Mont Blanc itzulia - bostgarren etapa

Capra Alpina(e)k idatzia.
2086
bisita

Bostgarren etapa.

La Vachey-Fenêtre d´Arpette.

Eguna argitzean jaiki gara, hotz dago eta erreka bazterrean gaudenez hezetasun handia da. Dendak gaur ere bustiak jaso behar ditugu, pisu gehiago bizkarrean, gosaldu eta denbora asko galdu gabe gorantz hasi gara. Denbora gutxira Elena aterpetxera iristen gara (2062 m.), jakin izan bagenu hain gertu zegoela akaso atzo igoko ginateke. Hotel bat dirudi aterpetxe bat baino, daukan balkoitik Pré de Bar glaziar bereziaren ikuskizuna paregabea da.

Eguraldia okertu zaigu, ez da oso ohikoa egunero eguzkia ikustea eta gaur egokitu da. Zirimiria ari du eta mendian gora lainoa dago, gu igo behar dugu bidean zehar. Denborarik galdu gabe gorantz abiatu gara, aldapa oso tentea da hasieran eta denbora luzez mantentzen da honela. Norbera bere pausoan doa taldea sakabanaturik, egia esan ez dago geldi egoterik hotz dago eta lehen-bailen gaina harrapatu nahi dugu. Ordu bete eta gero aldapa etzaten da eta dagoeneko bide erosoago batetik goaz, gaina ikusten dugu eta dirudienez beste aldean eguna argiagoa dago. Kostata baina Ferret lepo handira iritsi gara (2537 m.), egia da beste aldean eguzkia ikusten dugu. Hemen dago Italia eta Suitza arteko muga, Aosta arana (Italia) eta Valais kantoia (Suitza).

Berantz jaisten hasi gara eta ehun bat metro egin eta gero laino artetik ateratzen gara eta eguzkia azaldu zaigu eta bere epeltasuna nabaria da naiz eta haize handia dagoen. Israeldar bat ere bidean gurutzatzen dugu txirrinduan igotzen datorrena, solasaldi bat eta gero agurtzen gara bakoitza bere bideari jarraituz. Bera eta bera goaz eta bakoitzean eguraldia hobea da, eguzkiak majo berotzen digu eta bat batean La Peule aterpetxera iritsi gara. Leku polita benetan, jende ugari dabil inguruan gora eta behera. Inguru hauetan oikoa denez, Suitzako ikurrina ezarria dago. Atseden hartzen dugu eta mapak ikusteko aprobetxatu ere, inguru ikusgarria dugu eta izena jarri nahi diogu ikusten dugunari. Gure gainean Mont Dolent eta Tour Noir ditugu L´A Neuve glaziarrarekin, begirik ere kendu ezinik gaude hain da ederra.

Behean ikusten dugun pistara jaitsi beharrean gaude Ferret herrira iritsi ahal izateko (1700 m.). Bertan jendetza handia ikusten dugu eta zer gertatzen den ikustera gerturatu. Eliza txikia duenez eta jendetza handia, meza kanpoan ematen ari dira, musika banda eta guzti.

Errepidea utzi eta erreka zeharkatuz bere ezkerretik jaisten goaz, zuhaitz eta zelai artean La Fouly herrira iritsiz (1593 m.). TMB liburuxkan gomendatzen du bertan autobusa hartzea Champex herrira iristeko, errepidez egin behar baita ibilbidea eta hori ez da gu bila gabiltzana, gurea mendian ibiltzea baita. Itxuraz eramaten gaituen autobusak aire egokitua hondatuta du, beroa jasanezina baita, autobuseko termometroak 30º markatzen ditu.

Prayon, Praz de Fort eta Issert pasa ondoren, Champex herrira iritsi gara (1477 m.), laku eder baten inguruan dagoena. Denda batera sartzen gara Ion, Beñat eta ni janaria erosteko asmotan afaltzeko ezer gutxi baitugu. Motxilak berriz ere lepo ditugu gorantz hasten garenean, hasieran bidexka polit bat jarraitzen dugu uhar bat ezkerrera duena pinudian barrena, eguna goibel hasi baitugu ere eguzkiak majo berotzen digu.

L´Arpette aterpetxera iritsi gara (1627 m.)  eta bertan gelditzeko tentazioa eduki arren aurrera jarraitzeko erabakia artzen dugu, oraindik goiz baita eta hurrengo egunerako aldapa zati bat kentzea ona izango baitzaigu. Fenêtre d´Arpette leporantz goaz bide garbi bat jarraituz, bakoitzean aldapa tenteagoa da eta gehiago kostatzen zaigu igotzea. Leku bat bilatu asmoz gabiltza hiru dendak jarri ahal izateko baina aurkitzen ez dugunez gora eta gora goaz. Esperantza galtzeko bidean gaude ezer itxurazkorik aurkitzen ez dugunez, baina bat batean Ion bidetik atera da eta ezkerreko malda igo du eta bertan leku apropos bat aurkitu, ba zen garaia.

Inguruan ur hotsa entzuten dugu eta kantinplorak hutsik ditugunez betetzeko asmoz bere bila goaz. Harrikari bat zeharkatu behar dugu gorantz baina dagoen lekura iritsi gara. Afaria egin aurretik inguruaz gozatzen dugu, ezin balkoi hobea bila genezake 2.500 metrora gaude eserita, pena Unai hemen ez egotea gozatu ederra hartuko luke. Hurrengo egunean pasa beharreko lepoa ere gertu ikusten dugu eta nik zalantzak izan arren, Beñat oso ziur dago zein den eta ala izan ere. Afaldu dugu, niskalo batzuek ere jan ditugu pinudian bilatuak eta iluntzerako zaku barruan gaude, eguna gogorra izan baita eta atsedena behar dugu.

Beste etapak:

Tour del Mont Blanc - Etapa 1

Tour del Mont Blanc - Etapa 2

Tour del Mont Blanc - Etapa 3

Tour del Mont Blanc - Etapa 4

Tour del Mont Blanc - Etapa 6

Tour del Mont Blanc - Etapa 7

Ibilbide nagusia

Datu teknikoak

  • Ibilbidea: Mont Blanc itzulia - Bostgarren etapa
  • Igoera data:15/08/2012
  • Luzera:33 m.
  • Desnibela:2.200 m.
  • Kokapena:Alpeak
  • Kategoriak : Oinezko igoera, Trabesia
  • Zailtasuna:PD
  • Nola iritsi:La Vachey, Courmayeur herritik datorren errepidea bukatzen den lekutik.
  • Igotzeko denbora:9h.
  • Materiala:Bibak egiteko beharrezkoak.
  • Garaia: Uda
  • IBILBIDEAREN DATU GUZTIAK IKUSI
Gureak eta beste batzuen Cookie-ak erabiltzen ditugu, webgune honen erabiltzaileen nabigazioaren analisia egin ahal izateko.
Nabigatzen jarraitzen baduzu, onartzen duzula suposatzen dugu. Nahi izanez gero, konfigurazioa aldatu edo informazio gehiago jaso ahalko duzu hemen.