Soum de Ramond edo Añisclo

Capra Alpina(e)k idatzia.
5075
bisita

Hiru Sorore bezala ezagutzen denaren ahizpa txikia da eta bisita gutxiena jasotzen dituena. Proposatzen dizugun ibilbidea Cuelloañisclotik doa Punta de las Olas,Rabada, Navarro eta Añisclo tontorren artean dagoen ordekatik eta 30/35º duen azken korridore batetik . Ibilbide nahiko erraza udan baina oso luzea eta bilatzeko zaila.

Ordesa zelaiko aparkalekua (1300 m.) 0h. Gaua da oraindik bertara ailegatzen garenean eta lehenengo pausoak Parke Nazionaleko bide zabalean ematen ditugu, frontalen argia jarraituz. Goiz atera gara aurrean dugun ibilbidea oso luzea izango bai da. Goizeko ordu hauetan apenas goaz bakar batzuek bide honetatik, ez du egunez pasatzen denaren antzik. Gurutze bide batetara iritsi gara eta Cotatuerora doana ezkerrera utziz aurrera jarraitzen dugu baso mardul batetik igoz , Arripas, la Cueva eta Estrecho ur-jauzien parera iritsiz. Aldapa gogortzen doa eta zeharkaldien laguntzaz igotzen goaz. Eguna argitzen hasi da baina basoaren goialdean gaude dagoeneko,leku zelaitsua benetan eta uharraren eskuineko aldetik jarraitzen dugu pista zabal hau bukatzen den arte (1660 m.) 1h.30´.

Uharra gure eskuinean eramaten jarraitzen dugu, bat batean Soasoko harmailak ikusten ditugularik eta sigi-saga batzuek erabiliz gainditzen ditugu aran zelaitsu batera iritsiz, bertatik aurreneko aldiz ikusten ditugu hiru Sororeak. Bestaldean Cola de Caballo ur jauzia aurkitzen da (1760 m.) 2h. 15´. Zer nolako zarata egoten den hemen egunean zehar eta orain a zer nolako bakea dagoen, gezurra dirudi leku berdina dela. Uharra zeharkatzen dugu bertan dagoen zubi txiki bat erabiliz zirkuaren horma bilatuz. Eskuinetik doan bidea alde batera utziz gorantz goaz zuzenean hormaren puntu errazena bilatuz. Kate batzuez lagunduz (I+) zailtasunik gabe igotzen gara goiko zelai batera, beran ikusi dugun bidearekin bat eginez. Beste irtengune batekin aurkitzen gara eta gainditu ondoren, mendi hegaletik zehar goaz Goriz aterpetxea ikusten dugun arte (2185 m.) 3h.30´. Kanpin denda ugari daude batean eta bestean eta jendearen joan etorria handia da. Jan edan egiteko baliatzen dugu, arropak kentzeko ere eguzkia dagoeneko bereak eta bi egiten ari bai da.

GR11 arrastoak segituz jarraitzen dugu Arrablo lepoa bila(2329 m.), kostata bada ere aldapa tente eta harri hautsia besterik ez duen batetik igoz. Aurrera eta berantz doan Fuen Blancara bidea ez dugu jarraituko, eta gure ezkerretara doan GR11 segituz arazorik gabe, Morron de Arrablo mendi hegala zeharkatuz, poliki politi altura irabazten goaz Arrablo lepoa bila, Punta de las Olas hormaren azpitik. Bidea oso nabarmena da eta arrastoak ugari daude , baina tarteka bada ere eskuak erabili behar ditugu malda tente batzuek igotzeko. Dagoeneko bide eroso eta lasaiago batetik aurrerantz goaz Horma gainditzeko dagoen tximinia bila Arrablo lepoa iritsi aurretik.

Ez dago oso ongi markatua igo behar dugun tximiniarako saihesbidea eta argi ez ba gabiltza, arruntena aurrerako bidea jarraitzea izaten da ezkerretarakoa hartuz. Guk aurkitu dugu eta dudarik gabe igotzen hasi gara bide malkartsu batetik gainditzea lortuz tximinia. Behin goialdean Harrikari batekin aurkitzen gara, bide arrasto bakar batzuek daudelarik. Aldapa oso tentea da eta ez zaigu erraza egiten bertatik igotzea, baina gutxika bada ere igotzen dugu azken harri ertza iritsiz, arazo handirik gabe baina eskuak erabiliz (I+). Punta de las Olas gailurra (3003 m.) 6h.15´.

Denbora asko galdu gabe aurrera jarraitzea erabaki dugu eta berantz apenas jaitsiz ordeka batetara iristen gara Añisclo, Rabada, Navarro eta Punta de las Olas mendiek osaturikoa. Adostasunez Navarro tontorra edo Baudrimont SE (3026 m.) igotzea pentsatuz. . Azken ertza oso ere estua da eta airezko, apenas dago lekurik pertsona bakar batentzako bere tontorrean. 6h.30´.

Igotzeko bidea jaisteko erabiltzen dugu, arreta handia jarriz, eta dagoeneko ordekan, Añisclo edo Soum de Ramond tontorrera abiatzen gara. Ordeka guzia zeharkatu behar dugu elurtegietatik barrena,bertikala den korridorera iristeko (30/35º) tontorreko gandorrera eramango gaituena. Korridorea elurtuta aurkitzen da eta oso arriskutsua dago pendiza dela eta, gu berriz ez dugu beharrezkoak ditugun kranpoiak ekarri eta gaizki pasatzen ari gara. Azkenik, asko kostatuta bada ere, tontorreko gandorrera iritsi gara eta dagoeneko zailtasun handirik gabe Soum de Ramond edo Añisclo mendi tontor eder hau zapaltzeko aukera dugu (3254 m.) 7h.15´.


Eguraldi aparta eta ikuskizuna harrigarria hemendik duguna. Monte Perdido gailurra ia ukitzeko zorian gara. Jan edateko baliatzen gara indarrak berreskuratzeko, arnasa hartzeko ere. Denbora bat eta gero igo dugun korridore elurtua erabiliz berantz goaz, azaltzen diren harri guztiez baliatuz. Kostata baina tentuz aranera jaistea lortu dugu eta Baudrimont NO edo Rabada mendiaren parez pare jarriz. Bere gailurra igotzeko harrate batera jaitsi behar dugu eta glaziarra zeharkatu. Hasieran zalantzak ditugu baina aurrera jarraitzen dugu hanka arrastoak daudenez, gure aurretik izan den pertsona batek utziak. Azken ertza oso airezkoa eta arriskutsua da, baina zailtasun handiegirik gabe naiz errespetu handia ezartzen du Pineta aranera duen erorikoa ikusgarria bai da (3045 m.) 8h.30´-

 

 

Gailurrean apenas dago lekurik, derrigorrezko argazkia ateratzen dugu eta etorri garen bidetik itzultzen gara. Glaziarra gurutzatzen dugu harrateraino eta aranera iristean arnasa lasai hartzen dugu. Helburua lortua dugu eta dagoeneko Ordesako zelaira iristea besterik ez zaigu gelditzen.

Pico de las Nieves igo beharrean gaude berriz ere zailtasun handiegirik gabe eta harrikarian sartuz, laster batetan tximiniara iristen gara. Zailtasun batzuek tarteko ondo markatutakoGR11 bidean gaude. Berantz goaz igotzeko erabili dugun bidea deseginez eta denborarik galdu gabe, azkar batetan altura galtzen dugu. Bi pertsona gurutzatzen ditugu GR11 egiten doazela iruditzen zaigunak eta konturatzerako Arrablo lepoan aurkitzen gara. Minutu gutxi barru Gorizko aterpetxean izango gara, iristeko desiratzen gaude 10 h.

Motxilan dugun jan guzia irensten dugu, edan eta atseden hartu denbora batez eta berriz ere martxan jartzen gara. Jaisten goazen neurrian jende askorekin gurutzatzen gara, Goriz bidean doazelarik gaua pasatu asmoz. Kateen ingurura iritsi gara eta beraietaz baliatuz Cola de Caballo ur jauzia bila goaz, eguneko ordu hauetan jendez gainezka dagoelarik. Zarata izugarria dago eta ez gelditzeko asmoa dugu gure bidea jarraituz. Soasoko maldara bidean eta desagertu aurretik, azken argazki bat ateratzen diogu hiru Sororei.

Gora eta behera dabilen jendea saihestuz goaz basoan sartzen garelarik eta bidezidor guztiez baliatuz, Ordesa zelaizko aparkalekura iristea lortzen dugu, gure helburua borobilduz (1300 m.) 12h.


Oso egun luzea izan da baina pena merezi izan duena. Dena den nire gomendioa bi egunetan egitea izango litzateke, horretarako Goriz aterpetxea erabiliz.

 

 

 

 

Datu teknikoak

  • Ibilbidea: Añisclo Ordesako zelaitik
  • Desnibela:1.954 m.
  • Kokapena:Pirinioak
  • Kategoria : Oinezko igoera
  • Zailtasuna:F
  • Hasiera puntuan amaitzen da:Bai
  • Iristeko denbora:8h.30´.
  • Nola iritsi:Ordesako zelaia (1300 m.) Torlatik 7 km errepidez.
  • Igotzeko denbora:12h.
  • Jeisteko denbora:3h.30´.
  • Ezaugarriak:Mendi garaieko ibilbidea baina zailtasun handiegirik ez dueña. Dena den fisikoki prestatua egotea eskatzen duena. Punta de las Olas (3003 m.) eta Baudrimont tontorrak edo Rabadá (3045 m.) eta Navarro (3026 m.) igotzeko aprobetxatuz.
  • Materiala:Bastoiak lagungarri izango dira, pioleta eta kranpoiak ere elurra badago.
  • Garaia: Uda, Udazkena
  • IBILBIDEAREN DATU GUZTIAK IKUSI
Gureak eta beste batzuen Cookie-ak erabiltzen ditugu, webgune honen erabiltzaileen nabigazioaren analisia egin ahal izateko.
Nabigatzen jarraitzen baduzu, onartzen duzula suposatzen dugu. Nahi izanez gero, konfigurazioa aldatu edo informazio gehiago jaso ahalko duzu hemen.