Pic Long - Campbiel - benetako abentura

Capra Alpina(e)k idatzia.
4778
bisita

Urriko azken aste bukaeran Nouvielle Erreserba Naturalera gerturatzeko erabakia hartu dugu, bertako mendi garai eta ezagunena igo asmoz. Ez dugu askorik ezagutzen Perineotako alderdi hau eta urduritasun eta antsietate sentsazioa sortzen digu horrek. Lan egun gogor bat eta gero, autoa materialez eta ilusioz kargaturik , Frantzian dagoen Aureko aranera gerturatzen gara, Fabian herrira hain zuzen. Gauez iristen gara baina nahi dugun lekuan gaude eta horrek du garrantzia.

Goizeko 6-tan esnatzen gara eta denborarik galdu gabe jantzi, motxilak bete eta gosaldu. Autoan igotzen hasten gara Erreserba Naturaleko errepidea. Gure eskuinetara Oredon lakua eta aterpetxea (1860 m.) uzten ditugu eta aurrera jarraituz,  Cap de Long aparkalekura iritsi (2175 m.) goizeko 7:30 dira. Dena oso ilun dago eta hotza hezurretaraino sartzen da, ezinbestekoa dugu begietaraino estaltzea. 0h. Ibilbidea hasten dugu laku enbalsatuaren eskuinetik frontalen laguntzaz. Altura irabaziz goaz labarrak igo arte eta denbora gutxi barru lakuaren bukaeran gaude. Eguna argitzen hasia da eta ikuskizunak txundituta uzten digu.

Gure eskuinera ikusten ditugu Ramoun, Nouvielle, Tres Conseillers eta Turón de Nouvielle, beste egun batetan igotzeko utziko ditugunak. Lakua betetzen duen uharrera iritsi gara eta kantinplorak urez betetzeko aprobetxatzen dugu. Hain hotza da eguna uharrak daraman ur zati handi bat ere izoztua dago. Gutxika bada ere altura irabaziz goaz uharraren parez pare, harrizko horma tente baten azpira iristen garelarik eta kostata bada ere, zailtasun handiegirik gabe igotzen duguna. Sakanetik ateratzen goaz eta lehenbiziko mendi tontorrak ikusten hasten gara, baina zein den jakitea ez da erraza. 1h.

Gorantz goaz mendien izenekin ados jarri ezinik. Ezkerrera bira eginez Gan Pico del Cilindro de Estaragneren maldan zehar, harri hautsia besterik ez duenetik kostata bada ere Estaragne lepora (2837 m.) 2h.30´. Lehen helburua gertu dugu, azken ertza igotzea besterik ez zaigu falta Estaragne gailurrera iristeko (3006 m.) 3h. Ikuskizuna aparta da, gure oinpean Piau Engaly eski estazioa dugu eta parez pare Troumouseko zirkua, Munia nabarmen delarik. Elurra aurreko egunean egin berri duenez, itxura alpinoagoa ematen dio inguruari. Gure eskuinera begiratuz Campbiel mendia ikusten dugu eta zirrara sortzen digu, naiz gure hurrengo helburua izan.

Eguzkia berotzen hasia da eta eskertzen dugu. Ogitarteko bat jan eta bidea jarraitzeko prestatzen gara, aurretik lan asko dugu egiteko eta mugitu beharrean gara. Zulogune bat jaisten dugu Campbiel ingurura, elurra eta izotza duen malda bat zeharkatuz, nola gogoratzen garan ekarri ez ditugun kranpoiekin, eta tentu handiz eta zailtasunez azken ertzera iristen gara. Ez du lehen bezain beldurgarria dirudi naiz oso tentea izan, baina zailtasun handiegirik gabe Campbiel tontorrera eramaten gaitu (3173 m.) Harri multzoa 4H. Balkoi ezin hobea Monte Perdido eta Vignemaleko iparraldea ikusteko, Cilindro, Marbore, Añisclo eta beste askorekin batera. Ikuskizuna paregabea da eta argazkiak ateratzeko aproposa.

Jaitsiera muin leun batetik hasten dugu eta ez dugu bigarren mailako tontor bat igotzeko aukera galtzen (3157 m.). Desegindako arrokartetik goaz eta zailtasun handiegirik gabe lepora iritsi, bertan jan edan egiteko baliatzen gara, mapa ateratzeko ere falta zaigun ibilbidea begiratzeko. Egia esan aurrean dugun erronka oso handizalea da, baina horretara etorriak gara eta oso animatuak gaude. Gauza batek kezkatzen gaitu, seguruenik egunak dituen argi orduak ez direla nahikoa izango ibilbide luzea hau egiteko. Denborarik galdu gabe aurrera jarraitzea erabakitzen dugu eta gure pausoak zuzendu Gourg de Cap lakura baina iritsi aurretik ezkerrera hartu eta harrikari bat den malda tente batetik igotzen gara, indarrak bermatzen dizkiguna. Kostata bada ere Maou lepora iristen gara. Azken elurteak zalantzak sortzen dizkigu gailurra igotzeko saiakera egiteko orduan, kranpoiak ez ekartzeak ondorio hauek ditu. Eztabaida luze baten ondoren, gure segurtasuna bermatzeko ez igotzea erabakitzen dugu, naiz eta 30 metro bakarrik falta izan. 6h.

Ertza jarraitzen dugu, oso airezko eta dibertigarria, Badet mendiaren norabidean. Tentuz ibili beharreko lekua da naiz eta ez duen zailtasun tekniko handiegirik. Aurrera goazen heinean, gure aurretik doan bikote bat Badeteko azken ertza igotzen hasten ikusten ditugu, eta egia esan beldurra ematen digu. Gerturatzen garen heinean tenteago ikusten da, bat batean bikoteak aldaparen erdian itzultzeko erabakia hartzen du. Ezer esan gabe Unai eta ni begiratzen gara, urduritasuna nabarmena da. Aurrera jarraitzea erabakitzen dugu, berantz datorren bikotea gurutzatzen dugu eta gorantz goazen neurrian eskaladaz bakoitzean gehiago gozatzen dugu. Guk nahi baina lehen gailurrera iristen gara, Badet gailurra (3160 m.) 6h.30´.

 Apenas dugu biontzako lekurik gailurrean. Ertz zorrotza segituz berantz hasten gara Badet orratzera iritsi arte (3135 m.). Bertan gaudenez gailurra igotzea  pentsatu dugu.  Izoztua dago elurra zati honetan eta aurreratzea zailtzen digu. Behin baina gehiagotan atzera jo beharra dugu ez bai dugu bidea seguru ikusten, denbora eder bat galduz geroago faltan botako duguna. Azkenean lortu dugu arazo honetatik ateratzea eta askoz ere lasaiago Pic Long oinarrira iritsi. Zeharkaldi luze batek azken ertzera eramaten gaitu eta zailtasun handirik gabe, harri bloke handi batzuen artetik Pic Long gailurrera igotzen gara (3192 m.), mendigune honen punturik garaiena. 8h.15´. Daukagun poztasun aurpegia esanezina da. Denbora bat hartzen dugu bertatik ikusten dugunaz eta egindakoaz gozatzeko.

Begiratzen dugun lekura begiratzen dugula ere, ikusten dugun bakarra pareta bertikal zirraragarriak dira. Jaistea pentsatzen dugun ertzak beldurra ematen digu, baina dagoeneko berandu da atzera egiteko. Jaitsiera hasten dugu harri bloke handi batzuetatik, ertz zorrotz eta airezkora ateratzea lortzen dugun arte. 500 metro gure azpitik Tourrat lakua (2661 m) ikusten dugu eta benetan larrialdia sorten digu. Ertzean dauden granitoko harri handiei tinko helduz, metroz metro baina pausoak tentuz emanez jaisten goaz. Bakoitzean gehiago gogorazten gara ekarri ez dugun materialez, soka, zintak, arnesa, baina dagoeneko berandu da horretarako. Ez zaigu asko falta beheko lepora iristeko Horquette de Cap de Long (2902 m.) eta dagoeneko askoz ere lasaiago, hanketako dardara galduz, atzera begiratzen dugu nondik jaitsi garen ikusteko, arrigarria. Dagoeneko 10 h. daramatzagu ibiltzen eta oraindik gelditzen zaizkigunak.

 

Gogo biziz Dent d´Estibére Male igotzen hasten gara, aurreneko zeharkaldia ez beste zailtasun handiegirik gabea eta Troumouseko isurialdetik gainditzen dena (3017 m.). Ertz errazetik jarraituz zailtasunik gabe Bugarret mendira iristen gara denbora gutxian (3031 m.) Eguzkia asko jaitsi da eta ez dugu uste bi ordu baina gehiago iraungo duenik. Denborarik galdu gabe eta belarrezko muino leun batetik, Pale de Crabonouse mendira igotzen gara (3021 m.) eta inguruan duen beste bigarren mailako tontor bat ere, dagoeneko 11 h. daramatzagu ibiltzen geldialdirik apenas egin gabe. Cap de Long lakura jaistea besterik ez zaigu gelditzen. Denborarik galdu gabe azkar batean mendian behera hasten gara Bugarret lakua bila, guregandik 800 m. beherago dagoena. Iluntzen hasi da eta oraindik oso urruti gaude bukatzetik. Erritmo onean goaz naiz eta ordu asko daramatzagun ibiltzen, bakoitzean beherago gaude eta lakua gertu ikusten dugu. Tentu handiz joan behar gara ez bai dugu ezer ikusten eta izotza ere bertan dago, niri esan dezatela hutsegite batez hankaz gora erori bai naiz. Lakura iritsi gara eta isurbidetik zeharkatzen dugu.   

400 m. igo beharrean gaude Horquette de Bugarret (2614 m.) zeharkatzeko eta Cap de Long isurialdera itzultzeko. Frontalak piztu ditugu, gaua heldu da eta ez dugu ezertxo ere ikusten, baina gorantz hasten garen bezain laster nire frontalak argia egitetik utzi du. Ez dut berriz ere piztea lortzen eta Unaien frontalaren argiarekin jarraitzea besterik ez zait geratzen. Aurretik joanez proba egiten dut eta atzetik joaten ere baina alperrik da, ez dakit non zapaltzen noan eta. Inongo bide arrastorik ez dagoen leku batetik goaz eta sena erabiliz aurrera jarraitzen dugu. Ez dugu norabidea galdu, baina ez dakigu zer aurkitu dezakegun aurrerago. Gutxika bada ere goizean urez kantinplorak bete ditugun uharrera iristen goaz, uraren hotsa jarraitu noski. Estropuz, erori, atzera bueltatu, mozkortuak gaudela dirudi alde batetik bestera balantza eginez eta gutxien espero duten unean frontala piztea lortzen dut. Ez du argi askorik egiten baina gutxienez non zaplatzen dudan jakiteko balio dit eta ori ez da gutxi.

Uharrera iritsi gara eta behin zeharkatuz goizean erabili dugun bidea zapaltzea lortzen dugu. Bidera berriz itzultzeak izugarrizko poza eman digu, azken orduak bizi izan ditugun estutasunak kontutan izan da. Cap de Long parez pare eramanez eta denbora bat geroago, autoa dagoen aparkalekura iristea lortzen dugu, goizean atera garenetik 16 h. pasa dira. Nekaturik gaude baina oso pozik, egia esan benetako abentura bat izan da hau. Ibilbidea bi egunetan egitea izango litzateke normalena, baina gure antsietate eta gogoak, logika eta arrazoiari irabazi dio. Ertzaren zeharkaldia ikusgarria izan da, oso airezko baina polita eta dibertigarria, edozeini gomendatzeko modukoa. Benetako abentura.

 

 

 

 

 

 

Datu teknikoak

  • Ibilbidea: Pic Long Pic Long - Campbiel mendizerra osoa
  • Igoera data:octubre 2011
  • Kokapena:Pirinioak
  • Kategoriak : Ertza, Oinezko igoera
  • Zailtasuna:AD- (Izotzarekin, zailagoa egiten da.)
  • Harri eskaladaren zailtasuna:III+
  • Nola iritsi:Cap de Lon aparkalekua (2161 m.) 25 km. Saint Lary, 38 km. Bielsa (Aure arana) Nouvielle Erreserba Naturala.
  • Igotzeko denbora:16 h.
  • Ezaugarriak:Zeharkaldi borobila ertzetik zehar, 3000ko guztiak igoz, Campbieil eta Estaragne barne.
  • Materiala:Eskaladako materiala gomendagarria, arnesa, soka, zintak, nahiz eta beharrezkoa ez den pausu aereoetan segurtasuna baldin badugu guregan.
  • Egoera:Elurrik gabe.
  • Garaia: Uda, Udazkena
  • IBILBIDEAREN DATU GUZTIAK IKUSI
Gureak eta beste batzuen Cookie-ak erabiltzen ditugu, webgune honen erabiltzaileen nabigazioaren analisia egin ahal izateko.
Nabigatzen jarraitzen baduzu, onartzen duzula suposatzen dugu. Nahi izanez gero, konfigurazioa aldatu edo informazio gehiago jaso ahalko duzu hemen.