Balaitus, Neous-eko glaziarretik

Capra Alpina(e)k idatzia.
855
bisita

2019 urtea mendian amaitu genuen: Balaitusen, hain zuzen ere. Aurretik irakurri eta entzun genuen ibilbide honi buruzko informazioa, baina ez ginen bertan sekula izan. Igoaldi honek denetik konbinatzen du: trabesia-eskia, neguko eskalada eta Pirinioetako hirumilako mendirik esanguratsuenetako baten tontorra zapaltzea, nola ez.

Elur gehiago, eta batez ere, kalitate hobeagokoa zegoelakoan, eskiak bizkarrean jantzi eta mendian gora abiatu ginen. Urte honetan elurteak goiz hasi ziren, baina tenperatura altuak eta lehorteak elur mantuaren atzerapen handia jasarazi zuen.

Arrens-Marsons herrira iritsi ondoren, D-105 errepidea hartu eta kotxea "Chalet d'Accueil et d'Information" delakoan utzi genuen. Bertako kartel batek pinuritik zehar zigzag-ean igotzen zen bidetik jarraituz Suyeneko lakura 30 minutu, Le Labassako zelaigunera ordu 1 eta 30 minutu eta Ledormeour aterpetxera 2 ordu eta 15 minutu genituela adierazten zigun.

Chalet d'Accueil et d’Information

Gave d'Arrens bailaratik barrena Suyeneko lakura iritsi ginen lehenbizi. Eskuinetara bailara berri bat zabaltzen zen, non Larribeteko aterpetxea aurkitzen den Balaitus mendiaren iparraldean. Guk aurrera jarraitu genuen, bide berdinetik, hurrengo bidegurutzeraino. Le Labassa delako zelaigunera iritsi ondoren, mendebalderuntz hartu genuen, malda tente bataetik gora. Halako batean aterpetxea ikustea lortu genuen, ondo ezkutatzen baitzen harren zementu kolorea inguruko harroken artean. Ledormeur-eko aterpetxera iritsi bezain pronto, eguzkia sartzen hasi zen eta, bide batez, tenperatura ere bai.

Basotik irten eta berehala

Lac de Suyen

Le Labassa delakoan eskuineruntz hartu genuen

Ledormeur aterpetxea

Hurrengo egunean goiz esnatu ginen, goizeko 5etarako prest egon nahi genuen eta. Ibilbidea luzea zelakoan geuden eta egunean izango genituen argi orduak ez ziren asko izango. Arrazoi hau zela eta, goizean azkar atera ginen gure zakuetatik eta martxan jarri ginen motxilako soberako gauzak bertan utziz.

Eskiak lehen aldiz jantzi genituen, aurreko egunean bizkarrean eraman baikenituen. Lehen maldatxoa zeharka igo genuen. Behin goran, zelaigune batek beste bailara baten sarrerara ematen zigun ongietorria. Guk "Ixiltasunaren bailara" bezala izendatu genuen. Honen amaieran Costerillou-ko ertzak bidea ixten zigula zirudien. Iluntasunean hasi ginen bailara zeharkatzen, hegal batetik, altura ez galtzearren, Cristayets mendiaren azpitik eta momentuoro hegoalderuntz. Ertzaren magalera iritsi ginenean, eskuinetara bira egin genuen, mendebalderako norantzan.

Mendebalderuntz, Balaitus urrunean ikusten dugularik

Lehen argi izpiak

Elur mantu gogorra

Kranpoiak jaztea erabaki genuen gure segurtasuna bermatzeko

Aurreko egunetako lehortea zela eta elur mantua erabat gogorra zegoen. Eskiekin ibiltzea eta segurtasuna bermatzea ez zen erraza egiten. Eguna argitzen hasi zen, eguzkiak lehen izpiak jaurtitzen zituelarik ekialdeko mendi lerroaren atzetik. Urrutian, parez-pare, Balaituseko tontorra ikusten genuen. Igo nahi genuen korridorea antzematen hasi ginen, tontorretik glaziarrera zuzenean jeisten zen arrail zuri bat sortzen zuelarik. Gainera, beste zenbait kanalez inguratua zegoen eta denek zuten igotzeko itxura interesgarria (egia esan, gogoz geratu ginen besteren bat probatzeko). Elurraren gogortasuna ikusirik eta gure segurtasuna bermatzearren, eskiak kendu eta kranpoiak jartzea erabaki genuen.

Ingurune paregabe eta bakarti hartatik beste ordu eta erdi malda nekagarri batetik gora jarraituz, Balaituseko glaziarra zeharkatzea lortu genuen eta korridorearen hasieran kokatu ginen, errimaia batekin tupust egin genuen momentuan. Errimaia hau zati batzuetan irekita zegoen eta zulo iluna antzematen genuen. Lehen bi luzeetarako soka jarri genuen, normalean egon daitekena baino arriskutsuago zegoela iruditu baitzitzaigun:

1go luzea (35m - 55º): Korridoreak hainbat sarbide puntu ditu. Guk ezkerretik sartzea erabaki genuen. Errimaia eta gero pausu estu eta horizontal bat du eskuinetara. 5 metrotara zinta bat dago baina gu zinta hau baino 10 metro gorago joan ginen lehen bilkuneraino.

2en luzea (30m - 75º): Pausu honi “adrelinador” bezala deitu izan diote zenbait blog-etan. Tximinia bertikal bat da. Gure egoerak ez ziren xamurrak izan, pausu honen 8 metroak "verglas" hauskor batek estali eta bai sarreran eta baita irteeran ere transformatu gabeko elur mantu lodi batek tapatzen baitzuen. Zailtasunetik irtendakoan, ezkerretara aurkitzen da bilkunea.

Gainontzekoa (55º): Hemendik aurrera zailtasunak gutxitu eta malda erlaxatzen zenez, ensanblean jarraitzea erabaki genuen.

Korridorera iristen

Korridorearen amaieran, ensanblean

Korridorea Balaitus tontorrea amaitzen da. Honek jarduerari plus bat ematen dio. Bakardadean eta neguan mendi honen gailurrean egotea zoragarria da, kontutan izanik ez dagoela bertara igotzen den bide errezik.

Jetsiera bide berdinetik egin genuen. Lehen zatia destrepatu egin behar da, hau delarik agian jetsierako kontuzko momentu nagusiena. Lehen bilkunera iritsi ondoren, 4-5 rapeletan berriz ginen eskiekin parez-pare. Eskiak jantzi eta lehen jetsiera izan zen egun guztiko hoberena, gainontzeko malda guztiak gogortuta baitzeuden eta oso zaila egiten zen segurtasunez eskiatzea. Hala ere, sekulako bakardadean naturarekin bat sentitzea lortu genuen asteburu zoragarria izan zen hura. Gainera, jarduerak denetik duela esan daiteke, eta nahiz eta zailtasun handirik ez izan, erabat asetuta sentiarazi gintuen.

Balaituseko tontorra

Datu teknikoak

  • Ibilbidea: Balaitus Neous-eko glaziarretik
  • Igoera data:2019-12-28
  • Kokapena:Pirinioak
  • Kategoriak : Ipar aurpegia, Korridorea, Trabesia
  • Zailtasuna:AD+
  • Korridorearen graduazioa:75º
  • Hasiera puntuan amaitzen da:Bai
  • Iristeko denbora:2h 15m aterpetxera
  • Nola iritsi:Gave d`Arrens-eko interpretazio guneko "Chalet"-tik.
  • Igotzeko denbora:5h tontorrera
  • Jeisteko denbora:3h 30m
  • Ezaugarriak:Glaziarreko ibilbidea. Ipar pareta, negu guztian eguzkia ikusten ez duen bailaran.
  • Materiala:Alien semaforoa, 30 metroko bi soka biki eta eskiak.
  • Egoera:Udaberriko elur transformatua.
  • Garaia: Negua, Udaberria
  • IBILBIDEAREN DATU GUZTIAK IKUSI
Gureak eta beste batzuen Cookie-ak erabiltzen ditugu, webgune honen erabiltzaileen nabigazioaren analisia egin ahal izateko.
Nabigatzen jarraitzen baduzu, onartzen duzula suposatzen dugu. Nahi izanez gero, konfigurazioa aldatu edo informazio gehiago jaso ahalko duzu hemen.