da eta dagoeneko Chalet du Glacier (1583 m.) aterpetxera iritsi ere. Glaziarretik datorren erreka egurrezko zubi dotore batetik zeharkatuz beste aldeko malda igotzen hasi gara. Bideak estu hartzen digu oso tentea baita eta sigi-saga ugari eginez gorantz goaz. Ion, Garazi eta Beñat aurretik doaz eta Enara, Marijo eta ni atzetik.

Kostata izan bada ere Les Grands aterpetxera iritsi gara eta berriz ere denak batera gaude. Leku polita benetan, gainera kanpoan daukan egurrezko mahai batetan eseri gara zerbait jateko asmotan eta bertatik dugun ikuskizuna aparta da. Fenêtre d´Arpette parez pare  dugu eta jaitsi dugun bide guzia ere garbi asko ikusten da eta Trient glaziarra ere. Ogi askorik ez dugu eta Beñat aterpetxeko zaindariarekin hitz egitera joan da eta ogi zati batekin etorri ere, ez dago ezer lortzen ez duenik honek. Bapo jarri gara eta eguzkitan oso gustura gaude baina aurrera jarraitu beharrean gara, dena jaso eta motxila bizkarreratu eta or goaz berriz ere Balme mendatearen bila.

Luze egiten zaigu baina ez du aldapa handiegirik eta bidea erosoa denez zailtasunik gabe iristen gara (2191 m.). Berriz ere Frantziako lurretan gaude. Bertatik Chamonix arana bete betean ikusten dugu, nork esango luke orain sei egun berriz ere hemen izango ginenik. Berriz ere Mont Blanc ikusten dugu inguruko mendi guzien gainetik.

Ion eta Garazik itzulia uzteko asmoa azaldu digute, azken etapa falta bazaigu ere. Pena handiz agurtu gara eta bakoitzak bere bideari ekiten dio. Taldea bakoitzean txikiagoa gelditzen ari da, baina aurrera segitzen dugunok hasierako gogo berdinekin jarraitzen dugu. Hurrengo geltokia Trê Le Champ da eta bertara zuzentzen ditugu gure pausoak. Eguna luze doa eta dagoeneko irrikitzen gaude iristeko atseden hartu asmoz. Posetts lepotik pasa gara (1997 m.), bertan jendea dago eta ez da harritzekoa, bertatik ikusten dugunak merezi baitu bertara igotzea. Aldapa behera goaz errepidera iristen garelarik, bertan norabidea erakusten digun poste bat aurkitzen dugu eta inguruan dauden etxe batzuetara zuzendu. Kanpina bilatu nahi dugu eta ezinbestekoa zaigu azken malda bat igo eta pinuditik Tré le Champ herrira iritsi (1417 m.).

Dendak jarri ditugu, dutxa bero bat ere hartu eta Beñat eta ni Argentière herrira jaisten gara janaria erostera. Ondo afaldu dugu eta nekaturik gaudenez zakuan sartu gara.

Beste etapak:

Tour del Mont Blanc - Etapa 1

Tour del Mont Blanc - Etapa 2

Tour del Mont Blanc - Etapa 3

Tour del Mont Blanc - Etapa 4

Tour del Mont Blanc - Etapa 5

Tour del Mont Blanc - Etapa 7

Ibilbide nagusia

Datu teknikoak

  • Ibilbidea: Mont Blanc itzulia - Seigarren etapa
  • Igoera data:16/08/2012
  • Luzera:19 m.
  • Desnibela:1.500 m.
  • Kokapena:Alpeak
  • Kategoriak : Oinezko igoera, Trabesia
  • Zailtasuna:PD
  • Nola iritsi:Champex herritik (1477 m.).
  • Igotzeko denbora:7h.30´
  • Materiala:Bibak egiteko beharrezkoak.
  • Garaia: Uda
  • IBILBIDEAREN DATU GUZTIAK IKUSI
Gureak eta beste batzuen Cookie-ak erabiltzen ditugu, webgune honen erabiltzaileen nabigazioaren analisia egin ahal izateko.
Nabigatzen jarraitzen baduzu, onartzen duzula suposatzen dugu. Nahi izanez gero, konfigurazioa aldatu edo informazio gehiago jaso ahalko duzu hemen.