Mont Blanc itzulia - hirugarren etapa

Capra Alpina(e)k idatzia.
2381
bisita

Hirugarren etapa.

Mottets aterpetxea-Courmayeur.

Goizen goiz iratzargailuak jo digu, goxo gaude zaku barruan eta inork ez du mugitzeko asmo handirik. Jendea dagoeneko atzera eta aurrera dabil eta gu ere ezin atzera gelditu gosaltzera aterpetxeko jangelara joan behar baitugu. Gosaria ezin hobea ekarri digute, denetik ugari gainera, ala ere gure ogi eta mantekila bukatu denez aldamenean egon direnek utzitakoak ere hartu ditugu, egunean zehar ziur gaude ez zaigula gaizki etorriko.

Tripa bete dugu, motxilak bizkarreratu eta pentsatzeko astirik gabe aldapa gora goaz eta a zer nolako aldapa. Eguna tristea dugu eta hotz dago, aldapa gora berotzen gara baina gelditzerik ez dugu bertan hoztuko ginen eta. Lainoa ere iritsi zaigu baina euririk ez du egiten. Lehenbiziko aldapa bortitzak pasa eta gero etzanagoa da ibilbidea eta zailtasun handiegirik gabe, Seigne lepora (2516 m.) iritsi gara. Frantzia eta Italiako muga da eta lurrean harrizko lerro bat egina dago adierazgarri bezala, baita ere norabideko mahai bat dago oso berezia, inguruko mendi eta glaziarren izenak jarri beharrean Casablanca, Bombay edo Veneziako norabideak azaltzen ditu. Hona iristen denari zer axola ote zaio non dauden hiri hauek.

Denak elkartu gara eta argazkiak atera ondoen, berantz goaz Lex Blanche aranean zehar Elisabetta Soldini aterpetxearen bila, Tré la Tête orratzaren azpian.

Eguzkia atera da eta bero dago, ezinbestean arropak kendu beharrean gaude. Txabola batzuen ingurutik Combal lakua ikusten dugu, zati handi bat deuseztatua eduki arren zirraragarria da, Miageko morrena ere aurrez aurre dugu, egun batzuek lehenago zapaldu genuena Mont Blanc gailurra igotzeko. Gertu ikusten dira baina hemen gauzak ez dira diruditena eta denbora dezente pasatzen dugu beste aldera iristeko. Jende ugari dabil hemendik, ez da harritzekoa Val Veny gertu baitago eta ingurua aho zabalik uztekoa baita.

Gure eskuinetik bide bat ateratzen da malda gora eta ezinbestean segi beharra dugu, bertatik bai doa gure ibilbidea. Taldea berriz ere zatitzen da eta bakoitza ahal duen moduan doa baina denak ere 2.400 m. dituen mendatera iritsi gara, bertatik ikuskizuna paregabea da Miageko glaziarra, Brenva glaziarra, Dent du Geant, Grandes Jorasses, Bionnassay orratza eta nola ez Mont Blanc handia. Laku txiki baten ondotik pasa gara eta berantz goaz Chécroui mendatera (1916 m.), bertan bi jatetxe daude eta neguan eskiatzaileak bertara iristen dira teleaulkiak erabiliz. Orain udara da eta elurrik ez dago baina jende ugari dabil, gehienak eserita daude bertako mahaien inguruetan bazkaltzen, eguna aproposa da horretarako.

Teleaulkia martxan dabil eta galdetzera goaz zenbat kostako litzaigukeen zazpiak jaisteak beheko estazioraino. Beldurtuta utzi digu, aberats aurpegia ikusi ote? Ezinbestean pistetatik zehar berantz abiatzen gara. Oraintxe eski pare bat izango banituzke eta elurra egon, a zer nolako gozamena. Gogoetak alde batera utzi ditut bat batean aldapa tente bat jaisten ari gara eta tentu handiz pausoak eman beharrean gaude. Aldapa behera izan arren kosta zaigu Plan Chécroui (1697 m.) eski estaziora iristen. Eguzkiak estu hartu digu eta bero dago, denbora luzez ibiltzen gatoz eta motxilak ere bereak eta bi pisatzen dute. Bertan dagoen iturri dotore batetik nahi adina ur edan dugu eta berriz ere berantz, oraindik ere Courmayeur urruti baitago.

Autxa besterik ez duen lur pista batetik goaz irteerarik ikusten ez zaion pinudi batetan sartuz eta etsita geundenean, bat batean pinuditik atera eta Dolonne herrira iristen gara. Courmayeur parez pare dugu, lastima asko jaitsi garela eta berriz ere igo beharrean gara. Bertan galdetu dugu lo egiterik bagenuen baina oso garestia zenez, Courmayeur herrira joatea erabaki dugu. Berriz ere motxilak bizkarreratu neke handiz eta errepidea segituz iritsi gara. Ion eta Garazi lo egiteko hotel edo motel bat bila hasi dira eta aurkitu ere, ez da beste munduko ezer baina oheak ditu, dutxa ere eta garrantzitsuena, merkea da.

Dutxatu eta arropa garbiak jantzi ditugu, zerbaiten beharrean bageunden. Herria ikustera atera gara eta garagardo batzuek hartzera ere, gainera janaria erosteko ere baliatzen dugu. Afaltzeko ordua iritsi da eta Italiako lurretan gaudenez pizza jan gabe ezin gelditu. Pizzeri txiki batera sartu gara, goiz da oraindik baina gosea dugunez lehenak gara esertzen, bat batean lepo jarri da eta jendea kanpoan dago itxaroten, ez dugu itxuraz aukera txarra egin. Pizzak plateretik ateratzen dira eta mahaian ez dago lekurik, bukatuko ote dugu atera diguten guztia? Bakarren batek ezin izan du baina beste batzuek ez dute apurrik ere utzi. Unaiek itzulia uzteko erabakia hartu duenez, afaria aprobetxatzen dugu egindakoaz topa egiteko. Pena da baina ala da, erabakia hartua duenez ez du atzera bueltarik, egia esan bere hutsunea handia izango da, niretzako bereziki.

Bapo afaldu ostean oheratzea pentsa dugu, eguna luzea izan baita eta datorrena ere ez da gutxiago izango.

Beste etapak:

Tour del Mont Blanc - Etapa 1

Tour del Mont Blanc - Etapa 2

Tour del Mont Blanc - Etapa 4

Tour del Mont Blanc - Etapa 5

Tour del Mont Blanc - Etapa 6

Tour del Mont Blanc - Etapa 7 

                                                                                                                                                         

Ibilbide nagusia

Datu teknikoak

  • Ibilbidea: Mont Blanc itzulia - Hirugarren etapa
  • Igoera data:13/08/2012
  • Luzera:23 m.
  • Desnibela:1.350 m.
  • Kokapena:Alpeak
  • Kategoriak : Oinezko igoera, Trabesia
  • Zailtasuna:PD
  • Nola iritsi:Montjoie-Courmayeur (2516 m.).
  • Igotzeko denbora:8h.30´
  • Materiala:Bibak egiteko beharrezkoak.
  • Garaia: Uda
  • IBILBIDEAREN DATU GUZTIAK IKUSI
Gureak eta beste batzuen Cookie-ak erabiltzen ditugu, webgune honen erabiltzaileen nabigazioaren analisia egin ahal izateko.
Nabigatzen jarraitzen baduzu, onartzen duzula suposatzen dugu. Nahi izanez gero, konfigurazioa aldatu edo informazio gehiago jaso ahalko duzu hemen.