Palas

Capra Alpina(e)k idatzia.
3378
bisita

Palas mendia ez da hiru mila metrora iristen, baina jende ugari joaten den mendi bat da. Betidanik erakarri gaitu bere piramide granitokoak, errespetua sorrarazi badigu ere. Abuztuko egun eder bat aukeratu eta Portalet muga gaindituz, berantz goaz errepide bihurria jarraituz Fabregès lakura. Bertan, gure lagunak utzi ditugu trenez joan daitezen Artousteko lakuraino, gu oinez joango garen bitartean Soques txabolaren aparkalekutik gorantz.

Gure asmoa Palas gailurrera igotzea da. Bide zabal eta ongi markatu batetik pagadi eder batetan sartzen gara (1410 m.) 0h. Erritmo egokia aurkitzea kostatzen zaigu, aldapak ez digu atsedenik ematen eta goiza oso hotza izan arren, azkar berotu gara. Denbora asko pasa ez denean, egurrezko zubi batetik igaroz pagaditik ateratzen gara 15´.

Lokaztua dagoen bide belartsu batetik jarraitzen dugu beti ere erreka gure eskuinean eramanez. Gorantz goazen harana bakoitzetan eta zabalagoa da. Ondo markatua dagoen bidetik gora altura erraz irabazten goaz. Itxidura metaliko bat duen Txabola baten aurretik pasatzen gara. Bertan vivac egin daiteke harroka handi batek dituen zuloetan. Bidea gorantz doa Laurien mendiaren magaletik (ezkerrean) eta aurrerago Soba magaletik (eskuinean). Sigi-saga garbi batzuek lasaigune batera garamate. Bertatik marmotak korrika eta txistuka dabiltza.

Bihurgune batzuk tarteko azken aldapa igotzea lortzen dugu, Arrious lepora iritsiz (2259 m.) 1h.30´. Gertu dagoenez, eskuinean daukagun aldapa txiki bat igoz, Arrious laku dotorera iristen gara. Argazki batzuk atera ondoren etorritako bidetik itzultzen gara, Orteig pasabide aereoko bidea alde batera utziz. Parke nazionaleko bidea jarraituz altura galtzen goaz Artouste lakuaren isurialdera, harri hautsietatik zehar. Altura erraz galtzen dugu tren geltokitik lakuaren ezkerraldetik datorren bidea begi bistatik galdu gabe. Jende asko datorrenez, arreta handiz ibili behar dugu trenez igo diren lagunak aurkitu asmoz. Bidegurutze batera iristen gara eta ez ditugunez ikusten, beraien bila joatea pentsatu dugu.

Artouste lakuaren ondotik goazela (1990 m.) gure lagunekin topo egin dugu. Berriz ere gure urratsak jarraitzen ditugu lehen utzi dugun bidegurutzera iritsiz. Oso ondo markatutako bide batek (SE) bihurgune ugarietatik zehar, mendi hegala igotzen du. Hau gainditu eta bide eroso bat jarraituz, berantz goaz laku txiki batera iritsi arte eta bere ezker ertzetik, azken aldapa tente bat gaindituz, Arremoulit aterpetxera heltzen gara (2260 m.) 3h.

Indarrak berreskuratu eta atsegin hartu ondoren, Palas mendi leporantz jarraitzea pentsatu dugu, granitoko harri handi batzuk zeharkatuz. Azken aldapa malkartsu eta harri hautsi ugaridun batek oso gaizki pasarazten digu. Arriel haranera dugun ikusmena, Balaitous eta Frondiellas tarteko, ikusgarria da eta gailurrera bitarte ez dugu utziko. HM Ertza edo Piton Von Martin hormaren azpian gaude, baina bere eskalada beste egun baterako utziko dugu, eta harrikari amaigabe batetik zehar Palas oinarriaren sarreran dagoen aurreneko tximiniara iritsi gara 4h.15´.

Denborarik galdu gabe igotzen hasi gara. Kontu handia izan behar dugu harriekin erraz eta ugari erortzen baitira. Tximini barruan gaude irtenbiderik gabe. Helduleku onak ditu (I+, II eta II+) eta rappel egiteko zinta bat ere badago. Zortea dugu ez dagoelako jende asko mendian. Apenas jaisten ari diren lau pertsonekin gurutzatzen gara. Azkar eta gozatuz igotzen dugu, lepo txiki batera iritsiz (2770 m.), Piton Von Martin ertzetik igotzen dena Palas gailurrararte.

Eskuinera hartu eta gorantz poliki jarraitzen dugu harri hautsi artetik. Gutxika bada ere igotzen goaz kanaleta baten barrutik SSO ertza eskuinean daramagularik. Ia goraino iristean, ezkerrera hartu eta granitoko harri handi batzuetatik Palas gailurrera iritsi gara (2974 m.) 5h.10´. Parez pare dugun ikuskizunarekin gozatzen dugu. Laku ugariren (Arremoulit, Artouste, Batcrabére, Arriel) eta mendi zirraragarrien aurrean gaude (Balaitous, Frondiellas, Arriel, Laurien, Midi d´Ossau, Artouste). Harritzekoa bada ere, bakarrik aurkitzen gara gailurrean. Hori dela eta, momentuaz gozatzeko aprobetxatzen dugu. Bere ertz zorrotz eta aereoa zeharkatzen dugu harri bloke handi batzuetatik eta behin beste aldean, Artouste aldetik mendigoizale batzuek nola igotzen diren ikusten dugu.

Igo garen bide berdinetik jaisten hasi gara. Arreta handia jarri arren, ez gara libratzen harri bakar batzuk botatzetik mendian behera. Eskerrak ez datorrela inor gorantz. Behin lepo txikian eta gure ezkerrera hartuz, tximinian sartzen gara kemenez. Zailtasun handiegirik gabe jaisten dugu hormaren beheko oinarriarte. Berriz ere igoeran hainbeste sufrituarazi digun harrikari bukaezina zeharkatuz, denbora gutxiren buruan, Palas lepora iristen gara. Arriel isurialdea atzean utziz, urrunean txiki ikusten dugun Arremoulit aterpetxera jaitsi gara. Gogo biziz gaude bertan dauden gure lagunak ikusteko (2260 m.) 5h.45´.

Behin denak elkarrekin gaudelarik, jan, edan eta Arremoulit lakuaren ur hotzetan hankak sartzeko aprobetxatzen dugu. Etzanda egon eta lo pixka bat egin dugu eguzkitan, baina berriz ere martxan jarri behar gara ez baitugu trena galdu nahi. Gorantz hainbeste kostatu zaigun mendi hegala azkar batean jaisten dugu eta Artousteko lakura iritsi, lagunak agurtu trena har dezaten eta Arrious mendi leporako bidea jarraitu dugu. Hasiera batean aldapa erosoa da baina gogortzen hasten da gutxira. Arrious lepora iristen gara (2259 m.), dagoeneko haran berde eta luzea jaistea bakarrik ez zaigu geratzen Soques txabolaren aparkalekura iristeko (1410 m.) 8h.

Palas mendiak ez digu iruzur egin eta gure espektatibak bete ditu. Ibilbidea mendia gustukoa duen edozeini gomendatuko nioke, ingurua eta mendia bera goi mailakoak baitira.

Datu teknikoak

  • Ibilbidea: Palas Geodesikoen ertza
  • Desnibela:669 m.
  • Kokapena:Pirinioak
  • Kategoriak : Ertza, Oinezko igoera
  • Zailtasuna:PD
  • Harri eskaladaren zailtasuna:II
  • Hasiera puntuan amaitzen da:Bai
  • Iristeko denbora:5h.10´
  • Nola iritsi:Arremoulit aterpetxetik (2305 m.)
  • Igotzeko denbora:8h. atsedenak kontutan izan gabe
  • Jeisteko denbora:2h.50´
  • Ezaugarriak:Mendigoizale frantxesen ibilbide arrunta. Zailtasun handiegirik gabeko eskalada, azken zatian oso airezko bada ere. Beharrezkoa ez bada ere eskalatzeko gauzak erabiltzea pentsa dugu, entrenamendu bailitzan, ondoren saiatuko garen beste proiektu handiagoak direla eta.
  • Materiala:Soka, kaskoa, zintak, friend-ak eta fisureroak.
  • Egoera:Elur askorekin aurkitu gara, ertzean izan ezik. Arroka ona bilatu dugu eta heldulekuak ugari.
  • Garaia: Uda, Udazkena
  • IBILBIDEAREN DATU GUZTIAK IKUSI

Datu teknikoak

  • Ibilbidea: Palas Ledormeur tximiniatik
  • Desnibela:1.564 m.
  • Kokapena:Pirinioak
  • Kategoriak : Eskalada klasikoa, Oinezko igoera
  • Zailtasuna:PD
  • Harri eskaladaren zailtasuna:II+
  • Hasiera puntuan amaitzen da:Bai
  • Iristeko denbora:5h.10´
  • Nola iritsi:Soques txabolako aparkalekua (1410 m.)Portalet mugatik 10 km. eta Larunstik 22 km.
  • Igotzeko denbora:8h. atsedenak kontutan izan gabe
  • Jeisteko denbora:2h.50´
  • Materiala:Bastoiak ondo etorriko zaizkigu hormara iritxi bitartean.
  • Garaia: Uda, Udazkena
  • IBILBIDEAREN DATU GUZTIAK IKUSI

Datu teknikoak

  • Ibilbidea: Palas Von Martí­n Pitoia
  • Desnibela:350 m.
  • Kokapena:Pirinioak
  • Kategoriak : Ertza, Eskalada klasikoa
  • Zailtasuna:D
  • Harri eskaladaren zailtasuna:V+
  • Hasiera puntuan amaitzen da:Bai
  • Iristeko denbora:5h.10´
  • Nola iritsi:Arremouliteko aterpetxetik Palaseko igoera normaleruntz joan. Bailara zeharkatu ondoren, lehen kanala ezkerrera hartu marka txuri bat duen horma batekin topo egin arte.
  • Igotzeko denbora:8h. atsedenak kontutan izan gabe
  • Jeisteko denbora:2h.50´
  • Ezaugarriak:Batazbesteko zailtasuna IV duen eskalada exigentea, amaierako diedro (V) zoragarri batekin.
  • Materiala:60m-ko bi soka, kaskoa, friendak, fisureroak, zintak (oso erabilgarriak), expressak eta katu hankak (aukerazkoak, baina gomendagarriak azken diedroa gainditzeko).
  • Egoera:Elurrik gabe eta eguraldi ona.
  • Garaia: Uda, Udazkena
  • IBILBIDEAREN DATU GUZTIAK IKUSI
Gureak eta beste batzuen Cookie-ak erabiltzen ditugu, webgune honen erabiltzaileen nabigazioaren analisia egin ahal izateko.
Nabigatzen jarraitzen baduzu, onartzen duzula suposatzen dugu. Nahi izanez gero, konfigurazioa aldatu edo informazio gehiago jaso ahalko duzu hemen.