Bisaurin neguan

Capra Alpina(e)k idatzia.
4715
bisita

Berduneko ubidetik zehar doan 240 errepide nazionaletik ederki ikusten da Bisaurin. Azken urteetan behin baina gehiagotan igo duguna, bai Lizaratik bai Gabarditotik baina beti ere uda eta udazkenean eta oraingoan helburu bezala jarri dugu neguan igotzea. Ongi etorriko zaigu sentsazio onak berreskuratzeko. Goiz izoztu eta beltz batetan gure autoa Gabardito aterpetxeko aparkalekuan utziz, gure ibilbidea hasten dugu (1360 m.).

0h. Arropak jantzi ditugu, materiala gainbegiratu behin eta berriz ezer ahaztu ez zaigun eta frontala jarriz ibiltzen hasten gara pagadian barrena. Hasiera batetan kranpoiak ez janztea pentsatu dugu, baina laster iritzia aldatuz janzten ditugu elurraren egoera ikusiz. Basoan zehar gorantz goaz eta bukaeran, bidea bat batean berantz doa harrizko ezproi bat saihestu asmoz. Bere ezkerretara mantenduz eta goranzko bidean, igotzea lortzen dugu arreta handia jarriz izotz asko bai dago.

Ezkerretara uzten dugu Agüerri mendira (2449 m.) igotzeko egunen batetan erabili dugun bidea eta eskuinerantz jarraitzen dugu. Aldapa tentea da eta elurrak eta izotzak ez dizkigute gauzak erraz jartzen igotzeko eta horretarako bihurgune batzuez baliatzen gara. Behin igotzea lortzen dugu eta bide guzian dagoen zati zelaitsuenera iristen gara. Udan zelai berde batzuek dira abereak libre bazkatzen dutenak 30´. Eguna argitzen hasi da gau ilunaren ondoren eta gutxika bada ere inguruan ditugun mendi tontorrak bistan ditugu. Hotza izugarria da eta begietaraino tapaturik goaz.  

Gutxika bada ere gure aurretik joan direnen oin arrastoak segituz goaz. Eskerrak elurra izoztua dagoenik eta horrek asko errazten digu martxa, ez dut pentsatu ere egin nahi ala izan ez balitz zein gogorra izango zen ibilbidea. Foraton lepoa oso garbi ikusten dugu eta bere bila goaz, Bisaurin ezkerretara dagoelarik. Ez dugu bere gailurra hemendik ikusten, baina bai Foraton lepotik gorantz doan elur pala izugarria, edozein eskiatzaileentzako izugarri erakargarria. Pixkanaka goaz aurrean azaltzen zaizkigun maldak igotzen azkeneko aldapara iritsiz eta kostata bada ere, igotzea lortzen duguna. Foraton lepoa (2020 m.) 2h.

Hemendik zeharkatzen dugun bakoitzean haizeak gogor astintzen digu eta gaur gutxiago ez izateko ere bai. Haizearen indarkeriak atzeranzko bidea hartu arazten digu babes bila eta zalantzak sortzen dizkigu jarraitzea merezi ote duen. Asko kostatzen zaigu zutik egotea eta ibiltzea berriz izugarrizko esfortzua. Ez dugu dudatzen eta gorantz abiatzen gara, lepotik gailurrera doan elur palan zehar, naiz eta gure lagun batzuek babesean gordeta segitzen duten mugitzeko asmorik gabe. Eguzkia dagoeneko atera da baina bere berotasuna guk ez dugu nabari, ezin gauza berdina esan hotzez haizea edozein zirriztuetatik sartzen bai zaigu.

A zer nolako aldaketa udan edo neguan igo malda hauetatik. Udan beheko aldea terraza txikiz osatua dago erraz igo daitezenak, harrikari batetik jarraitu, malda SO erdi aldean dagoen kanaleta bat zeharkatu eta goiko zatira iritsi. Neguan erabat ezberdina da, elur pala luze bakar bat besterik ez dugu ikusten baina 30º eta unean unean 35º iritsi daiteke. Pixkana bada ere gorantz goaz, haizeak ez du beheko lepoan bezain gogor astintzen eta hemen askoz ere babestuagoak aurkitzen gara. Mendi hegalaren goiko zatira iristen gara inklinazio gutxiago duena. Gailurra dena ikustea iruditzen zaigu urrunean, tentuz egin beharreko zeharkaldi arriskutsu bat gure eskuinera eginez hegoaldeko malkar gainetik eta zailtasun handiegirik gabe Bisaurin gailurrera iristen gara (2669 m.) 3h.30´. Elurrak bertan dagoen mugarria estalia du eta tentu handiz ibili behar dugu iparraldean sortu diren erlaitzengatik.

Egun ikusgarria dugu, zeruko urdinak mendien zuriekin dotore dirudi. Ikuspegia ederra da eta zailtasunik gabe bertatik ikusten diren hainbat mendi ezagutzen ditugu, Acher gaztelua, Acherito,  Petrechema, Hiru Erregeen Mahaia, Midi d´Ossau, Vignemale, Balaitous, Monte Perdido, Collarada, Aspe eta askoz ere gehiago. Jan edan egiteko baliatzen gara, argazkiak ateratzeko ere. Denbora bat pasa eta berantzako bidea artzen dugu, zein ondo etorriko litzaigukeen orain eski batzuek izateak. Ekarri ez ditugunez igo bezala jaitsi beharrean gaude. Eguzkiak dagoeneko berotzen du eta ori elurrean nabari da, bakoitzean hanka gehiago sartzen zaigu elurretan, eskerrak orain jaistea geratzen zaigula. Bakoitzak ahal duen moduan egiten du, ausarten bat eserita, beste batzuek korrika egiten dugu, eskiatzen ere ikusten ditugu. 

Foraton lepora itzuli gara 5h. Haizeak ez du goizean zuen indarrik baina beti ere hemen ez gelditzea komenigarria da. Azken begiratu bat bota diogu Lizarako aranari, aterpetxea urrunean dagoelarik, eta gure bidea jarraitzen dugu La Hoya de Plandaniz ordekara bidean. Borda baten ondotik pasatzen gara, goranzkoan bezala eta gora behera batzuek igaro ondoren, Salto de la Vieja irtengunera jaitsiz. Berriz ere gurutze bidean gaude (1500 m.) Agüerri gailurrera eramaten duena eta gure bideari jarraituz izozturiko aldapa jaisten dugu harrizko ezproia zeharkatuz. Aldapa motz batek zuzenean pagadian sartzen gaitu eta pista batetik, neguan fondoko eskia egiteko erabiltzen dena, Gabarditoko aterpetxera iristen gara (1360 m.) 6h.15´.

 

 

 

Datu teknikoak

  • Ibilbidea: Bisaurin Gabarditotik neguan
  • Desnibela:1.309 m.
  • Kokapena:Pirinioak
  • Kategoriak : Erraketak, Kranpoiak
  • Zailtasuna:F
  • Korridorearen graduazioa:30º
  • Hasiera puntuan amaitzen da:Bai
  • Iristeko denbora:3h.30´
  • Nola iritsi:Gabardito aterpetxea (1360 m.)16 km. errepidez Echo-tik.
  • Igotzeko denbora:6h.15´
  • Jeisteko denbora:2h.45´
  • Ezaugarriak:Negu ibilbide erraza. Sarritan Foraton lepoan haizeak oso zakar jotzen du eta irrikaz Eskiatzaileek neguan bertara joaten dira.
  • Materiala:Kranpoiak, pioleta eta bastoiak.
  • Egoera:100% eskiatu daiteke. Klasikoa oso gailurretik jaistea, lehenengo zati arriskutxu bat eta ondoren kanaleta bertikal bat 30º/35º.
  • Garaia: Negua, Udaberria
  • IBILBIDEAREN DATU GUZTIAK IKUSI

Datu teknikoak

  • Ibilbidea: Bisaurin Lizarako aterpetxetik neguan
  • Desnibela:1.130 m.
  • Kokapena:Pirinioak
  • Kategoriak : Erraketak, Kranpoiak
  • Zailtasuna:F
  • Korridorearen graduazioa:30º
  • Hasiera puntuan amaitzen da:Bai
  • Iristeko denbora:3h.30´
  • Nola iritsi:Lizarako aterpetxea 1540m.
  • Igotzeko denbora:6h.15´
  • Jeisteko denbora:2h.45´
  • Materiala:Raketak (ez gomendatua elurra gogorra dagoenenan) edo kranpoiak.
  • Garaia: Negua, Udaberria
  • IBILBIDEAREN DATU GUZTIAK IKUSI
Gureak eta beste batzuen Cookie-ak erabiltzen ditugu, webgune honen erabiltzaileen nabigazioaren analisia egin ahal izateko.
Nabigatzen jarraitzen baduzu, onartzen duzula suposatzen dugu. Nahi izanez gero, konfigurazioa aldatu edo informazio gehiago jaso ahalko duzu hemen.