Mont Blanc itzulia - laugarren etapa

Capra Alpina(e)k idatzia.
2266
bisita

Laugarren etapa.

Courmayeur-La Vachey.

Goiz jaiki gara bertan gosaltzeko ordutegia baitugu. Mahai baten inguruan eseri gara eta ekarritako guztia jan dugu, sabelean eramatea errazagoa baita bizkarrean baino. Unairi agur egiteko ordua iritsi da, pena handiz baina …. Besarkatu gara eta muxu eman ere, hemendik aurrera ez da berdina izango ibilbidea bera gabe.

Mendi gidarien etxe eta elizaren artetik igaro behar dugu bidea jarraituz, Villair norabidean eta behin errepidea bukatzen den lekuan pista bat hasten da zuhaitz artean sigi-saga eginez, pixkanaka gorantz eramaten gaituena. Ondo lo egin dugu baina gogorra egiten zaigu lehen aldapa tente hau. Gutxika bada ere altura harrapatuz goaz, horren seinale Courmayeur ikusteko aukeran gaude eta egia esan oso beran ikusten da, ez zirudien hainbeste igo genuenik. Zuhaitzak bukatu dira eta bat batean Bertone aterpetxea ikusten dugu gure aurrean (1991 m.), leku oso polita eta ondo zainduta dutena.

Bertatik Mont Blanc iparraldea bikain ikusten dugu, nork esango luke orain egun batzuek bere gailurrean egonak garela. Atseden hartu dugu eta kantinplorak urez bete aurrera jarraitu aurretik.

Gorantz goaz Sapin lepora bila, bide guzian ezkerretara eramanez Dent du Géant eta Grandes Jorasses, ikuskizun aparta benetan. Zelai berde batzuetatik eroso goaz eguraldi apartarekin, azken aldapa batek Sapin lepoan utzi gaitu (2436 m.).

Eztabaida sortu da nondik jarraitu, batzuek berantz jaitsi nahi dute biderik ez badago ere hasieran, besteak eskuinetik doan bidea jarraitu nahi dugu mapan jartzen duen arabera. Azkenik berantzako bideari heldu diogu eta han goaz aldapa behera ahal dugun lekutik. Beheko zuloraino jaitsi gara eta bertan dagoen bidea hartu dugu, eskerrak ez zaigun inolako paretik azaldu bidean, zeren bestela berriz ere jaitsitako guzia igo beharrean izango ginateke.

Bidea jarraituz Bonatti aterpetxearen azpialdetik igarotzen gara Val Ferret arana bila. Bat batean errepidera iritsi gara eta kilometro batzuek bertatik egin beharrean gaude eta egiten duen beroarekin oso neketsua egiten zaigu. Eskerrak bidea bukatzen den lekuan taberna ikusgarri bat aurkitzen da, zelai berde bat aurrean duena, mahai eta itzalkinekin, bere izena La Vachey da (1642 m.). Bere inguruan Doira ibaia doa eta aurreraxeago ur jauzi izugarri bat sumatzen dugu eta bere bila goaz. Bai hotz dagoela ura hankak sartzeak bakarrik zirrara egiten digu, ala izanda ere Ion, Beñat, Garazi eta Marijo osorik sartzen dira uretan, Enara eta ni berriz hankak sartzearekin nahikoa dugu.

Bainu hotz bat eta gero, pasa dugun tabernara itzuli gara eta freskagarri batzuek atera ditugu eta lasai egon indarrak berreskuratzen. Elena aterpetxera iritsi besterik ez dugu gaua pasatzeko baina nekatuta gaudenez eta oso eroso, bertan dendak jartzea pentsa dugu erreka bazterrean dagoen zelai batetan. Afaria egin dugu eta eguna bukatzean zakuan sartu gara lo egiteko.

Beste etapak:

Tour del Mont Blanc - Etapa 1

Tour del Mont Blanc - Etapa 2

Tour del Mont Blanc - Etapa 3

Tour del Mont Blanc - Etapa 5

Tour del Mont Blanc - Etapa 6

Tour del Mont Blanc - Etapa 7


 

 

 

Ibilbide nagusia

Datu teknikoak

  • Ibilbidea: Mont Blanc itzulia - Laugarren etapa
  • Luzera:17 m.
  • Desnibela:1.450 m.
  • Kokapena:Alpeak
  • Kategoriak : Oinezko igoera, Trabesia
  • Zailtasuna:PD
  • Nola iritsi:Courmayeur (Italia). Aosta bailara.
  • Igotzeko denbora:7h.
  • Materiala:Bibak egiteko beharrezkoak.
  • Garaia: Uda
  • IBILBIDEAREN DATU GUZTIAK IKUSI
Gureak eta beste batzuen Cookie-ak erabiltzen ditugu, webgune honen erabiltzaileen nabigazioaren analisia egin ahal izateko.
Nabigatzen jarraitzen baduzu, onartzen duzula suposatzen dugu. Nahi izanez gero, konfigurazioa aldatu edo informazio gehiago jaso ahalko duzu hemen.